សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ស្របពេលដែលកម្ពុជាកំពុងអភិវឌ្ឍន៍វិស័យដឹកជញ្ជូនតាមផ្លូវទឹក ទាំងទឹកសាប និងសមុទ្រ កម្ពុជាបានស្នើឱ្យក្រុមហ៊ុនធំមួយដែលមានបទពិសោធន៍លើការអភិវឌ្ឍវិស័យកំពង់ផែ និងភស្តុភារ មកបណ្ដាក់ទុនវិនិយោគលើវិស័យនេះនៅកម្ពុជា ។
ក្នុងដំណើរទស្សនកិច្ចស្វែងរកវិនិយោគិននៅប្រទេសចិន កាលពីសប្ដាហ៍មុននេះ ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានស្នើឱ្យក្រុមហ៊ុន Xiamen Xiangyu Group ( XMXYG) ដែលជាក្រុមហ៊ុនមានបទពិសោធន៍ខាងកំពង់ផែ និងភស្តុភារកម្ម និងជាក្រុមហ៊ុនកំពុងវិនិយោគក្នុងតំបន់ពាណិជ្ជកម្មសេរីគំរូ ក្នុងទីក្រុងសៀមិន ប្រទេសចិន មកបណ្ដាក់ទុនវិនិយោគវិស័យកំពង់ផែ និងភស្តុភារកម្មនៅកម្ពុជា ។
ឯកឧត្តមក៏បានបង្ហាញកាលានុវត្តភាពវិនិយោគរបស់កម្ពុជា និងគម្រោងហេដ្ឋារចនាសម្ព័ន្ធស្ពានថ្នល់ កំពង់ផែ និងគម្រោងព្រែកជីកហ្វូណនតេជោ ជាដើមទៅកាន់ក្រុមហ៊ុន XMXYG របស់ចិន ដើម្បីទាក់ទាញក្រុមហ៊ុននេះមកបណ្ដាក់ទុនវិនិយោគនៅកម្ពុជា ។
នៅក្នុងដំណើរទស្សនកិច្ចរបស់ឯកឧត្តម ស៊ុន ចាន់ថុល ដើម្បីទាក់ទាញវិនិយោគិនចិនមកបណ្ដាក់ទុននៅកម្ពុជានាពេលនេះ ក៏បានជួបជាមួយក្រុមហ៊ុនមួយចំនួនទៀតរបស់ចិន ដូចជា ក្រុមហ៊ុន Wanli Stone ដែលជាក្រុមហ៊ុនមួយក្នុងចំណោមក្រុមហ៊ុនផ្សេងទៀតកំពុងបណ្ដាក់នៅកម្ពុជា ។
នៅក្នុងជំនួបជាមួយឯកឧត្តម ស៊ុន ចាន់ថុល ក្រុមហ៊ុន Wanli Stone បានបង្ហាញពីផែនការរបស់ខ្លួនក្នុងការពង្រីកការវិនិយោគបន្ថែមនៅក្នុងប្រទេសកម្ពុជា ជាពិសេសលើការបង្កើតតំបន់សេដ្ឋកិច្ចពិសេស ដោយពេលនេះតំណាងក្រុមហ៊ុនបានបញ្ជាក់ថាខ្លួនកំពុងសិក្សា និងពិនិត្យរកទីតាំងដើម្បីបង្កើត។
នៅក្នុងពិធីបើកពិព័រណ៍អន្តរជាតិចិន លើកទី២៤ សម្រាប់ការវិនិយោគ និងពាណិជ្ជកម្ម នៅថ្ងៃទី៨ ខែកញ្ញា ឆ្នាំ២០២៤ ឯកឧត្តម ស៊ុន ចាន់ថុល បានមានប្រសាសន៍ថា កិច្ចការវិនិយោគ និងពាណិជ្ជកម្ម ជាក្បាលម៉ាស៊ីនជំរុញឱ្យមានការបង្កើតបច្ចេកវិទ្យា ការងារ និងសសរស្តម្ភនៃស្ថិរភាពសេដ្ឋកិច្ចរបស់កម្ពុជា ។ តាមរយៈការវិនិយោគ កម្ពុជាអាចកសាង ហេដ្ឋារចនាសម្ព័ន្ធតភ្ជាប់ពាសពេញផ្ទៃប្រទេស ទ្រទ្រង់លើភាពរីកចម្រើននៃធុរកិច្ចឧស្សាហកម្មដើម្បីកំណើនសេដ្ឋកិច្ចជាតិ ក៏ដូចជាការនាំមកនូវបច្ចេកវិទ្យាថ្មីៗ ដែលនឹងជួយសម្រួលដល់ការរស់នៅផងដែរ ។
ឯកឧត្តមបានបន្ថែមថា តាមរយៈពាណិជ្ជកម្ម កម្ពុជាអាចចូលរួមផ្លាស់ប្តូរកម្លាំងពលកម្ម ដែលអាចបង្កើតការផ្លាស់ប្តូរជំនាញ ព្រមទាំងបង្កើតចំណងនៃការជឿទុកចិត្ត និងការគោរពគ្នាទៅវិញទៅមករវាងប្រជាជាតិនានានៅលើសាកលកលោក ។
គួរបញ្ជាក់ថា ក្នុងវិស័យកំពង់ផែ និងភស្តុភារ នៅប្រទេសកម្ពុជានេះដែរ នាពីថ្ងៃទី១២ ខែកញ្ញា ២០២៤ ខាងមុខនេះ ចំណតផែកុងតឺន័រថ្មីមួយតម្លៃជាង ៧៦០លានដុល្លារនៅក្នុងកំពង់ផែស្វយ័តក្រុងព្រះសីហន នឹងសម្ពោធដាក់ឱ្យប្រើប្រាស់ជាផ្លូវការ ក្រោមអធិបតិភាពសម្ដេចមហាបវរធិបតិ ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ។ តាមរយៈការដាក់ឱ្យប្រើប្រាស់នូវចំណតផែកុងតឺន័រថ្មីនេះ នឹងធ្វើឱ្យវិស័យកំពង់ផែ និងភស្តុភារនៅកម្ពុជាកាន់តែរីកចម្រើនមួយកម្រិតទៀត អាចធ្វើកំពង់ផែទឹកជ្រៅរបស់កម្ពុជាមានសមត្ថភាពផ្ទុកទំនិញនៅក្នុងចំណតបានបន្ថែមទៀត អាចតភ្ជាប់កំពង់ផែក្នុងស្រុកទៅនឹងកំពង់ផែអន្តរជាតិជាច្រើននៅក្នុងតំបន់និងក្រៅតំបន់ ៕
Account
Security
Favourite Content