បរទេស៖ បណ្តារដ្ឋមន្ត្រីហិរញ្ញវត្ថុរបស់ក្រុមប្រទេស G20 លើកលែងតែប្រទេសចិន បានគាំទ្រលើការចាត់វិធានការប្រឆាំងនឹងគោលនយោបាយមិនមែនទីផ្សារ និងការបង្ខូចទ្រង់ទ្រាយពាណិជ្ជកម្ម ជាមួយនឹងការទាមទារឱ្យមានចំណាត់ការផងដែរ។

នៅក្នុងកិច្ចប្រជុំមួយកាលពីថ្ងៃអង្គារ៍ សប្ដាហ៍នេះ អាម៉េរិក ទទួលបានការគាំទ្រពីសំណាក់រដ្ឋមន្ត្រីហិរញ្ញវត្ថុ G20 ទាំងអស់ លើកលែងតែចិន ដើម្បីចាត់វិធានការប្រឆាំងនឹងគោលនយោបាយមិនមែនទីផ្សារ និងការបង្ខូចទ្រង់ទ្រាយពាណិជ្ជកម្ម ជាមួយនឹងការលើកឡើងថា ការនាំចេញលើសកម្រិតរបស់ចិនបង្កភាពរាំងស្ទះដល់កំណើនសេដ្ឋកិច្ចនៅកន្លែងផ្សេងទៀត។

រដ្ឋមន្ត្រីក្រសួងរតនាគារអាម៉េរិក លោក Scott Bessent លើកឡើងថា នៅពេលដែលព្រមានចំពោះដៃគូពាណិជ្ជកម្មដទៃទៀតកាលពីឆ្នាំមុនអំពីការដំឡើងពន្ធគយរបស់អាម៉េរិក វានឹងបណ្តាលឲ្យមានលំហូរទំនិញចិនចូលទៅកាន់ទីផ្សាររបស់ពួកគេកាន់តែច្រើន។ ដោយឡែក គោលនយោបាយមិនមែនទីផ្សារ គឺសំដៅលើការជ្រៀតជ្រែកយ៉ាងខ្លាំងក្លារបស់រដ្ឋាភិបាលនៅក្នុងប្រព័ន្ធសេដ្ឋកិច្ច និងទីផ្សារដូចជា ការឧបត្ថម្ភធនពីរដ្ឋ និងការកំណត់តម្លៃដោយរដ្ឋ។ សកម្មភាពនេះគឺខុសទ្រង់ទ្រាយពីគោលការណ៍ទីផ្សារសេរីពិតប្រាកដ។

សេចក្តីថ្លែងការណ៍បិទកិច្ចប្រជុំរដ្ឋមន្រ្តីហិរញ្ញវត្ថុក្រុម G20 បានបញ្ជាក់ថា បណ្តាប្រទេសចូលរួមទាំងអស់លើកលែងតែចិន គាំទ្រលុបបំបាត់គោលនយោបាយមិនមែនទីផ្សារដែលធ្វើឱ្យពាណិជ្ជកម្មមានវិសមភាពកាន់តែធ្ងន់ធ្ងរឡើង ជាពិសេសប្រទេសដែលមានអតិរេកពាណិជ្ជកម្មច្រើនលើសលប់ គួរតែទប់ស្កាត់ភាពខុសប្រក្រតីដែលរារាំងការប្រើប្រាសស់ក្នុងស្រុក និងការរំពឹងផ្អែកខ្លាំងលើការនាំចេញជ្រុលពេកសម្រាប់គាំទ្រកំណើនសេដ្ឋកិច្ច។

ការនាំចេញយ៉ាងសន្ធឹកសន្ធាប់របស់ចិនកំពុងដាក់សម្ពាធដល់សេដ្ឋកិច្ចទូទាំងពិភពលោក ជាពិសេសនៅពេលដែលអាម៉េរិកដំឡើងពន្ធគយខ្ពស់លើទំនិញចិន ដោយសារប្តូរទិសដៅនាំចេញទៅកន្លែងផ្សេងវិញ។ ការហូរចូលនៃទំនិញចិនថោកៗ និងច្រើនលើសលប់ធ្វើឱ្យអាជីវកម្ម និងរោងចក្រក្នុងស្រុករបស់បណ្តាប្រទេសទាំងនោះពិបាកប្រកួតប្រជែងរហូតឈានដល់ការខាតបង់ ឬ បិទទ្វារជាដើម។ ជាមួយគ្នានេះ ស្របពេលដែលតម្រូវការក្នុងស្រុកចុះខ្សោយ ចិនបានពង្រឹងទ្វេដងលើការនាំចេញរថយន្តអគ្គិសនី EV ឈីបពាក់កណ្តាលចម្លង និងទំនិញផ្សេងៗទៀត។ ជាក់ស្ដែង ក្នុងខែកក្កដា កន្លងទៅ ការនាំចេញសរុបរបស់ចិនបានកើនឡើង ២៣.៩ ភាគរយធៀបនឹងខែដូចគ្នាកាលពីឆ្នាំ២០២៥ ដែលធ្វើឱ្យអឺរ៉ុបស្នើឱ្យមានការរឹតបន្តឹងកាន់តែខ្លាំងលើទំនិញចិន។ អតិរេកពាណិជ្ជកម្មទំនិញរបស់ចិនជាមួយសហភាពអឺរ៉ុបឈានដល់ ៣៦០.៦ ពាន់អឺរ៉ូក្នុងឆ្នាំ ២០២៥ ដែលកើនឡើង ១៥ ភាគរយពី ២០២៤ ហើយតួរលេខនឹងកើនឡើងទៀតនៅឆ្នាំនេះ។ យ៉ាងណាមិញ ចិនហាក់មិនសូវខ្វាយខ្វល់នឹងការអំពាវនាវនេះយូរឆ្នាំមកហើយ ទោះបីជាខ្លួនជាសមាជិករបស់ក្រុមប្រទេស​ G20 ក៏ដោយ។

ក្រៅពីបញ្ហាអតិរេកពាណិជ្ជកម្មជាមួយនឹងចិន សមាជិកក្រុម G20 ក៏បានលើកឡើងពីការព្រួយបារម្ភ និងកង្វល់ផ្សេងៗផងដែរ។ ប្រទេសនៅអឺរ៉ុប និងកាណាដាសម្តែងការមិនពេញចិត្តចំពោះវត្តមានរបស់រុស្ស៊ីក្នុងកិច្ចប្រជុំនេះ ចំណែកឯអាល្លឺម៉ង់វិញលើកឡើងពីជម្លោះពន្ធគយ និងសង្គ្រាមបង្កើនភាពមិនប្រាកដប្រជាកាន់តែខ្លាំងដល់កំណើនសេដ្ឋកិច្ច។ មូលនិធិរូបិយវត្ថុអន្តរជាតិ (IMF) និងបណ្តាប្រទេសមួយចំនួនបានអំពាវនាវឱ្យមានចំណាត់ការសម្របសម្រួលគ្នា។ លើសពីនេះ កិច្ចប្រជុំនេះក៏បានជជែកដេញដោលពីការរឹតបន្តឹងការនាំចេញរ៉ែកម្ររបស់ចិន អតិផរណា និងទីផ្សារប័ណ្ណបំណុលពិភពលោកផងដែរ៕