ភ្នំពេញ ៖ ក្រសួងរៀបចំដែនដី នគរូបនីយកម្ម និងសំណង់ បានចេញផ្សាយសៀវភៅ«បញ្ជីរាយនាមភូមិសាស្ត្រកម្ពុជា» ដែលបង្ហាញទីតាំងភូមិសាស្ត្រ​នៅគ្រប់​ទីតាំងរាជធានី​ខេត្ត ក្រុង ស្រុក ខណ្ឌ ឃុំ សង្កាត់ និងភូមិ។

ឯកឧត្តម ឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម បានមានប្រសាសន៍ក្នុងនិវេទនកថានៃបញ្ជីរាយនាមភូមិសាស្រ្តថា បញ្ជីរាយនាមភូមិសាស្ត្រកម្ពុជា នឹងក្លាយជាមូលដ្ឋានគ្រឹះ និងជាឯកសារដែលមានការឯកភាពមួយ ដើម្បីប្រើប្រាស់ជា​ប្រយោជន៍​ពហុវិស័យ រួមទាំងវិស័យសេដ្ឋកិច្ច សង្គម វប្បធម៌ និងរដ្ឋបាលជាតិ ពិសេសបម្រើឱ្យការងារចុះបញ្ជីដីធ្លី និងការរៀបចំបែងចែកដីធ្លី។ សមិទ្ធផលនេះ គឺជាឫសរយាង ដែលដុះចេញពីឫសកែវសន្តិភាព ហើយឫស​រយាងនេះនឹងបន្តទ្រទ្រង់ឫសកែវសន្តិភាពបន្តមានអាទិភាពជានិរន្តរ៍។

ឯកឧត្តម ឧបនាយករដ្ឋមន្ត្រីបានលើកឡើងថា ការរៀបចំទឹកដីដ៏បវរក៏បានអភិវឌ្ឍនៅគ្រប់សម័យកាល។ ប៉ុន្តែអ្វីៗទាំងអស់ត្រូវបានបំផ្លាញរាបដល់ដីនាសម័យខ្មែរក្រហម។ ក្រោយឆ្នាំ១៩៧៩ វប្បធម៌និង​អរិយធម៌​ខ្មែរ​បានរស់រានឡើងវិញ ហើយការរៀបចំដែនដី និងការរៀបចំភូមិសាស្ត្រនៃប្រទេសកម្ពុជា​ក៏បានរៀបចំ​ឡើង​វិញ​ជាបណ្តើរៗ ស្របពេលដែលកម្ពុជា ពុះពារប្រឹងប្រែងរកសុខសន្តិភាពផង និងទ្រទ្រង់ជីវភាពប្រជាជនផង ។

ក្រោមម្លប់សុខសន្តិភាព បញ្ជីរាយនាមភូមិសាស្ត្រលើកដំបូងត្រូវបានរៀបចំឡើងនៅឆ្នាំ១៩៩៤ និងត្រូវបានបោះពុម្ពផ្សាយលើកទី១នៅឆ្នាំ២០០៩ និងបោះពុម្ព លើកទី២​នៅឆ្នាំ២០១៩។ ក្នុងដំណាក់កាលជាង៤ទសវត្សរ៍នេះ កម្ពុជាមានការអភិវឌ្ឍយ៉ាងឆាប់រហ័សលើគ្រប់វិស័យ ពិសេសការពង្រឹងបាននូវខឿនការពារជាតិ ខឿនសេដ្ឋកិច្ចជាតិ និងខឿនវប្បធម៌ជាតិ ដែលការណ៍នេះ បានធ្វើឱ្យសេដ្ឋកិច្ច និងសង្គមក៏ដូចជាជីវភាពរស់នៅរបស់ប្រជាជនមានការប្រែប្រួលជាវិជ្ជមាន ហើយបរិបទនៃការរៀបចំដែនដី នគរូបនីយកម្ម ភូមិសាស្ត្ររដ្ឋបាលក៍មានការវិវត្តទៅតាមនោះផងដែរ ដែលតម្រូវឱ្យមាន ការរៀបចំនិងបោះពុម្ពសៀវភៅភូមិសាស្ត្រជាលើកទី៣នៅឆ្នាំ២០២៣នេះឡើង។

នាមភូមិសាស្ត្រដែលបានរៀបចំចងក្រងជាសៀវភៅបញ្ជីរាយនាមភូមិសាស្ត្រនេះ ត្រូវបានរៀបរៀងជាភាសាខ្មែរ និងអមដោយនាមសរសេរជាអក្សរឡាតាំងតាមប្រព័ន្ធ Romanized System for Khmer ដែលបានបង្កើតឡើងសម្រាប់ប្រើប្រាស់នាមទាំងនោះក្នុងការប្រាស្រ័យជាអន្តរជាតិផងដែរ។ ក្នុងស្មារតីនេះ រាជរដ្ឋាភិបាល​បានសម្រេច​បង្កើតគណៈកម្មការជាតិទទួលបន្ទុកតាមភូមិសាស្ត្រ ក្នុងគោលបំណងរៀបចំឱ្យមានជាស្ដង់ដាជាតិមួយ ។

ឯកឧត្តម ឧបនាយករដ្ឋមន្ត្រី សាយ សំអាល់ ក៏បានវាយតម្លៃខ្ពស់ និងសង្ឃឹមយ៉ាងមុតមាំថា គណៈកម្មការនេះនឹងរៀបចំឱ្យមាន ស្តង់ដានាមភូមិសាស្ត្រជាតិរួមមួយក្នុងពេលខាងមុខ ដើម្បីកម្ពុជាមានប្រព័ន្ធសរសេរនាមភូមិសាស្ត្រឯកភាពមួយ ទាំងនាមជាភាសាខ្មែរ និងនាមជាអក្សរឡាតាំង៕ ដោយៈញ៉ែម សុផល