បរទេស ៖ បុរសជនជាតិអាម៉េរិកម្នាក់ដែលមានឈ្មោះថា Todd Weaver គឺជាស្ថាបនិកក្រុមហ៊ុនដ៏កម្រមួយនៅក្នុងប្រទេសអាម៉េរិកមានឈ្មោះថា Purism ។ វាជាក្រុមហ៊ុនដែលបង្កើតឡើងក្នងគោលបំណងលើកកម្ពស់ផលិតផលក្នុងស្រុក ជាពិសេសគឺការផលិតស្មាតហ្វូន។

នៅក្នុងអត្ថបទសំភាសជាមួយក្រុមការងារទស្សនាវដ្តី Fortune លោក Todd Weaver បានបង្ហាញនូវសារជាបទពិសោធន៍សំខាន់ៗរបស់ Purism នៅក្នុងកិច្ចខិតខំប្រឹងប្រែងក្នុងសកម្មភាពលើកកម្ពស់ផលិតផលកម្មក្នុងស្រុកជាមួយនឹងស្មាតហ្វូន ជាពិសេសសារមួយចំនួនដើម្បីផ្តាំទៅកាន់ក្រុមហ៊ុនយក្ស Apple ដែលបច្ចុប្បន្នកំពុងជួបបញ្ហាប្រឈមទៅនឹងការដាក់សំពាធពីសំណាក់ប្រធានាធិបតី Donald Trump ដើម្បីងាកមករកផលិតកម្មក្នុងប្រទេសវិញ។

ឃ្លាដំបូងដែលលោក Weaver បាននិយាយទៅកាន់ Future នោះគឺ Don’t listen to the conventional wisdom ឬមានន័យថា «ចូរអ្នកកុំព្យាយាមស្តាប់តែទៅលើមតិ និងការយល់ឃើញជាទូទៅទាំងនោះអី!»។

កន្លងមកអ្នកជំនាញ និងអ្នកវិភាគភាគជាច្រើនតែងតែលើកឡើងថា សង្វាក់ផលិតកម្មសម្រាប់ស្មាតហ្វូន iPhone នៅក្នុងប្រទេសអាម៉េរិកល្អជាងនៅក្នុងតំបន់អាស៊ីគឺជារឿងដែលមិនអាចទៅរួចនោះទេដោយសារការលំបាកទាំងបញ្ហាដឹកជញ្ជូន និងបញ្ហានៃតម្លៃថ្លៃដើម។ យ៉ាងណាក្តី លោក Weaver បានបញ្ជាក់ថា ចំពោះទស្សនៈនេះលោកមិនគាំទ្រជាដាច់ខាត ហើយជឿជាក់ថាក្រុមហ៊ុននានាដែលរៀបចំសង្វាក់ផលិតកម្មក្នុងស្រុកនឹងអាចទទួលបានជោគជ័យក្នុងកម្រិតប្រហាក់ប្រហែលគ្នា ឬអាចនឹងមានតម្លៃខុសគ្នាតិចតួចប៉ុណ្ណោះប្រសិនបើពួកគេហ៊ានចំណាយពេលមួយចំនួនដើម្បីស្វែងរកដំណោះស្រាយបញ្ហាចំពោះមុខក្នុងរយៈពេលប៉ុន្មានឆ្នាំ។

Purism របស់លោក Weaver ប្រើប្រាស់ពាក្យថា Made in America និងពាក្យថា ផលិតផលក្នុងស្រុកគឺជាចំណុចស្លាប់រស់ក្នុងការធ្វើអាជីវកម្ម ។ នេះហើយគឺជាកត្តាដែលធ្វើឲ្យក្រុមហ៊ុនរបស់លោកបានក្លាយទៅជាក្រុមហ៊ុនតែមួយគត់ដែលកំពុងដំណើរការអាជីវកម្មបែបនេះនៅក្នុងប្រទេសដូចសព្វថ្ងៃ។

គួរឲ្យដឹងដែរថា លោកប្រធានាធិបតី Donald Trump ថ្មីៗនេះបានដាក់សំពាធក្នុងការផលិតស្មាតហ្វូននៅក្នុងប្រទេសអាម៉េរិកដែលជាផ្នែកនៃសង្គ្រាមពាណិជ្ជកម្មពិភពលោក។ កាលពីថ្ងៃទី២៣ ខែឧសភា Donald Trump បានប្រើប្រាស់បណ្តាញសង្គម Truth Social ដើម្បីវាយប្រហារជាសាធារណៈទៅលើ Apple ចំពោះការនាំចូល iPhone ទៅកាន់សហរដ្ឋអាម៉េរិក ហើយបន្ទាប់មកបានគំរាមក្រុមហ៊ុនជាមួយនឹងពន្ធ២៥ភាគរយប្រសិនបើក្រុមហ៊ុននៅតែបន្តធ្វើដូច្នេះ។

ជាការពិតណាស់ ក្រុមហ៊ុនរបស់ Weaver មិនអាចប្រៀបធៀបទៅនឹងក្រុមហ៊ុន Apple ទេ ដែលបានលក់ iPhone ច្រើនជាង២ពាន់លានគ្រឿងទូទាំងពិភពលោក ចាប់តាំងពីការដាក់បង្ហាញម៉ូដែលដំបូងក្នុងឆ្នាំ២០០៧ ប៉ុន្តែ ក្រុមហ៊ុន Purism បានលក់ទូរស័ព្ទបានត្រឹមតែខ្ទង់ម៉ឺនគ្រឿងប៉ុណ្ណោះ ចាប់តាំងពីការបង្ហាញខ្លួនម៉ូដែលដំបូងរបស់ខ្លួនក្នុងឆ្នាំ២០១៨ ហើយទើបតែមើលឃើញផលចំណេញរយៈពេល២ឆ្នាំចុងក្រោយនេះ ខណៈដែលកេរ្តិ៍ឈ្មោះក្នុងវិស័យបច្ចេកវិទ្យាក៏មិនសូវល្បីដែរ។

ម៉ូដេល Liberty Phone របស់ខ្លួនដែលផលិតនៅជិតទីក្រុង San Diego ភ្ជាប់មកជាមួយគ្រឿងអេឡិចត្រូនិកដែលផលិតដោយសហរដ្ឋអាម៉េរិក បានដំឡើងនៅលើតួដែកដែលនាំចូលពីប្រទេសចិន។
ម៉ូដេលនេះលក់បានក្នុងតម្លៃ ១៩៩៩ដុល្លារក្នុងមួយគ្រឿង ហើយទូរសព្ទ​មួយម៉ូដេល​មួយទៀតគឺ Librem 5 ភាគច្រើន​មាន​ការ​រចនា​ដូច​គ្នា លើក​លែង​តែ​វា​ត្រូវ​បាន​ផលិត​នៅ​ប្រទេស​ចិន ដោយ​មាន​គ្រឿង​បន្លាស់​ជាផលិតផលរបស់​ចិន លក់បាន​តម្លៃ ៧៩៩ ដុល្លារ។ ក្រៅពីនោះក្រុមហ៊ុនក៏កំពុងផលិតកុំព្យូទ័រ ថេប្លេត និងកុំព្យូទ័រយួរដៃ ផងដែរ៕