សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ព្រះសីហនុ ៖ ឆ្នេរព្រែកត្រែង ត្រូវបានអភិវឌ្ឍន៍ទៅជាឆ្នេរខ្សាច់កម្សាន្តសាធារណៈកម្រិតខ្ពស់ និងបានចាប់ផ្ដើមបើកការដ្ឋានសាងសង់នៅព្រឹកថ្ងៃទី១១ ខែមីនា ឆ្នាំ២០២៥ ក្រោមអធិបតីភាព ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណៈកម្មាធិការជាតិគ្រប់គ្រងអភិវឌ្ឍន៍តំបន់ឆ្នេរសមុទ្រកម្ពុជា ។ ការអភិវឌ្ឍឆ្នេរខ្សាច់កម្សាន្តសាធារណៈកម្រិតខ្ពស់ ឆ្នេរព្រែកត្រែងនេះ រំពឹងនឹងអាចស្រូបទាញទេសចរ និងវិនិយោគិនមកកាន់ខេត្តព្រះសីហនុបន្ថែម ។
បើតាមក្រុមការងារផ្សព្វផ្សាយព័ត៌មានរបស់ក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា គម្រោងអភិវឌ្ឍរមណីយដ្ឋានឆ្នេរខ្សាច់កម្សាន្តសាធារណៈកម្រិតខ្ពស់ “ឆ្នេរព្រែកត្រែង” ជាគម្រោងស្តារ និងលើកកម្ពស់សោភ័ណភាពឆ្នេរព្រែកត្រែងដោយរៀបចំកែលម្អ និងការពារឆ្នេរខ្សាច់សរធម្មជាតិប្រណិតកម្រិតខ្ពស់សម្រាប់សាធារណជន និងទេសចរ ,រៀបចំតំបន់សុវត្ថិភាពសម្រាប់លេងទឹកសមុទ្រកម្សាន្ត និងរៀបចំប៉មឆ្មាំសមុទ្រសម្រាប់ការពារសុវត្ថិភាព, រៀបចំសួនច្បារសាធារណៈ ដាំដើមឈើបណ្តាញបៃតង និងកន្លែងពិកនិកកម្សាន្ត នៅលើដីចំណីឆ្នេរសមុទ្រសម្រាប់សាធារណជន និងទេសចរ ។
គម្រោងនេះក៏នឹងត្រូវរៀបចំផ្លូវថ្មើរជើងដោយមានផ្លូវសម្រាប់ជនមានពិការភាពនៅលើដីចំណីឆ្នេរសមុទ្រស្របតាមបណ្តោយឆ្នេរសមុទ្រ ព្រមជាមួយនឹងការរៀបចំកន្លែងអង្គុយលម្ហែ កន្លែងលេងកីឡាដែលមានស្តង់ដាអន្តរជាតិ សម្រាប់សាធារណជន និងទេសចរ។ គម្រោងនេះក៏នឹងមានរៀបចំឱ្យមានបន្ទប់ទឹកសាធារណៈទូទៅ និងបន្ទប់ទឹកសម្រាប់ជនមានពិការភាព, ជួសជុលកែលម្អកញ្ចុះចាស់ៗដែលមានស្រាប់សម្រាប់សាធារណជន និងទេសចរ , រៀបចំដំឡើងឆត្រ ប្រក់ស្បូវសម្រាប់សាធារណជន និងទេសចរ, មានចំណតរថយន្ត និងចំណតយានយន្តសាធារណៈនៅក្នុងតំបន់រណប។
បន្ថែមពីនេះ នៅក្នុងគម្រោងក៏នឹងរៀបចំប្រព័ន្ធលូរំដោះទឹកភ្លៀង ប្រព័ន្ធលូទឹកកខ្វក់ និងប្រព័ន្ធអាងប្រព្រឹត្តិកម្មទឹកកខ្វក់ ស្របតាមបទដ្ឋានបច្ចេកទេសបរិស្ថាន ជាឆ្នេរសមុទ្រដែលស្អាតបំផុតលើសកលលោក រៀបចំប្រព័ន្ធគ្រប់គ្រងសំណល់រឹង និងបន្ទប់ស្តុកសំរាមស្របតាមបទដ្ឋានបច្ចេកទេសបរិស្ថាន ជាឆ្នេរសមុទ្រដែលស្អាតបំផុតលើសកលលោក ។
ក្រោយការសាងសង់រមណីយដ្ឋានឆ្នេរខ្សាច់កម្សាន្តសាធារណៈកម្រិតខ្ពស់ “ឆ្នេរព្រែកត្រែង” នេះរួចរាល់ ខេត្តព្រះសីហនុ នឹងកាន់តែមានភាពទាក់ទាញសំរាប់ភ្ញៀវទេសចរ និងអ្នកវិនិយោគកាន់តែច្រើនបន្ថែមទៀត ។
គួររម្លឹកថា រាជរដ្ឋាភិបាលបាន និងកំពុងរៀបចំអភិវឌ្ឍន៍ខេត្តនៅតំបន់ឆ្នេរ ដើម្បីទាក់ទាញការវិនិយោគ ទេសចរជាតិ និងអន្តរជាតិ មកកម្សាន្ត លម្ហែនៅតំបន់ឆ្នេរកាន់តែច្រើន ក្នុងនោះខេត្តព្រះសីហនុ ក៏ត្រូវបានរាជរដ្ឋាភិបាលកម្ពុជាកំណត់ជាតំបន់សេដ្ឋកិច្ចពិសេសគំរូពហុបំណង និងជាមជ្ឈមណ្ឌលទេសចរណ៍ដ៏ពិសិដ្ឋផងដែរ ដែលអាចទាក់ទាញការវិនិយោគឱ្យបានប្រមាណ២០ពាន់លានដុល្លារអាមេរិកក្នុងរយៈពេល១៥ឆ្នាំ៕
Account
Security
Favourite Content