សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រាជរដ្ឋាភិបាលបានសម្រេចបង្កើតក្រុងថ្មីមួយទៀតនៅក្នុងខេត្តសៀមរាប ដែលមានទីតាំងនៅជិតនឹងព្រលានយន្តហោះអន្តរជាតិសៀមរាបអង្គរ គឺក្រុងរុនតាឯកតេជោសែន។ ការបង្កើតក្រុងថ្មីមួយនេះ នឹងជួយជំរុញសក្ដានុពលតំបន់នៅជុំវិញទីតាំងគម្រោង ក៏ដូចជាតំបន់នៅជិតព្រលានយន្តហោះអន្តរជាតិសៀមរាប-អង្គរឱ្យកាន់តែមានភាពទាក់ទាញបន្ថែមទៀត ។
យោងតាមអនុក្រឹត្យរបស់រាជរដ្ឋាភិបាលបានឱ្យដឹងថា ក្រុងរុនតាឯកតេជោសែន ត្រូវបានបង្កើតឡើងដោយកាត់យកឃុំមួយពីស្រុកបន្ទាយស្រី គឺឃុំរុនតាឯក និងឃុំមួយទៀតពីស្រុកប្រាសាទបាគង គឺឃុំបល្ល័ង្ក ។ ក្រុងនេះមានសង្កាតចំនួនពីរ គឺសង្កាត់រុនតាឯក និងសង្កាត់បល្ល័ង្ក ។
ដោយឡែក តំបន់នៅជុំវិញព្រលានយន្តហោះអន្តរជាតិសៀមរាប-អង្គរ ត្រូវបានរាជរដ្ឋាភិបាលយកចិត្តទុកដាក់ និងជំរុញឱ្យមានការអភិវឌ្ឍបន្ថែម ជាពិសេសអភិឌ្ឍន៍ទៅលើឧស្សាហកម្ម ពាណិជ្ជកម្ម សេវាកម្ម និងកសិកម្ម ដើម្បីបង្កើតឱកាសការងារដល់ប្រជាពលរដ្ឋដែលរស់នៅក្នុងតំបន់ថ្មីដែលរដ្ឋទើបតែបង្កើត ។
អ្នកជំនាញនៃវិស័យអចលនទ្រព្យនៅក្នុងខេត្តសៀមរាប លោក កែវ សុធារ៉ា បានលើកឡើងថា តំបន់ជុំវិញតំបន់ព្រលានយន្តហោះនឹងកាន់តែមានសកម្មភាពមមាញឹកនៅពេលឆាប់ៗនេះ ជាក់ស្ដែងក្រោយពេលព្រលានយន្តហោះចាប់ផ្ដើមដាក់ដំណើរការ ក៏ឃើញមានឈ្មួញស្វែងរកទិញដីដើម្បីត្រៀមអភិវឌ្ឍន៍ ហើយគាប់ជួននឹងរាជរដ្ឋាភិបាលបានប្រកាសពីការអភិវឌ្ឍលើតំបន់ជុំវិញនេះទៀត ដូច្នេះតំបន់នេះនឹងក្លាយជាតំបន់មួយសំខាន់តភ្ជាប់ពីក្រុងសៀមរាបទៅតំបន់ព្រលានយន្តហោះ ។
សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ធ្លាប់បានថ្លែងក្នុងពិធីជួបជុំជាមួយប្រជាពលរដ្ឋរស់នៅតំបន់រុនតាឯក និងពាក់ស្នែង កាលពីពេលថ្មីនេះថា រាជរដ្ឋាភិបាល តាមរយៈស្ថាប័នពាក់ព័ន្ធ និងអាជ្ញាធរមូលដ្ឋាន នឹងជំរុញឱ្យមានការអភិវឌ្ឍន៍នៅក្នុងតំបន់នេះឱ្យក្លាយជាទីក្រុងមួយដែលទាក់ទាញ ជាពិសេសមានការអភិវឌ្ឍលើវិស័យឧស្សាហកម្ម សេវាកម្ម បង្កើតការងារជូនប្រជាពលរដ្ឋ ដោយមិនចាំបាច់ធ្វើដំណើរទៅរកការងារនៅទីក្រុង ឬតំបន់ផ្សេងនោះទេ ។
ជាមួយគ្នានេះ សម្ដេចធិបតីក៏បានជំរុញឱ្យមានការអភិវឌ្ឍន៍ជាបុរីជនបទគំរូមួយនៅក្នុងតំបន់រុនតាឯក និងពាក់ស្នែង និងត្រូវរៀបចំហេដ្ឋារចនាសម្ព័ន្ធ តភ្ជាប់ពីរុនតាឯក និងពាក់ស្នែងទៅកាន់ក្រុងសៀមរាប ហើយក៏បានរៀបចំសេវាកម្មដឹកជញ្ជូនប្រជាពលរដ្ឋពីតំបន់រុនតាឯក និងពាក់ស្នែង ទៅក្រុងសៀមរាប ខេត្តសៀមរាបថែមទៀត។ ដូច្នេះតំបន់នេះវានឹងកាន់តែមានទំនាក់ទំនងជិតស្និទ្ធជាមួយក្រុងសៀមរាបថែមទៀត ។
Account
Security
Favourite Content