ភ្នំពេញ៖ ការកើនឡើងនូវឧស្សាហូបនីយកម្មក៏ដូចជាការរីកដុះដាលនៃវិស័យអចលនទ្រព្យ និងហេដ្ឋារចនា​​សម្ព័ន្ធនៅកម្ពុជា បានធ្វើឱ្យការប្រើប្រាស់ឧបករណ៍ ជាពិសេសប្រើបច្ចេកវិទ្យាទំនើប ដូចជា ឡចំហាយ, ធុងសម្ពាធ, ជណ្តើរយន្ត, គ្រឿងចក្រលើកស្ទួចទម្ងន់ធ្ងន់ជាដើម មានការកើនឡើងយ៉ាងគំហុក។

ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជាបានថ្លែងដូច្នេះក្នុងពិធីសម្ពោធមជ្ឈមណ្ឌលរបស់ក្រុមហ៊ុន តេ ហ្សង ស៊ីប៉ី បានស៊ី យ៉ានជីវ យ័ន នាព្រឹកថ្ងៃទី៣១ ខែមីនា ឆ្នាំ២០២៥។

ឯកឧត្តមបានលើកឡើងថា៖ក្នុងបរិការណ៍នេះ ការត្រួតពិនិត្យនិងធ្វើតេស្តឧបករណ៍ពិសេសនេះឱ្យបានទៀងទាត់ពិតជាមានសារៈសំខាន់ខ្លាំងណាស់ ជាពិសេសក្នុងការការពារអាយុជីវិតរបស់បងប្អូន ដែលប្រើប្រាស់ឧបករណ៍ទាំងនេះជាប្រចាំ។ មជ្ឈមណ្ឌលត្រួតពិនិត្យឧបករណ៍ពិសេសនេះជាសមិទ្ធផលថ្មីមួយរបស់កម្ពុជា ដោយមជ្ឈមណ្ឌលនេះនឹងក្លាយជាផ្នែកដ៏សំខាន់មួយនៃប្រព័ន្ធអេកូឡូស៊ីរបស់វិស័យឧស្សាហកម្ម អចលនទ្រព្យ និងហេដ្ឋារចនាសម្ព័ន្ធ ក្នុងការធានាបានថាឧបករណ៍ពិសេសដែលត្រូវបានប្រើប្រាស់គឺស្របតាមស្តង់ដារអន្តរជាតិ និងមានសុវត្ថិភាពខ្ពស់។

ឯកឧត្តមអគ្គលេខាធិការបានថ្លែងអំណរគុណចំពោះការសម្រេចចិត្តជាយុទ្ធសាស្ត្រក្នុងការបណ្តាក់ទុនវិនិយោគបង្កើតមជ្ឈមណ្ឌលនេះឡើង ក្នុងគោលបំណងត្រួតពិនិត្យនិងធ្វើតេស្តឧបករណ៍ពិសេសនៅកម្ពុជាចូលរួមចំណែករក្សា និងបង្កើនសុវត្ថិភាពក្នុងការប្រើប្រាស់ឧបករណ៍ពិសេស ដោយនាំយកនូវបច្ចេកវិទ្យាដ៏ជឿនលឿនពីប្រទេសចិនមកអនុវត្តនៅកម្ពុជា។

ឆ្លៀតក្នុងឱកាសនេះ ឯកឧត្តមបានលើកឡើងពីវឌ្ឍនភាពគួរជាទីមោទនៈនៃសកម្មភាពវិនិយោគជារួមនៅកម្ពុជា។ ក្នុងឆ្នាំ២០២៤កន្លងទៅ ក.អ.ក. តាមរយៈគណៈកម្មាធិការវិនិយោគកម្ពុជា(គ.វ.ក.)បានអនុម័ត គម្រោង វិនិយោគទាំងក្នុង និងក្រៅតំបន់សេដ្ឋកិច្ចពិសេសសរុបចំនួន ៤១៤គម្រោង ក្នុងទំហំទុនវិនិយោគសរុបប្រមាណ ៦,៩ប៊ីលានដុល្លារអាម៉េរិក។ បើប្រៀបធៀបនឹងឆ្នាំ២០២៣ ចំនួនគម្រោងវិនិយោគមានការកើនឡើងប្រមាណ៥៤% រីឯទំហំទុនវិនិយោគមានការកើនឡើងប្រមាណ ៤០%។

នេះជាលើកទី១ហើយ ដែល ក.អ.ក. បាន អនុម័តគម្រោងវិនិយោគ រហូតដល់ទៅជាង ៤០០គម្រោង ក្នុងរយៈពេលត្រឹម ១ឆ្នាំ។ ជាមួយគ្នានេះ ក្នុង រយៈពេល២ខែដើមឆ្នាំ២០២៥ ចំនួនគម្រោងវិនិយោគសរុបដែលត្រូវបានអនុម័តមានចំនួន ១១២គម្រោង ជាមួយនឹងទំហំទុនវិនិយោគប្រមាណ ១ប៊ីលានដុល្លារអាម៉េរិក។ ចំនួនគម្រោងវិនិយោគក្នុងរយៈពេល២ខែដើម ឆ្នាំ២០២៥នេះ គឺស្ទើរតែប្រហាក់ប្រហែលទៅនឹងចំនួនគម្រោងវិនិយោគដែល គ.វ.ក. អនុម័តក្នុងរយៈពេល មួយឆ្នាំនៃឆ្នាំ២០២១ គឺប្រមាណ ១៦៩ គម្រោង។

ការកើនឡើងយ៉ាងគំហុកនៃគម្រោងវិនិយោគនេះ មិនត្រឹមតែបង្ហាញពីនិន្នាការតំបន់ និងសកលដែលកំពុង កើតមានឡើងនោះទេ ប៉ុន្តែក៏បង្ហាញពីទំនុកចិត្តរបស់វិនិយោគិនមកលើកម្ពុជា និងជាពិសេសជាលទ្ធផលនៃការ ប្តេជ្ញាចិត្ត របស់រាជរដ្ឋាភិបាល ក្នុងការធ្វើឱ្យប្រសើរឡើងនូវបរិយាកាសធុរកិច្ច និងវិនិយោគនៅកម្ពុជាផងដែរ។

ឯកឧត្តមបានលើកទឹកចិត្តឱ្យក្រុមហ៊ុនវិនិយោគបន្ថែមលើការនាំយកនូវបច្ចេកវិទ្យាចុងក្រោយមកកាន់កម្ពុជា, បណ្តុះបណ្តាល និងបំពាក់បំប៉នជំនាញបច្ចេកទេស ដល់និយោជិតខ្មែរ ព្រមទាំងពិនិត្យលទ្ធភាពក្នុងការពង្រីកការវិនិយោគនៅកម្ពុជាផងដែរ។

ឯកឧត្តម សាត សាមី រដ្ឋលេខាធិការ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានថ្លែងថា ក្រុមហ៊ុន តេ ហ្សង ស៊ីប៉ី ជានស៊ី យ៉ានជីវ យ័ន ក្នុងរយៈពេល១០ឆ្នាំនេះ បានចូលរួមចំណែកយ៉ាងច្រើនក្នុងការវិនិយោគិននៅកម្ពុជា ជាពិសេសក្នុងវិស័យឧស្សាហកម្ម និងបានចូលរួមចំណែកក្នុងការអភិវឌ្ឍន៍បច្ចេកវិទ្យា និងបច្ចេកទេសផ្សេងៗនៅកម្ពុជា។ឯកឧត្តមបានជំរុញឱ្យក្រុមហ៊ុននេះ បន្តសហការក៏ដូចជារៀបចំ បែបបទនិតិវិធី ក្នុងការបណ្តាក់ទុនវិនិយោគបន្ថែមទៀត៕