ភ្នំពេញ៖ ក្រុមហ៊ុនដ៏ធំលំដាប់អន្តរជាតិមួយបានបង្ហាញពីគោលបំណងចម្បងរបស់ខ្លួនក្នុងការបណ្តាក់ទុនវិនិយោគ បង្កើតតំបន់សេដ្ឋកិច្ចថ្មីមួយកន្លែងនៅលើផ្ទៃដីទំហំប្រមាណ ២៧០ហិកតា ស្ថិតនៅតាមបណ្តោយផ្លូវល្បឿនលឿនភ្នំពេញ-ក្រុងព្រះសីហនុ ខណៈដែលខ្លួនបានសិក្សាពីសក្ដានុពល និងឱកាសវិនិយោគនៅកម្ពុជារួចរាល់ទៅហើយនោះ។

លោក កាំង ឡេង ប្រធានក្រុមប្រឹក្សាភិបាលនៃក្រុមហ៊ុន Golden Port SEZ Development Co., Ltd. និងជាប្រធានគណៈប្រតិភូដែលដឹកនាំបណ្តាម្ចាស់ក្រុមហ៊ុន និងអ្នកវិនិយោគចូលមកសិក្សាពីសក្ដានុពលវិនិយោគនៅកម្ពុជាកាលពីពេលថ្មីនេះបានលើកឡើងថា ក្រុមហ៊ុនរបស់លោកពិតជាមានបំណងបណ្តាក់ទុនវិនិយោគនៅកម្ពុជា ដោយបង្កើតតំបន់សេដ្ឋកិច្ចពិសេសមួយកន្លែង ដែលប្រមូលផ្តុំទៅរោងចក្រ សហគ្រាសយ៉ាងមមាញឹក ស្ថិតនៅតាមបណ្តោយផ្លូវល្បឿនលឿន ភ្នំពេញ-ព្រះសីហនុ ដោយនៅក្នុងដំណាក់កាលដំបូងលើផ្ទៃដីប្រមាណ ២៧០ហិកតា ហើយដំណាក់កាលបន្ទាន់នឹងពង្រីកវិសាលភាពបន្ថែមទៀត។

លោកបានបន្តទៀតថា បច្ចុប្បន្ននេះ តាមរយៈរូបលោកផ្ទាល់ បានផ្សព្វផ្សាយ និងដឹកនាំប្រតិភូវិនិយោគពីប្រទេសចិនមកសិក្សាពីឱកាស និងសក្ដានុពលរបស់កម្ពុជា ជាមួយនឹងការប្រមូលព័ត៌មានសំខាន់នានា ដើម្បីធ្វើជាមូលដ្ឋានសម្រាប់ក្រុមហ៊ុនរៀបចំដំណើរការសុំវិនិយោគ។

ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានសម្តែងនូវក្តីសោមនស្សរីករាយ និងស្វាគមន៍ចំពោះវត្តមានរបស់គណៈប្រតិភូក្នុងដំណើរទស្សនកិច្ចសិក្សាស្វែងយល់ពីគម្រោង វិនិយោគបង្កើតតំបន់សេដ្ឋកិច្ចពិសេស រួមជាមួយនឹងបញ្ជាក់ពីកាលានុវត្តភាពវិនិយោគនៅកម្ពុជា។

ជាមួយគ្នានេះ ឯកឧត្តមក៏បានជម្រាបអំពីរចនាសម្ព័ន្ធ និងតួនាទីភារកិច្ចរបស់ក្រុមប្រឹក្សាអភិវឌ្ឍន៍កម្ពុជា ជាពិសេស ផ្តោតលើការជំរុញទាក់ទាញការវិនិយោគឯកជន ដែលបច្ចុប្បន្នកម្ពុជាមានច្បាប់ស្តីពីវិនិយោគប្រកបដោយភាពបើកចំហ មានតម្លាភាព និងអាចប៉ាន់ប្រមាណទុកជាមុនបាន។​ បន្ថែមពីនេះ ឯកឧត្តមអគ្គលេខាធិការក៏បានប្រគល់វេទិកាជូនមន្ត្រីជំនាញធ្វើបទបង្ហាញអំពីការអភិវឌ្ឍតំបន់សេដ្ឋកិច្ចពិសេសនៅកម្ពុជា និងនីតិវិធីចុះបញ្ជីវិនិយោគបង្កើតតំបន់សេដ្ឋកិច្ចពិសេស ជូនគណៈប្រតិភូឱ្យកាន់តែយល់ច្បាស់ពីស្ថានភាពនៃបរិយាកាសវិនិយោគបច្ចុប្បន្ននៅកម្ពុជា និងភាពសាមញ្ញនៃនីតិវិធីស្នើសុំវិនិយោគបង្កើតតំបន់សេដ្ឋកិច្ចពិសេស។

ពាក់ព័ន្ធទៅនឹងការវិនិយោគក្នុងរូបភាពបង្កើតតំបន់សេដ្ឋកិច្ចពិសេសនេះ អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា ធ្លាប់បានលើកឡើងថា នៅពេលមានការបង្កើតតំបន់សេដ្ឋកិច្ចពិសេសបានកាន់តែច្រើន សេដ្ឋកិច្ចជាតិក៏នឹងរីកចម្រើនកាន់តែខ្លាំងដូចគ្នា។ វានឹងធ្វើឱ្យមានកំណើនជីវភាពប្រជាពលរដ្ឋដែលនៅតំបន់ជុំវិញនោះកាន់តែធូរធា ដោយសារមានការងារធ្វើច្រើន សេដ្ឋកិច្ចមានដំណើរការ។

អ្នកឧកញ៉ាបានបន្តថា ការបង្កើតតំបន់សេដ្ឋកិច្ចពិសេសទោះក្នុងទំហំណាក៏ដោយ គឺជារឿងចំណេញលើចំណេញ ពោលគឺចំណេញទាំងក្រុមហ៊ុនវិនិយោគក្រោមការទទួលបានអនុគ្រោះលក្ខខណ្ឌ និងការលើកទឹកចិត្តពីរដ្ឋាភិបាល ចំណេញទាំងប្រជាពលរដ្ឋតាមរយៈការទទួលបានការងារធ្វើ ដែលជំរុញដល់កំណើនសេដ្ឋកិច្ចជាតិទាំងមូល។

សូមរំលឹកដែរថា តំបន់សេដ្ឋកិច្ចពិសេស គឺជាតំបន់ដែលមានទីតាំងយុទ្ធសាស្ត្រត្រៀមរួចជាស្រេចជា សម្រាប់អាជីវកម្ម និងការវិនិយោគដំណើរការជាមួយនឹងភាពងាយស្រួលនៃហេដ្ឋារចនាសម្ព័ន្ធដឹកជញ្ជូន។ ក្នុងរយៈពេលប៉ុន្មានឆ្នាំចុងក្រោយនេះ ទិន្នផលនាំចេញនៃតំបន់សេដ្ឋកិច្ចពិសេសបានកើនឡើងយ៉ាងខ្លាំង។ ជាទូទៅ តំបន់សេដ្ឋកិច្ចពិសេសមានទីតាំងស្ថិតនៅតំបន់សមស្របបំផុតដើម្បីជួយឱ្យអាជីវកម្មរបស់អ្នករីកចម្រើន និងជោគជ័យ។ ដោយឡែកគិតត្រឹមចុងឆ្នាំ២០២៣កន្លងទៅនេះ កម្ពុជាមានតំបន់សេដ្ឋកិច្ចដែលកំពុងដំណើរការសរុបចំនួន២៤ទីតាំង ផ្តល់ឱកាសការងារជាង១៦ម៉ឺនកន្លែង៕