សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ សកម្មភាពនៃការវិនិយោគទៅលើវិស័យបដិសណ្ឋារកិច្ចនៅកម្ពុជា ដែលមានដូចជា សេវាកម្មទេសចរណ៍ សណ្ឋាគារ និងភោជនីយដ្ឋានជាដើម ហាក់បានឈានដល់កម្រិតមួយលើសពីតម្រូវការជាក់ស្ដែងរួចទៅហើយ ដូច្នេះវិនិយោគិនដែលមានបំណងបណ្ដាក់ទុនវិនិយោគលើវិស័យមួយនេះ គប្បីមានការប្រុងប្រយ័ត្នខ្ពស់ និងត្រូវសិក្សាពីទីផ្សារឱ្យបានច្បាស់លាស់មុនឈានដល់ការសម្រេចចិត្ត។
លោក ឌិន សុមេធារិទ្ធ ប្រធានសហព័ន្ធទេសចរណ៍កម្ពុជាបានមានប្រសាសន៍ថា ការវិនិយោគលើសេវាកម្មទេសចរណ៍ ដូចជា សណ្ឋាគារ និងភោជនីយដ្ឋាន អ្នកវិនិយោគគួរមានការពិចារណា និងសិក្សាពីទីផ្សារឱ្យបានច្បាស់ ព្រោះថា តំបន់ទេសចរណ៍មួយចំនួនវាគ្រប់គ្រាន់ ឬលើសតម្រូវការទៅហើយ ខណៈតំបន់ទេសចរណ៍មួយចំនួនទៀតនៅខ្វះការផ្គត់ផ្គង់នៅឡើយ ។
លោកបញ្ជាក់ថា ៖
«សម្រាប់តំបន់សៀមរាប ការផ្គត់ផ្គង់លើសេវាកម្មទេសចរណ៍វាហាក់ដូចជាមានចំនួនច្រើនពេកហើយ ។ ខ្ញុំធ្លាប់បានលើកឡើងតាំងពីជាង១០ឆ្នាំមុនម្ល៉េះថា ការអភិវឌ្ឍសេវាកម្មទេសចរណ៍នៅខេត្តសៀមរាបវាច្រើនពេកហើយ និងគួររកតំបន់ណាផ្សេងវិញ ប៉ុន្តែពុំសូវមានអ្នកស្ដាប់ប៉ុន្មាននោះទេ ជាក់ស្ដែងមកដល់បច្ចុប្បន្ននេះ សៀមរាបក៏ជួបប្រទះនឹងបញ្ហាប្រឈមដោយការផ្គត់ផ្គង់លើសពីតម្រូវការ»។
លោក ឌិន សុមេធារិទ្ធ បានបញ្ជាក់ថា ៖
«មែនទែនទៅ ចំនួនភ្ញៀវទេសចរមកលេងខេត្តសៀមរាប បើធៀបនឹងមុនកូវីដ១៩ វាមិនតិចជាងគ្នាប៉ុន្មាននោះទេ ប៉ុន្តែដោយសារតែម្នាក់ៗបានអភិវឌ្ឍន៍លើសេវាកម្មទេសចរណ៍ ដូចជាសណ្ឋាគារ ភោជនីយដ្ឋាន និងសេវាកម្មផ្សេងៗទៀតច្រើនពេក ធ្វើឱ្យយើងមើលឃើញថាចំនួនទេសចរមកលេងខេត្តសៀមរាបតិចជាងមុន ។ កាលពីមុន យើងមាននំមួយដុំ ហើយយើងមានគ្នាតែ២ ទៅ ៣ នាក់ ប៉ុន្តែមកដល់ពេលនេះ នំមួយដុំដដែល តែយើងមានគ្នាដល់ទៅ១០នាក់ ដូច្នេះហើយយើងត្រូវដណ្ដើមនំគ្នាញ៉ាំ » ។
អ្នកជំនាញរូបនេះបានទៀតថា ក្រៅតែពីក្រុងសៀមរាប សម្រាប់តែនៅភ្នំពេញនាពេលបច្ចុប្បន្ននេះ ក៏មានការប្រកួតប្រជែងក្នុងវិស័យសណ្ឋាគារ និងភោជនីយដ្ឋានដែរ ដោយពីមុនអ្នកអភិវឌ្ឍន៍ ឬម្ចាស់សណ្ឋាគារជាជនជាតិខ្មែរអាចរស់បាន ប៉ុន្តែចាប់តាំងពី២០១២ ឬ ២០១៣មក អ្នកវិនិយោគលើសណ្ឋាគារ និងសេវាកម្មទេសចរណ៍ ក៏មានជនបរទេសជាច្រើនចូលមកវិនិយោគធ្វើឱ្យមានការប្រកួតប្រជែងកាន់តែខ្លាំង ។
អ្នកនាង គឹម គិនកេសា អគ្គនាយិកានៃក្រុមហ៊ុន CBRE Cambodia ក៏បានឱ្យដឹងផងដែរថា សម្រាប់ទីផ្សារអចលនទ្រព្យនាពេលបច្ចុប្បន្ន មិនថាចំពោះតែផ្នែកសណ្ឋាគារ លំនៅដ្ឋានសហកម្មសិទ្ធិ ឬលំនៅដ្ឋានជាបុរីផ្ទាល់ដីនោះទេ ការផ្គត់ផ្គង់គឺលើសពីតម្រូវការហើយ ដូច្នេះ រាល់ការវិនិយោគថ្មីៗគួរមានការពិចារណា និងសិក្សាទីផ្សារឱ្យបានច្បាស់លាស់ជាមុនសិន ។
អ្នកនាងបានមានប្រសាសន៍ថា ៖
«សម្រាប់ទីផ្សារអចលនទ្រព្យជាក់ស្ដែងនាពេលនេះ គឺត្រូវការអ្នកទិញច្រើនជាងអ្នកអភិវឌ្ឍន៍ថ្មីៗ ដូចជា ខុនដូ អាផាតមិន និងលំនៅឋានជាដើម ដូច្នេះ សម្រាប់ទីផ្សារទាំងនេះអាចនិយាយបានថា មិនទាន់មានតម្រូវការលើការអភិវឌ្ឍន៍ថ្មីៗបន្ថែមទៀតនោះទេ»។
ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ក៏បានលើកឡើងកាលពីពេលថ្មីៗនេះថា ការអភិវឌ្ឍលើអចលនទ្រព្យដោយមិនសិក្សាទីផ្សារ និងស្ថានភាពសេដ្ឋកិច្ចពិភពលោកច្បាស់លាស់ អាចធ្វើឱ្យទីផ្សារនេះជួបប្រទះនឹងបញ្ហា។
ឯកឧត្តមក៏បានមានប្រសាសន៍បញ្ជាក់ផងដែរថា កាលពីប៉ុន្មានឆ្នាំមុន អ្នកវិនិយោគលើអចលនទ្រព្យ ដូចជា គម្រោងដីឡូត៍ និងលំនៅឋានជាដើម បាននាំគ្នាសម្រុកអភិវឌ្ឍន៍សាងសង់ ដោយមិនបានសិក្សាពីទីផ្សារ និងតាមដានព័ត៌មានសេដ្ឋកិច្ចសាកល ទើបធ្វើឱ្យមានបញ្ហា និងបន្តមកដល់ដូចសព្វថ្ងៃនេះ ៕
Account
Security
Favourite Content