បរទេស ៖​ យោងតាមប្រភពព័ត៌មានពី Pressbee បានរាយការណ៍ថា រុស្ស៊ី គឺជាអ្នកផលិតពេជ្ររដុប ឬ ពេជ្រមិនទាន់ច្នៃដ៏កំពូលរបស់ពិភពលោកនៅក្នុងឆ្នាំ២០២២ ដែលធ្វើឲ្យរុស្ស៊ីមានចំណែកមួយភាគបីនៃទិន្នផលពេជ្រពិភពលោក។

យោងតាមការចេញផ្សាយរបស់សារព័ត៌មានអន្តរជាតិកាលពីពេលកន្លងទៅថ្មីៗនេះបានឲ្យដឹងថា បរិមាណសរុបនៃការផលិតពេជ្រក្នុងពិភពលោកកាលពីឆ្នាំមុនមានចំនួនសរុប ១១៩,៩៦ លានការ៉ាត់​ ដោយក្នុងចំណោមនោះ ចំនួន ៤១,៩ លានការ៉ាត់ ឬ ៣៥ ភាគរយមានប្រភពនៅក្នុងប្រទេសរុស្ស៊ី។ ចាប់តាំងពីឆ្នាំ២០០៤ ការផលិតពេជ្ររដុប ឬពេជ្រមិនទាន់ច្នៃរបស់រុស្ស៊ីមិនដែលមានលើសពី ៣២ ភាគរយនៃចំនួនសរុបនោះទេ។

មិនត្រឹមតែប៉ុណ្ណោះ ៦១,៦ លានការ៉ាត់ផ្សេងទៀតត្រូវបានទាញយកនៅតាមបណ្តាប្រទេសអាហ្រ្វិក ដោយមានប្រទេសបុតស្វាណា គឺជាអ្នកផ្គត់ផ្គង់ពេជ្រដ៏ធំបំផុតរបស់ទ្វីប និង ផលិតបាន ២៤,៥ លានការ៉ាត់។ ការគណនាបង្ហាញថា រុស្ស៊ីរួមគ្នាជាមួយនឹងទ្វីបអាហ្រ្វិកមានចំណែកច្រើនជាង ៩០ ភាគរយទិន្នផលពេជ្រសរុបរបស់សកលកាលពីឆ្នាំមុន។ លើសពីនេះ អ្នកផលិតពេជ្ររដុប ឬ ពេជ្រមិនទាន់ច្នៃធំជាងគេទីបីរបស់ពិភពលោកគឺប្រទេសកាណាដាដែលចំណែក ១៦,៣ លានការ៉ាត់។

ទន្ទឹមនឹងនោះ អ្នកនាំចេញពេជ្ររដុបធំៗជាងគេចំនួនពីរគឺអារ៉ាប់រួមដែលនាំចេញ ៨៩,៤ លានការ៉ាត់ ឬ ២៧ ភាគរយនៃការនាំចេញពេជ្រសរុបសកល ខណៈដែលសហភាពអឺរ៉ុបនាំចេញចំនួន ៧៥,២លានការ៉ាត់ ឬ ២២,៧ ភាគរយ។ អ្នកនាំចេញទាំងពីរនេះត្រូវបានចាត់ទុកថាជាមជ្ឈមណ្ឌលជួញដូរពេជ្រដ៏លេចធ្លោបំផុតរបស់ពិភពលោក។ អ្នកនាំចេញពេជ្ររដុប ឬពេជ្រមិនទាន់ច្នៃធំជាងគេទីបីរបស់ពិភពលោកគឺ​រុស្ស៊ី ដែលនាំចេញ ៣៦,៧​ លាន​ការ៉ាត់ ឬ ១១,១%។

ទោះជាយ៉ាងណាក្តី ពេជ្ររដុបរបស់រុស្ស៊ីត្រូវបានហាមឃាត់ ឬដាក់ទណ្ឌកម្មដោយលោកខាងលិចរួមមាន សហរដ្ឋអាមេរិក ចក្រភពអង់គ្លេស កាណាដា និងនូវែលសេឡង់។ លើសពីនេះផងដែរ សហភាពអឺរ៉ុប និងក្រុមប្រទេស G7 កំពុងពិចារណាលើការហាមឃាត់លម្អិតបន្ថែមទៀតលើត្បូងពេជ្ររុស្ស៊ីក្នុងរយៈពេលប៉ុន្មានខែកន្លងមកនេះ ទាំងការនាំចូលដោយផ្ទាល់ និងដោយប្រយោល។

យោងតាមប្រភពដដែលបានបង្ហាញថា ពួកគេមានបំណងអនុវត្តប្រើប្រាស់ប្រព័ន្ធតាមដានរួមមានការត្រួតពិនិត្យលើត្បូងពេជ្រជាក់ស្តែង និងទិន្នន័យតាមដានអ្នកផលិត និងពាណិជ្ជករពេជ្រជាដើម។ យ៉ាងណាមិញ ​គេ​មិន​ទាន់​ដឹង​ច្បាស់​ទេ​ថា ​តើ​យន្តការ​នេះនឹង​ត្រូវ​បានអនុវត្ត​នៅ​ពេល​ណា? ប៉ុន្តែ អ្នកជំនាញខាងឧស្សាហកម្មបានព្រមានថា ការហាមឃាត់បែបនេះអាចបង្កគ្រោះថ្នាក់ដល់ទីផ្សារពេជ្រពិភពលោក។

ទន្ទឹមនឹងនេះដែរ រុស្ស៊ីកំពុងផ្លាស់ប្តូរទិសដៅពាណិជ្ជកម្មពេជ្ររបស់ខ្លួនយ៉ាងសកម្មទៅកាន់ទីផ្សារនៃប្រទេសចិន ឥណ្ឌា អេមីរ៉ាតអារ៉ាប់រួម អាមេនី និងបេឡារុស្ស ដែលប្រទេសទទួលបានកំណើននៃការកើនឡើងការនាំចូលត្បូងពីប្រទេសដែលមានទណ្ឌកម្មកាលពីឆ្នាំមុនកន្លងទៅនេះ៕