សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គម្រោងធំៗចំនួន៥ ដែលរាជរដ្ឋាភិបាលបានចំណាយថវិកាយ៉ាងសន្ធឹកសន្ធាប់ គួបផ្សំជាមួយនឹងទុកវិនិយោគពីបណ្តាក្រុមហ៊ុនដៃគូមកពីខាងក្រៅប្រទេសនឹងក្លាយជាកម្លាំងចលករយ៉ាងសំខាន់ក្នុងការទាក់ទាញវិនិយោគិនបរទេសឱ្យមកបណ្ដាក់ទុនវិនិយោគនៅកម្ពុជាបន្ថែមទៀត។
គម្រោងចំនួន៥ ដែលបានបញ្ចប់ការសាងសង់ និងកំពុងបន្តការសាងសង់នៅក្នុងប្រទេសកម្ពុជាទាំងនោះ រួមមាន ៖ មានគម្រោងផ្លូវល្បឿនលឿន ភ្នំពេញ – ព្រះសីហនុ , គម្រោងព្រែកជីកហ្វូណនតេជោ (កំពុងដំណើរការតាមផែនការ) , គម្រោងពង្រីកកំពង់ផែស្វយ័តក្រុងព្រះសីហនុ , ម្រោងផ្លូវល្បឿនលឿនភ្នំពេញ – បាវិត , អាកាសយានដ្ឋានអន្តរជាតិតេជោ ត្រូវបានប៉ានប្រមាណទឹកប្រាក់វិនិយោគ រហូតដល់ជិត ៩លានលានដុល្លារអាម៉េរិក ។ ក្នុងនោះ គម្រោងផ្លូវល្បឿនលឿនភ្នំពេញ – ព្រះសីហនុ បានចំណាយថវិកាប្រមាណ ២ពាន់លានដុល្លារអាម៉េរិក បានសាងសង់រួចរាល់ និងកំពុងប្រើប្រាស់, គម្រោងអាកាសយានដ្ឋានអន្តរជាតិតេជោ មានទឹកប្រាក់វិនិយោគប្រមាណ ១,៦ពាន់លានដុល្លារ ដែលគ្រោងនឹងដាក់ដំណើរការនៅថ្ងៃទី១០ ខែកញ្ញា ឆ្នាំ២០២៥ ខាងមុខនេះ ។
ដោយឡែកគម្រោងចំនួន ៣ផ្សេងទៀត រួមមាន គម្រោងពង្រីកកំពង់ផែស្វយ័តក្រុងព្រះសីហនុ គ្រោងចំណាយទឹកប្រាក់ប្រមាណ ជិត១ពាន់លានដុល្លារអាម៉េរិក មាន៣ដំណាក់កាល ។ គម្រោងផ្លូវល្បឿនលឿនភ្នំពេញ-បាវិត គ្រោងនឹងចំណាយថវិកាប្រមាណ ១,៦ពាន់លានដុល្លារអាម៉េរិក និងគម្រោងព្រែកជីកហ្វូណនតេជោ ដែលជាគម្រោងប្រវត្តិសាស្ត្រសម្រាប់ប្រទេសកម្ពុជា គ្រោងនឹងចំណាយវិកាប្រមាណ១,៧ពាន់លានដុល្លារអាម៉េរិក។
ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា ថ្លែងនៅក្នុងសន្និសីទសារព័ត៌មានកាលពីពេលថ្មីៗនេះបានឱ្យដឹងថា ដើម្បីទាក់ទាញការវិនិយោគពីក្រៅប្រទេសបន្ថែម រាជរដ្ឋាភិបាលបានកៀរគរការវិនិយោគលើហេដ្ឋារចនាសម្ព័ន្ធ ព្យាយាមធ្វើយ៉ាងណាកាត់បន្ថយតម្លៃថ្លៃដើមនៃការដឹកជញ្ជូន កាត់បន្ថយពេលវេលាក្នុងការដឹកជញ្ជូនចេញ និងចូលមកក្នុងប្រទេសកម្ពុជា។
ឯកឧត្តមបន្ថែមថា ៖
«អ្វីដែលរឹតតែពិសេសទៀតនោះ តាមរយៈពន្ធបដិការពីសហរដ្ឋអាម៉េរិក ១៩ភាគរយ ក៏នឹងធ្វើឱ្យវិនិយោគិនដែលជាអ្នកផលិតទំនិញនាំចេញទៅអាម៉េរិក មានការចាប់អារម្មណ៍ និងបណ្ដាក់ទុនវិនិយោគនៅក្នុងប្រទេសកម្ពុជាផងដែរ ហើយរាជរដ្ឋាភិបាលក៏នឹងចរចាជាមួយអាម៉េរិក ដើម្បីសុំចុះបន្ថែមទៀត ជាពិសេសទៅលើប្រភេទមុខទំនិញដែលមានសក្ដានុពលក្នុងការនាំចេញទៅអាម៉េរិក និងជាប្រភេទដែលអាចជួយពលរដ្ឋកម្ពុជាមានប្រាក់ចំណូល»។
ឯកឧត្តមបានបញ្ជាក់ថា ក្រៅពីគម្រោងហេដ្ឋារចនាសម្ព័ន្ធទាំងនេះ កម្ពុជាក៏បាន និងកំពុងអភិវឌ្ឍន៍វិស័យថាមពល ដើម្បីផ្ដល់ជូនអ្នកវិនិយោគ ពីព្រោះវិនិយោគិនបរទេស នឹងរកប្រទេសណាដែលមានថាមពលគ្រប់គ្រាន់ដើម្បីដំណើរវិនិយោគ ។ ក្រៅពីនេះ រាជរដ្ឋាភិបាលក៏បានអភិវឌ្ឍន៍ធនធានមនុស្សសម្រាប់ទ្រទ្រង់ដល់ការវិនិយោគពីខាងក្រៅ និងការវិនិយោគក្នុងប្រទេស ដោយរាជរដ្ឋាភិបាលបានដាក់ចេញនូវផែនការអភិវឌ្ឍន៍ធនធានមនុស្ស ១លាន ៥សែននាក់ តាមរយៈការបណ្ដុះបណ្ដាលជំនាញ (TVET) ។
ឯកឧត្តម ស៊ុន ចាន់ថុល ក៏បានបញ្ជាក់ផងដែរថា គិតត្រឹមថ្ងៃទី២៥ ខែកក្កដា ឆ្នាំ២០២៥ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគសរុបចំនួន ៤២៦គម្រោងហើយ ខណៈក្នុងឆ្នាំ២០២៤ កន្លងទៅ ពេញមួយឆ្នាំ កម្ពុជាទទួលបានគម្រោងវិនិយោគតែ ៤១៤គម្រោងប៉ុណ្ណោះ ដូច្នេះ ទម្រាំដល់ដំណាច់ឆ្នាំ២០២៥ កម្ពុជារំពឹងថា គម្រោងវិនិយោគដែលបានអនុម័តនឹងកើនឡើងលើស ៥០០គម្រោង ហើយអាចបង្កើតការងារជូនប្រជាពលរដ្ឋបានប្រមាណ៣០ម៉ឺនកន្លែង ៕
Account
Security
Favourite Content