បរទេស៖ យោងតាមប្រភពពី Inclusivebusiness.Net បានលើកឡើងថា ការចិញ្ចឹមឃ្មុំបែបជាប្រពៃណីរបស់កសិករ ហ្សំប៊ី គឺពួកគេធ្វើសាងសង់សំបុកឃ្មុំដោយហែកសំបកដើមឈើចេញ។ វិធីនេះធ្លាប់មាននិរន្តរភាព ប៉ុន្តែការកើនឡើងនៃតម្រូវការទឹកនៅឃ្មុំហ្សំប៊ីបានប្រែក្លាយវាទៅជាហានិភ័យសម្រាប់ព្រៃឈើ។

ដើម្បីដោះស្រាយបញ្ហានេះ Nature’s Nectar ធ្វើសំបុកឃ្មុំនៅក្នុងធុងឈើរបស់ប្រទេសកេនយ៉ាដែលធ្វើពីឈើស្រល់មកជំនួសវិញ។ Nature’s Nectar គឺជាក្រុមហ៊ុនទឹកឃ្មុំដែលត្រូវបានបង្កើតឡើងនៅឆ្នាំ២០១៨ នៅប្រទេសហ្សំប៊ី។ ក្នុងគោលបំណងកាត់បន្ថយការកាប់ព្រៃឈើ ក្រុមហ៊ុនរៀបចំសំបុកឃ្មុំបែបទំនើប ដែលផលិតទឹកឃ្មុំគុណភាពខ្ពស់ និងផ្តល់ប្រាក់ចំណូលរយៈពេលវែងដល់កសិករ។ ជាមួយនឹងសំបុកទាំងនោះ ក្រុមហ៊ុនអាចផលិតទឹកឃ្មុំដែលមានគុណភាពល្អជាង ហើយអាចរកប្រាក់ចំណេញបន្ថែមដល់កសិករ ដោយកសិករម្នាក់ៗដែលជាដៃគូទទួលបានសំបុកឃ្មុំចំនួនដប់។ បន្ទាប់​មក Nature’s Nectar ​បណ្ដុះបណ្ដាល​ដល់​កសិកនៅតាមតំបន់រអំពីការព្យួរសំបុក ការសម្អាត និងការប្រមូលផល។ ការបណ្តុះបណ្តាលនេះធានានូវគុណភាពខ្ពស់នៃទឹកឃ្មុំ និងការពារកសិករពីលក់ក្រោមតម្លៃទីផ្សារ។

បច្ចុប្បន្ននេះ Nature’s Nectar គឺជាអ្នកផលិតទឹកឃ្មុំកំពូលសម្រាប់ការនាំចេញមួយដែលភាគច្រើនទៅអាហ្វ្រិកខាងត្បូង។ លើសពីនេះ ពួកគេមានបំណងចង់ចាប់ផ្តើមនាំចេញទៅកាន់សហភាពអឺរ៉ុបផងដែរ ជាមួយនឹងគោលដៅនាំចេញទឹកឃ្មុំប្រហែល ១៦០ ពាន់តោនក្នុងមួយឆ្នាំ។ Nature’s Nectar ទទួលបានផលចំណេញនៅឆ្នាំ ២០១៨ និង ២០១៩ ដោយក្នុងឆ្នាំដំបូង ពួកគេទទួលប្រាក់ចំណូល ១០០ ០០០ ដុល្លារអាម៉េរិក ហើយបានកើនឡើងទ្វេដងក្នុងឆ្នាំ ២០១៩។ យ៉ាងណាមិញ Nature’s Nectar រកចំណូលបានត្រឹមតែ ៤០ ០០០ ដុល្លារប៉ុណ្ណោះនៅឆ្នាំ ២០២០ ដោយសារការរាតត្បាតធ្វើឲ្យដៃគូរបានចាកចេញពីអាជីវកម្មរបស់ពួកគេ។

នៅពេលដែល​ Nature’s Nectar ចាប់ផ្តើមនៅឆ្នាំ ២០១៨ ពួកគេធ្វើការជាមួយកសិករតែ ២០០ នាក់ ជាមួយនឹងសំបុកឃ្មុំចំនួន ២ ០០០ សំបុកប៉ុណ្ណោះ ហើយចំនួនកសិករបានកើនឡើងដល់ចំនួន ៨០០ នាក់នៅឆ្នាំ ២០២១។ កាលពីមុន កសិករ​ទាំងនោះ​រក​ចំណូល​បាន​ចន្លោះ​ពី ២០០ ទៅ ២៥០ ដុល្លារអាម៉េរិកប៉ុណ្ណោះ​ក្នុង​មួយ​ឆ្នាំ ប៉ុន្តែការធ្វើការជាមួយនឹង Nature’s Nectar ពួកគេអាចបង្កើនប្រាក់ចំណូលរបស់ពួកគេពី ២០ ទៅ ៣០ ភាគរយបន្ថែមទៀត។ ការចិញ្ចឹមឃ្មុំមិនមានកម្លាំងពលកម្មច្រើននៅក្នុងគំរូអាជីវកម្មរបស់ Nature’s Nectar នោះទេ ដូច្នេះកសិករមិនចាំបាច់កាត់បន្ថយកម្លាំងពីសកម្មភាពផ្សេងៗទៀតរបស់ពួកគេទេ។ ទន្ទឹមនឹងនេះ Nature’s Nectar ផ្តល់ឱកាសដល់ស្តី្រ ដែលមានចំណែកពាក់កណ្តាលនៃកសិករសរុបរបស់ពួកគេ។ គំរូអាជីវកម្មបរិយាបន្នរបស់ពួកគេមានលក្ខណៈរួមបញ្ចូលច្រើនជាងការចិញ្ចឹមឃ្មុំបែបប្រពៃណីដែលភាគច្រើនគឺជាបុរស ដោយសារស្ត្រីមិនចាំបាច់ឡើងដើមឈើ ឬចំណាយពេលច្រើនថ្ងៃនៅក្នុងចម្ការនោះទេ។ មិនត្រឹមតែប៉ុណ្ណោះ​ សំបុកឃ្មុំត្រូវបានរៀបចំឡើង និងប្រមូលផលដោយមេក្រុមនៃកសិករនៅក្នុងតំបន់។

Nature’s Nectar ប្រើប្រាស់ប្រព័ន្ធតាមដានទិន្នន័យបែបឌីជីថល ដើម្បីធានាបាននូវការតាមដានទឹកឃ្មុំ និងវាស់វែងផលប៉ះពាល់ ដោយសំបុកឃ្មុំនីមួយៗមាន GPS សម្រាប់ទីតាំងរបស់វាជាមួយនឹងឈ្មោះកសិករនៅក្នុងប្រព័ន្ធរបស់ពួកគេ។ Nature’s Nectar ចាប់ផ្តើមធ្វើការជាមួយកសិករដោយការស្ទង់មតិមូលដ្ឋានដ៏សាមញ្ញមួយ ដើម្បីសិក្សាពីទីតាំងរបស់ពួកគេ។ បន្ទាប់​មក Nature’s Nectar ​អាច​តាម​ដាន​ថា​តើ​ទឹកឃ្មុំ​ប៉ុន្មាន​ដែល​អាច​ប្រមូល​បាន​ពី​សំបុក​របស់​វា និង​ចំនួន​ប៉ុន្មាន​ដែល​ក្រុមហ៊ុនត្រូវបង់​ឱ្យកសិករក្នុង​រដូវប្រមូលផល​។ ការវិនិយោគលើសំបុកឃ្មុំពិតជាមានតំលៃថ្លៃ ដោយមួយមានតម្លៃ ២៥ ដុល្លារមិនរាប់បញ្ចូលការដឹកជញ្ជូន ប៉ុន្តែវាបង្កើតផលចំណេញល្អ។ ដើម្បីផ្តល់ហិរញ្ញប្បទានដល់កសិករ Nature’s Nectar ចាប់ដៃគូជាមួយអង្គការអភិរក្ស ដោយពួកគេផ្តល់មូលនិធិដល់សំបុកឃ្មុំ ខណៈដែល Nature’s Nectar មានតួនាទីជាអ្នកធានាទីផ្សារសម្រាប់ទឹកឃ្មុំ។ កសិករត្រូវ​ចំណាយ ១០​ដុល្លារអាម៉េរិក​ដើម្បី​ចូលរួមក្នុង​កម្មវិធីនេះ និង​ទទួល​បាន​សំបុក​ឃ្មុំ​ដប់​ក្បាល។

គោលដៅរបស់ Nature’s Nectar គឺឈានដល់កសិករ ៥ ០០០ នាក់នៅឆ្នាំ ២០២៥ ជាមួយនឹងសំបុកឃ្មុំចំនួន ៥០ ០០០ ដែលអាចផលិតទឹកឃ្មុំបានពី ៤០០ ទៅ ៥០០ តោនក្នុងមួយឆ្នាំ ដែលនឹងនាំមកនូវប្រាក់ចំណូលជាង ២០០ ០០០ ដុល្លារអាម៉េរិកដល់កសិករជាដៃគូ។ គោលបំណងរបស់ Nature’s Nectar គឺការពង្រឹកប្រតិបត្តិការឲ្យកាន់តែរីកធំឡើង ដើម្បីជួយសហគមន៍កាន់តែច្រើនការពារព្រៃឈើ និងបង្កើតប្រាក់ចំណូលរយៈពេលវែង៕