សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គម្រោងសាងសង់ផ្លូវ និងស្ពានវែងជាគេងនៅកម្ពុជាតភ្ជាប់ពីខេត្តកំពង់ឆ្នាំងទៅខេត្តកំពង់ធំ ដែលមានប្រវែងសរុបជិត៦០គីឡូម៉ែត្រ បានសិក្សាចប់សព្វគ្រប់ហើយ ដោយបច្ចុប្បន្ននេះ ក្រុមហ៊ុនសាងសង់ផ្លូវកំពុងរង់ចាំថវិកាពីសាធារណរដ្ឋប្រជាមានិតចិន បើកការដ្ឋានសាងសង់ ។
បើតាមឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូន បានមានប្រសាសន៍ឱ្យដឹងថា គម្រោងដែលសាងសង់ផ្លូវលេខ៥០សេ និងស្ពានវែងជាងគេនៅកម្ពុជានេះ គឺក្រុមហ៊ុនសាជីវកម្មស្ពានថ្នល់ចិន (CRBC ) ហើយគម្រោងនេះ បានបញ្ចប់ការសិក្សារួចរាល់ ដោយរង់ចាំការពិនិត្យ និងសម្រេចឥណទានសម្បទានពីសាធារណរដ្ឋប្រជាមានិតចិន ។
ឯកឧត្តមបន្តថា ការស្ថាបនាផ្លូវមួយខ្សែនេះ ត្រូវបែងចែកជាពីរផ្នែក ដោយមួយផ្នែកគឺស្ពានឆ្លងកាត់ទន្លេសាបប្រវែង ៣.២៤០ម៉ែត្រ ទន្ទឹង១៣,៥ម៉ែត្រ និងមួយផ្នែកទៀតគឺគម្រោងសាងសង់ផ្លូវ ៥០សេ ប្រវែងសរុប៥៨គីឡូម៉ែត្រ ក្រាលបេតុង AC ទទឹង១០ម៉ែត្រ លើទទឹងតួផ្លូវ១១ម៉ែត្រ ។
ឯកឧត្តមបន្តថា ៖ ផ្លូវមួយខ្សែនេះមានសារសំខាន់ណាស់ក្នុងការតភ្ជាប់ទំនាក់ទំនងរវាងខេត្តកំពង់ឆ្នាំង និងខេត្តកំពង់ធំ ហើយនៅពេលវាសាងសង់រួច នឹងជួយសម្រួលដល់ការធ្វើចរាចរណ៍បានឆាប់រហ័ស ពីផ្លូវជាតិលេខ៥ទៅផ្លូវជាតិលេខ៦ ជួយជំរុញខឿនសេដ្ឋកិច្ចរវាងខេត្តទាំងពីរបានមួយកម្រិតទៀត។
បើតាមឯកឧត្តម ស៊ុន ចាន់ថុល ឧបនាយករដ្ឋមន្ត្រីនិងអនុប្រធានទី១ក្រុមប្រឹក្សាអភិវឌ្ឍន៍កម្ពុជាបានថ្លែងកន្លងមកនេះថា រាជរដ្ឋាភិបាលបានដាក់គម្រោងផ្លូវជាតិលេខ៥០សេនេះជាគម្រោងអាទិភាពដែលត្រូវគិតគូរអភិវឌ្ឍន៍មុន ហើយឯកឧត្តមក៏បានណែននាំឱ្យរដ្ឋមន្ត្រីក្រសួងសាធារណការនិងដឹកជញ្ជូនតាមដានលើវឌ្ឍនភាពនៃគម្រោងនេះដើម្បីស្នើសុំទៅ ក្រសួងសេដ្ឋកិច្ចនិងហិរញ្ញវត្ថុដាក់ទម្លាក់ថវិកាដើម្បីអាចបើកការដ្ឋាននៅក្នុងឆ្នាំ ២០២៤នេះ ។
គួរបញ្ជាក់ថា រាជរដ្ឋាភិបាលនៅតែបន្តអភិវឌ្ឍន៍លើហេដ្ឋារចនាសម្ព័ន្ធតភ្ជាប់ពីភ្នំពេញ ទៅបណ្ដាខេត្ត និងពីបណ្ដាខេត្តទៅបណ្ដាខេត្តក៏ដូចជាផ្លូវក្នុងខេត្តជាច្រើនខ្សែ ដើម្បីសម្រួលដល់ការធ្វើដំណើរបស់ប្រជាពលរដ្ឋ ការដឹកជញ្ជូនកសិផលរបស់ពលរដ្ឋ ការធ្វើដំណើររបស់ទេសចរនិងដើម្បីទាក់ទាញដល់ការវិនិយោគនានាចូលទៅកាន់តំបន់នានាទូទាំងប្រទេស បង្កើតការងារនិងផ្ដល់ប្រាក់ចំណូលដល់ប្រជាពលរដ្ឋកម្ពុជាបានកាន់តែច្រើន ៕
Account
Security
Favourite Content