សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ យោងតាមរបាយការណ៍របស់ក្រុមហ៊ុនភ្នាក់ងារអចលនទ្រព្យអន្តរជាតិប្រចាំកម្ពុជា CBRE Cambodia បានបង្ហាញឱ្យដឹងថា ការវិនិយោគលើវិស័យសំណង់ក្នុងប្រទេសកម្ពុជានាឆ្នាំ២០២៤កន្លងទៅនេះ នៅមិនទាន់វិលត្រលប់ដូចមុនវិបត្តិកូវីដ១៩នៅឡើយទេ ខណៈដែលទាំងគម្រោងវិនិយោគក្នុងវិស័យសំណង់ និងក្រឡាផ្ទៃសាងសង់ច្រើនជាងគេកាលពីអំឡុងឆ្នាំ២០២៤ គឺជាគម្រោងវិនិយោគលើលំនៅឋាន ហើយក្រៅពីនេះ មានគម្រោងឧស្សាហកម្ម ទេសចរណ៍ និងពាណិជ្ជកម្ម ។
របាយការណ៍របស់ CBRE Cambodia បានឱ្យដឹងថា នៅក្នុងឆ្នាំ២០២៤ គម្រោងវិនិយោគក្នុងវិស័យសំណង់មានចំនួនជាង ២៦៦០គម្រោង ដោយមានផ្ទៃក្រឡាសរុបប្រមាណជាង ១២លានម៉ែត្រការ៉េ ។ ក្នុងចំណោមគម្រោងវិនិយោគវិស័យសំណង់ទាំងអស់ មាន ៣៤,៤ភាគរយបានបញ្ចប់ការសាងសង់, ៤០,៨ភាគរយកំពុងសាងសង់ និងប្រមាណ ១៩,៤ភាគរយស្ថិតនៅក្នុងដំណាក់កាលកំពុងរង់ចាំការសាងសង់ ។
អ្នកជំនាញ និងជាអ្នកវិនិយោគនៅក្នុងវិស័យអចលន្រព្យ និងសំណង់នៅក្នុងប្រទេសកម្ពុជាបានឱ្យដឹងថា នៅក្នុងវិស័យអចលនទ្រព្យទាំងមូល មិនមែនគ្រប់ផ្នែកសុទ្ធតែធ្លាក់ចុះ ឬជាប់គាំងនោះទេ ជាក់ស្ដែងសំណង់បានថយចុះ ឬក៏នៅទ្រឹងក៏ពិតមែន ប៉ុន្តែផ្នែកផ្សេងដូចជាការសាងសង់ឃ្លាំង និងរោងចក្រ បានកើនឡើងគួរឱ្យកត់សម្គាល់ ព្រោះក្នុងរយៈពេលប៉ុន្មានឆ្នាំចុងក្រោយមកនេះ ការវិនិយោគលើឧស្សាហកម្ម រោងចក្រ សហគ្រាស ឃ្លាំងស្តុកទំនិញបានកើនឡើង និងមានអ្នកវិនិយោគចូលមកជាហូរហែ។
អ្នកឧកញ៉ា សៀ ឬទ្ធី ប្រធានក្រុមប្រឹក្សាអភិវឌ្ឍន៍កម្ពុជាបានផ្ដល់ជាយោបល់អ្នកវិនិយោគក្នុងវិស័យអចលនទ្រព្យកម្ពុជា គួរសម្លឹងរកទីតាំងសាងសង់ឃ្លាំង ឬរោងចក្រដើម្បីបំពេញតម្រូវការដល់អ្នកវិនិយោគ ទាំងក្នុង និងក្រៅប្រទេស ជាពិសេសនៅក្នុងឆ្នាំនេះ និងឆ្នាំបន្តបន្ទាប់ ។ ប៉ុន្តែសម្រាប់ការវិនិយោគលើសំណង់ផ្សេងទៀត ដូចជា អគារខុនដូ ការិយាល័យ និងលំនៅឋានជាដើម អាចនឹងបន្តនៅទ្រឹង ។
បើតាមរបាយការណ៍របស់ IMF ក៏បានព្យាករថា វិស័យសំណង់ និងអចលនទ្រព្យនៅកម្ពុជាឆ្នាំ២០២៥នេះ នឹងបន្តស្ថិតនៅក្នុងស្ថានភាពដូចគ្នានឹងឆ្នាំ២០២៤កន្លងទៅដែរ ដោយមិនទាន់មានសញ្ញានៃការប្រែប្រួលជាវិជ្ជមាននៅឡើយ ។ ប៉ុន្តែ មានការរំពឹងទុកថា វិស័យនេះ អាចនឹងប្រសើរឡើងវិញបន្តិច បន្ទាប់ពីមានការផ្លាស់ប្តូរមេដឹកនាំសហរដ្ឋអាមេរិក លោក ដូណាល់ ត្រាំ ដោយសារតែការដាក់ពន្ធ និងសង្គ្រាមពាណិជ្ជកម្មរវាងប្រទេសមហាអំណាចសេដ្ឋកិច្ចធំៗលើពិភពលោក ៕
Account
Security
Favourite Content