សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
មណ្ឌលគិរី ៖ យោងតាមប្រសាសន៍ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួង រៀបចំដែនដី នគរូបនីយកម្ម និងសំណង់ បានបញ្ជាក់ថា ការងារវាស់វែង និងចុះបញ្ជីដីធ្លីនឹងត្រូវបញ្ចប់ទាំងស្រុងនៅក្នុងអំឡុងមុនបុណ្យចូលឆ្នាំប្រពៃណីខ្មែរខាងមុខ ដោយបច្ចុប្បន្នក្រុមការងារបាន និងកំពុងពន្លឿនសកម្មភាពឈានទៅរកការបញ្ចប់នៅតាមតំបន់មួយចំនួន ។ ដោយឡែក រដ្ឋបាលខេត្តមណ្ឌលគិរី បានប្ដេជ្ញាក្នុងការបញ្ចប់ការវាស់វែង និងចុះបញ្ជីទៅតាមការគ្រោងទុករបស់ក្រសួង ។
ឯកឧត្តម ងិន សុវិមាន អភិបាលរងខេត្តមណ្ឌលគីរី បានមានប្រសាសន៍ថា ការងារចុះបញ្ជីដីធ្លីនៅក្នុងខេត្តមណ្ឌលគិរីនៅសល់តិចតួច ហើយរដ្ឋបាលខេត្តមណ្ឌលគីរីនឹងខិតខំធ្វើយ៉ាងណាឱ្យការងារនេះបានបញ្ចប់រួចរាល់ទៅតាមផែនការរបស់ក្រសួងរៀបចំដែនដី នគរូបណីយកម្ម និងសំណង់ ។
ឯកឧត្តមបន្តថា ៖
«សម្រាប់ដីរបស់ពលរដ្ឋនៅក្នុងខេត្តមណ្ដលគិរី បានបញ្ចប់ការវាស់វែង និងចុះបញ្ជីស្ទើរតែរួចរាល់អស់ទៅហើយ ប៉ុន្តែនៅសេសសល់ដីមួយចំនួនទៀត ដែលកំពុងដោះស្រាយ ដូចជាដីដែលជាកម្មសិទ្ធិរបស់ក្រសួង ស្ថាប័នផ្សេងទៀត ដែលពាក់ព័ន្ធទៅនឹងដីគម្របព្រៃ»។
បើតាមឯកឧត្តមអភិបាលរងខេត្តមណ្ឌលគិរី បានឱ្យដឹងថា បច្ចុប្បន្ននេះ ខេត្តមណ្ឌលគិរីមានការចាប់អារម្មណ៍ពីសំណាក់វិនិយោគិន ទាំងក្នុង និងក្រៅប្រទេស ជាពិសេសគម្រោងវិនិយោគលើវិស័យទេសចរណ៍ និងកសិកម្ម ។ ក្រៅពីនោះក៏មានគម្រោងថាមពលអគ្គិសនីដើរដោយខ្យល់ ដែលក្រុមហ៊ុនបានចុះមកសិក្សា និងរកទីតាំងឃើញហើយ ដោយរង់ចាំតែពេលអនុវត្តន៍ប៉ុណ្ណោះ ។
ឯកឧត្តមបានបន្ថែមថា រដ្ឋបាលខេត្តស្វាគមន៍នូវគម្រោងវិនិយោគនានា ខណៈដែលតម្លៃដីធ្លីនៅក្នុងខេត្តមណ្ឌលគិរីនាពេលបច្ចុប្បន្ននេះក៏នៅមានកម្រិតទាប ដែលអាចជាឱកាសសម្រាប់អ្នកវិនិយោគក្នុងការស្វែងការបណ្ដាក់ទុនវិនិយោគលើគម្រោងណាមួយរបស់ខ្លួនដើម្បីទទួលយកចំណេញ ជាពិសេសវិស័យកសិកម្ម និងទេសចរណ៍ ដែលជាវិស័យមានសក្ដានុពលខ្ពស់នៅក្នុងខេត្តមណ្ឌលគិរី ។
យោងតាមរបាយការណ៍របស់មន្ទីររៀបចំដែនដី នគរូបនីយកម្ម និងសំណង់ និងសុរិយោដី ដែលបានបង្ហាញនៅក្នុងសន្និបាតកាលពីពេលថ្មីៗនេះបានឱ្យដឹងថា មន្ទីរបានអនុវត្តនូវតួនាទីភារកិច្ចរបស់ខ្លួនដោយសម្រេចបានលទ្ធផលគួរជាទីកត់សម្គាល់ ដែលក្នុងនោះតាមរយៈការចុះបញ្ជីមានលក្ខណៈជាប្រព័ន្ធ ខេត្តមណ្ឌលគិរី ជាខេត្តមួយដែលបានប្រកាសតំបន់វិនិច្ឆ័យរួចទាំងស្រុងក្នុងភូមិសរុបទាំង ៩២ភូមិ ២១ ឃុំ/សង្កាត់ ៥ក្រុង/ស្រុក បានចុះបញ្ជី និងចេញបណ្ណសរុបចំនួន ៤០ ៣២៣បណ្ណ ស្មើនឹងទំហំ ៨៩ ៧៧៦ហិកតា និងបានចុះបញ្ជីដីរដ្ឋរួចទំហំ ៣៣១ ៤៣៩ហិកតា ។ ដោយឡែក ចំពោះការចុះបញ្ជីដីសមូហភាព ខេត្តមណ្ឌលគីរី មានសហគមន៏ជនជាតិដើមភាគតិចដែលបានទទួលស្គាល់ជានីតិបុគ្គល សរុបចំនួន ៣៦សហគមន៏ បានដាក់ពាក្យស្នើសុំចុះបញ្ជីចំនួន ២៧សហគមន៏ ដោយក្នុងនោះ ចេញបណ្ណរួច ៧សហគមន៏ និងមានសហគមន៏ដែលកំពុងដំណើរការចុះបញ្ជីចំនួន ១២ ។
គួរបញ្ជាក់ថា ប្រមុខរាជរដ្ឋាភិបាលកម្ពុជាក៏ធ្លាប់បានជំរុញ និងលើកទឹកចិត្តដល់វិនិយោគិនក្នុងស្រុក ឱ្យបណ្ដាក់ទុនវិនិយោគនៅក្នុងខេត្តតាមព្រំដែន ជាពិសេសខេត្តមណ្ឌលគិរី ក្រចេះ ស្ទឹងត្រែង និងខេត្តរតនគិរី ដែលការវិនិយោគនៅក្នុងខេត្តទាំងនេះ នឹងជួយបង្កើនសេដ្ឋកិច្ចនៅខេត្តទាំងនោះ បង្កើតការងារជូនប្រជាពលរដ្ឋនៅនឹងកន្លែង អាចផ្ដល់ប្រាក់ចំណូលជូនពលរដ្ឋក្នុងតំបន់ ដោយមិនចាំបាច់ធ្វើដំណើរចំណាកស្រុកទៅខេត្តផ្សេងដើម្បីរកការងារធ្វើនោះទេ៕
Account
Security
Favourite Content