សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ព្រះពុទ្ធបដិមាសាងពីស្ព័ន មានកម្ពស់៩ម៉ែត្រ ទម្ងន់ ៩តោន ត្រូវបានដាក់ដម្កល់ក្នុងអាកាសយានដ្ឋានអន្តរជាតិតេជោរួចរាល់ហើយនៅព្រឹកថ្ងៃទី ០៨ ខែសីហា ឆ្នាំ២០២៥ ដើម្បីត្រៀមដាក់ដំណើរការប្រតិបត្តិការអាកាសយានដ្ឋានអន្តរជាតិនេះនៅថ្ងៃទី ៩ ខែកញ្ញា ២០២៥ និងត្រៀមសម្ពោធជាផ្លូវការនៅថ្ងៃទី២០ ខែតុលា ឆ្នាំ២០២៥ ក្រោមអធិបតីភាពសម្ដេចមហាវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ។
ព្រះពុទ្ធបដិមានេះ ធ្វើឡើងពីស្ពាន់ មានព្រះភ្នែនប្រទានពរ បង្ហាញពីការលើកតម្កើងព្រះពុទ្ធសាសនាទៅកាន់ភ្ញៀវជាតិ និងអន្តរជាតិ ដែលបានឆ្លងកាត់អាកាសយានដ្ឋានអន្តរជាតិតេជោនៅពេលអាកាសយានដ្ឋានមួយនេះចាប់ផ្ដើមដំណើរការទទួលភ្ញៀវ ។
គួររម្លឹកថា អាកាសយានដ្ឋានអន្តរជាតិតេជោ ត្រូវបានសាងសង់ឡើងលើទំហំផ្ទៃដីសរុបប្រមាណ ២ ៦០០ហិកតា ជាអាកាសយានដ្ឋានលំដាប់ 4F អាចឱ្យយន្តហោះធំៗឆ្លងទ្វីបចុះចត និងប្តូរជើងយន្តហោះទៅកាន់ប្រទេសទី៣ ។
លោកឧកញ៉ា ឆារស៍ វ៉ាន់ នាយកគ្រប់គ្រងនៃក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) បានមានប្រសាសន៍ថា គិតត្រឹមថ្ងៃទី០៨ ខែសីហា ឆ្នាំ២០២៥ អាកាសយានដ្ឋានអន្តរជាតិតេជោ សម្រេចបានវឌ្ឍនភាព១០០ភាគរយហើយ ដោយបច្ចុប្បន្ននេះ ក្រុមហ៊ុនកំពុងប្រើប្រាស់មនុស្សប្រមាណជាង២០០នាក់ដើម្បីបោសសម្អាតខាងក្នុង និងត្រៀមបើកដំណើរការប្រតិបត្តិការនៅថ្ងៃទី០៩ ខែកញ្ញា ឆ្នាំ២០២៥ខាងមុខនេះ ។
ឯកឧត្តម ស៊ុន ចាន់ថុល ឧបនាយកនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានមានប្រសាសន៍ថា តាមរយៈអាកាសយានដ្ឋានអន្តរជាតិតេជោ ដែលជាអាកាសយានដ្ឋានអន្តរជាតិថ្មីរបស់កម្ពុជា នឹងអាចទាក់ទាញវិនិយោគិន និងទេសចរបរទេសចូលមកទស្សនានៅក្នុងប្រទេសកម្ពុជា ក្នុងពេលដែលរាជរដ្ឋាភិបាលកម្ពុជាក៏បានសាងសង់ហេដ្ឋារចនាសម្ព័ន្ធផ្ទៃក្នុងសម្រាប់សម្រួលដល់ការវិនិយោគរបស់វិនិយោគិនបរទេសទាំងនោះដែរ ។ ជាក់ស្ដែង គម្រោងសាងសង់ផ្លូវដឹកជញ្ជូនតាមទឹកដែលតភ្ជាប់ពីផ្លូវទឹកសាប ទៅផ្លូវទឹកប្រៃ (សមុទ្រ ) គឺព្រែកជីកហ្វូណនតេជោ ដែលជាគម្រោងប្រវត្តិសាស្ត្រក្នុងប្រទេសកម្ពុជានឹងចាប់ផ្ដើមដំណើរការជីកនាពេលឆាប់ៗនេះ ។
ឯកឧត្តមបន្តថា ក្រៅពីនេះ កម្ពុជាក៏បានសាងសង់ និងលើកកម្ពស់ផ្លូវជាតិសំខាន់ៗទូទាំងប្រទេស ដើម្បីបម្រើដល់ការធ្វើដំណើរ និងការដឹកជញ្ជូន ដែលអាចកាត់បន្ថយពេលវេលា និងថ្លៃដើមបានមួយកម្រិតផងដែរ ដូច្នេះ នៅពេលវិនិយោគិនបរទេសចូលមកដល់ប្រទេសកម្ពុជា ពួកគេអាចនឹងចាប់អារម្មណ៍វិនិយោគក្នុងប្រទេសកម្ពុជាច្រើន ដែលអាចបង្កើតការងារជូនពលរដ្ឋបានកាន់តែច្រើន ។
តាមរយៈគម្រោងអាកាសយានដ្ឋានអន្តរជាតិតេជោ ដែលស្ថិតនៅប៉ែកខាងត្បូងរាជធានីភ្នំពេញនេះដែរ ក៏បាន និងកំពុងជំរុញការអភិវឌ្ឍបន្ថែមនៅតំបន់ជុំវិញនោះដែរ ជាក់ស្ដែង ដូចដែលបានឃើញស្រាប់ ផ្លូវទៅកាន់អាកាសយានដ្ឋានអន្តរជាតិនេះ បានសាងសង់ថ្មី និងពង្រីកធំជាងមុន ដូចជាផ្លូវជាតិលេខ២ ផ្លូវ៦០ម៉ែត្រ ស្ពានអាកាសសម្ដេចមហាបវរធិបតី ហ៊ុន ម៉ាណែត ផ្លូវក្រវាត់ក្រុងទី៣ ឬមហាវិថីស៊ីជីនពីងជាដើម ។
ក្រៅពីនេះដែរ គម្រោងអភិវឌ្ឍន៍ជាច្រើនទៀត ក៏បានលេចរូបរាងជាបន្តបន្ទាប់ ដែលក្នុងនោះគេសង្កេតឃើញគម្រោងអភិវឌ្ឍន៍លំនៅឋាន គម្រោងសាងសង់ឃ្លាំងស្តុងទំនិញ ក៏បាន និងកំពុងសាងសង់ ដោយខ្លះក៏រួចរាល់ ខ្លះទៀតក៏កំពុងមមាញឹកដើម្បីអាចបញ្ចប់ការសាងសង់ក្នុងពេលឆាប់ៗ ។
បើតាមលោក ប៉ូ អ៊ាវគង់ អគ្គនាយកក្រុមហ៊ុនអចលនទ្រព្យ Advance បានបញ្ជាក់ថា តំបន់ជុំវិញអាកាសយានដ្ឋានអន្តរជាតិតេជោ គេមិនអាចសាងសង់សំណង់ខ្ពស់ៗបានទេ ប៉ុន្តែតំបន់ជុំវិញនេះ អាចសាងសង់ឃ្លាំងស្តុកទំនិញ រោងចក្រ ឧស្សាហកម្ម ដែលអាចជ្រើសរើសទីតាំងនៅតាមបណ្ដោយផ្លូវជាតិ២ ក្នុងខេត្តកណ្ដាល ឬខេត្តតាកែវបាន ព្រោះជាទីតាំងដែលងាយស្រួលក្នុងការដឹកជញ្ជូនទៅកាន់កំពង់ផែទឹកជ្រៅ ហើយបន្តិចទៀត គម្រោងផ្លូវទឹកព្រែកជីកហ្វូណតេជោនឹងសាងសង់រួចរាល់ដែលនឹងកាន់តែងាយស្រួលដល់ការដឹកជញ្ជូនថែមទៀត ៕
Account
Security
Favourite Content