សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ ការចាកចេញរបស់ពលករខ្មែររាប់សែននាក់ពីថៃ កំពុងបង្កផលប៉ះពាល់យ៉ាងខ្លាំងដល់វិស័យសំខាន់ៗរបស់ប្រទេសនេះ ដែលពឹងផ្អែកលើកម្លាំងពលកម្មបរទេស ចាប់ពីកសិកម្ម សំណង់ និងផលិតកម្ម រហូតដល់ទេសចរណ៍ និងសេវាកម្ម ខណៈការស្វែងរកកម្លាំងពលកម្មមកជំនួសកំពុងជួបការលំបាក។
យោងតាមការរាយការណ៍របស់ Sri Lanka Guardian កាលពីថ្ងៃទី១៦ ខែសីហា ឆ្នាំ២០២៦ បន្ទាប់ពីជម្លោះព្រំដែនកាលពីឆ្នាំ ២០២៥ ពលករខ្មែរប្រមាណ ៧៨០ ០០០ នាក់បានចាកចេញពីប្រទេសថៃ ដែលធ្វើឱ្យទីផ្សារការងាររបស់ថៃប្រឈមនឹងការខ្វះខាតកម្លាំងពលកម្មកាន់តែខ្លាំង។
លោក Wiboon Suphakarnpongkul អនុប្រធានសភាពាណិជ្ជកម្មថៃ បានលើកឡើងថា ចំនួនពលករខ្មែរបានធ្លាក់ចុះពីប្រមាណ ៥៥០ ០០០ នាក់ មកត្រឹម ១៩៤ ០០០ នាក់នៅក្នុងខែឧសភា។
គណៈកម្មាធិការរួមស្តីពីពាណិជ្ជកម្ម ឧស្សាហកម្ម និងធនាគារ (JSCCIB) ដែលរួមមានសភាពាណិជ្ជកម្មថៃ សហព័ន្ធឧស្សាហកម្មថៃ និងសមាគមធនាគារថៃ បានព្រមានថា ការខ្វះខាតកម្លាំងពលកម្មកំពុងប៉ះពាល់ដល់កសិកម្មតាមរដូវកាល ឧស្សាហកម្មផលិតកម្ម សំណង់ ទេសចរណ៍ និងសេវាកម្ម។
ស្ថាប័ននេះក៏បានបង្ហាញការព្រួយបារម្ភចំពោះផលប៉ះពាល់ដែលអាចកើតមានលើរដូវប្រមូលផលផ្លែឈើ ភស្តុភារនៃការនាំចេញអង្ករ និងផលិតកម្មតាមរោងចក្រ។
ដើម្បីកាត់បន្ថយផលប៉ះពាល់ ថៃកំពុងព្យាយាមរក្សាពលករចំណាកស្រុកដែលមានស្រាប់នៅក្នុងប្រទេស ជាពិសេសពលករមកពីមីយ៉ាន់ម៉ា ព្រមទាំងស្វែងរកកម្លាំងពលកម្មពីប្រទេសផ្សេងៗ ដូចជា ស្រីលង្កា បង់ក្លាដែស និងឥណ្ឌូណេស៊ី។
JSCCIB បានអំពាវនាវឱ្យរដ្ឋាភិបាលបន្តសុពលភាពប័ណ្ណការងាររបស់ពលករបរទេស កាត់បន្ថយថ្លៃចុះឈ្មោះ និងធ្វើឱ្យនីតិវិធីមានភាពងាយស្រួលជាងមុន ព្រមទាំងដោះស្រាយបញ្ហាប្រព័ន្ធអេឡិចត្រូនិក និងពន្លឿនកិច្ចព្រមព្រៀងជ្រើសរើសពលករពីប្រទេសផ្សេងៗ។
ទោះជាយ៉ាងណា ការជំនួសកម្លាំងពលករកម្ពុជាមិនមែនជារឿងងាយស្រួលនោះទេ។ រចនាសម្ព័ន្ធការងាររបស់ថៃបានពឹងផ្អែកលើពលករចំណាកស្រុកពីប្រទេសជិតខាង ជាពិសេសកម្ពុជា និងមីយ៉ាន់ម៉ា ដោយសារភាពជិតស្និទ្ធតាមភូមិសាស្ត្រ និងថ្លៃធ្វើដំណើរទាប។
ទិន្នន័យពីអង្គការអន្តរជាតិខាងការងារ (ILO) និងការជូនដំណឹងពីក្រុមនិយោជក បង្ហាញថា កម្លាំងពលកម្មដែលកើតចេញពីកត្តាទាំងនេះ មិនអាចបង្កើតឡើងវិញបានយ៉ាងឆាប់រហ័សឡើយ។
ចំពោះពលករមីយ៉ាន់ម៉ា ការរឹតបន្តឹងការធ្វើដំណើរ បញ្ហាសន្តិសុខនៅតាមតំបន់ព្រំដែន និងថ្លៃជើងសារកើនឡើង ក៏កំពុងធ្វើឱ្យការនាំចូលកម្លាំងពលកម្មថ្មីកាន់តែលំបាក។
ការធ្វើដំណើរពីមីយ៉ាន់ម៉ាមកកាន់ប្រទេសថៃក៏មានតម្លៃថ្លៃ និងប្រឈមហានិភ័យជាងមុន ដោយធ្វើឱ្យពលករមួយចំនួនងាកទៅប្រើការធ្វើដំណើរតាមយន្តហោះ ខណៈអ្នកដែលមិនអាចធ្វើដំណើរតាមផ្លូវការបាន អាចត្រូវពឹងផ្អែកលើមេខ្យល់ដើម្បីឆ្លងដែន។
ប្រភពបានរាយការណ៍ថា ច្បាប់កាតព្វកិច្ចយោធារបស់មីយ៉ាន់ម៉ា ដែលអនុវត្តចំពោះបុរសអាយុពី ១៨ ដល់ ៣៥ ឆ្នាំ ក៏ជាកត្តាមួយដែលធ្វើឱ្យពលករមួយចំនួនក្នុងក្រុមអាយុនេះមិនអាចចាកចេញតាមច្រកផ្លូវការបាន។
ការឆ្លងដែនតាមមេខ្យល់អាចមានតម្លៃចាប់ពី ១ ០០០ ដុល្លារ ខណៈសេវាបន្ថែមសម្រាប់ការរៀបចំការងារ ឬជួយរៀបចំឯកសារចុះឈ្មោះ អាចមានតម្លៃប្រមាណ ២ ០០០ ដុល្លារឡើងទៅ។
ស្ថានភាពនេះបង្ហាញថា ការចាកចេញរបស់ពលករខ្មែរមិនត្រឹមតែបង្កការខ្វះខាតកម្លាំងពលកម្មនៅក្នុងប្រទេសថៃប៉ុណ្ណោះទេ ប៉ុន្តែថែមទាំងអាចប៉ះពាល់ដល់វិស័យដែលពឹងផ្អែកខ្លាំងលើពលករបរទេស ដូចជា កសិកម្ម សំណង់ នេសាទ និងរោងចក្រផលិតកម្ម។
នៅពេលប្រឈមនឹងវិបត្តិព្រំដែន ឬវិបត្តិនយោបាយ ការស្វែងរកកម្លាំងពលកម្មថ្មីមកជំនួសក្នុងរយៈពេលខ្លីមិនមែនជារឿងងាយស្រួលឡើយ ដោយសារវាពាក់ព័ន្ធនឹងការបើក ឬបិទច្រកព្រំដែន ថ្លៃចំណាយលើការធ្វើដំណើរ និងការរៀបចំឯកសារ ច្បាប់ និងបទប្បញ្ញត្តិ ព្រមទាំងស្ថិរភាពនយោបាយ និងសន្តិសុខក្នុងតំបន់៕
Account
Security
Favourite Content