នៅទីបំផុត ក្រោយការរង់ចាំ និងខិតខំអំពាវនាវអស់រយៈពេលជាច្រើនខែមកហើយនោះ បណ្តាប្រទេសលោកខាងលិចដែលមានរួមទាំងអាមេរិក, អង់គ្លេស, អាល្លឺម៉ង់ និងប៉ូឡូញផងដែរ បានសម្រេចចិត្តក្នុងការផ្គត់ផ្គង់រថក្រោះប្រយុទ្ធជួរមុខទំនើបៗបន្តបន្ទាប់គ្នា និងមានតម្លៃថ្លៃកប់ពពកទៅឲ្យកងកម្លាំងយោធានៃប្រទេសអ៊ុយក្រែន ។

អង់គ្លេសជាប្រទេសដំបូងគេដែលប្រកាសផ្គត់ផ្គង់រថក្រោះប្រភេទ  Challenger 2 ចំនួន១៤គ្រឿង ហើយបន្ទាប់មកគឺអាមេរិកបានសន្យាផ្តល់រថក្រោះជួរមុខ M1 Abram ចំនួន៣១គ្រឿង, អាល្លឺម៉ង់សម្រេចផ្តល់រថក្រោះ Leopard  ចំនួន១៤គ្រឿង និងប៉ូឡូញក្រោយទទួលបានភ្លើងខៀវពីអាល្លឺម៉ងហើយនោះក៏បានសន្យាផ្តល់រថក្រោះប្រភេទ Leopard នេះចំនួន១៤គ្រឿងដូចគ្នាផងដែរ។ សង្គ្រាមនៅអ៊ុយក្រែនឈានចូលមកដល់ការប្រើប្រាស់សព្វាវុធកាន់តែទំនើបៗ ខណៈដែលមានលេចឮដំណឹងបន្ថែមទៀតថា បណ្តាប្រទេសលោកខាងលិចក៏កំពុងពិចារណាទៅលើការផ្គត់ផ្គង់គ្រឿងសព្វាវុធកាន់តែគ្រោះថ្នាក់ថែមទៀតសូម្បីតែយន្តហោះចម្បាំងទៅឲ្យអ៊ុយក្រែន។

តើរថក្រោះទាំងនោះមានបច្ចេកវិទ្យាទំនើបយ៉ាងណា និងតម្លៃថ្លៃកម្រិតណា?

Leopard ជារថក្រោះផលិតនៅអាល្លឺម៉ង់ មានទម្ងន់៥៥តោន អាចមានសមត្ថភាពទាំងការប្រយុទ្ធផង និងការពារផង ហើយអាចសម្របខ្លួនទៅនឹងគ្រប់ប្រភេទសមរភូមិបានយ៉ាងងាយស្រួល។ រថក្រោះប្រភេទនេះអាចមានតម្លៃប្រហែលជាង៥លានផោនក្នុងមួយគ្រឿង និងអាចផ្ទុកអ្នកបើកបរបាន៤នាក់ អាចធ្វើដំណើរបានទៅដល់ ៣៤២ម៉ាលជាមួយនឹងល្បឿន៤៥ម៉ាលក្នុងមួយម៉ោង ឬប្រមាណជា៦៨គីឡូម៉ែត្រក្នុងមួយម៉ោង។

អ្នកវិភាគជាច្រើនបានមើលឃើញថា Leopard មានភាពងាយស្រួលប្រតិបត្តិការជាងរថក្រោះជួរមុខរបស់អាមេរិក M1 Abram ដោយសារតែវាប្រើប្រាស់ថាមពលប្រេងម៉ាស៊ូតមិនដូចជារថក្រោះអាមេរិកប្រើប្រាស់សាំងនោះទេ។ M1 Abram រថក្រោះផលិតនៅអាមេរិកមានតម្លៃប្រមាណជាង ៥លានផោនដូចគ្នាទៅនឹង Leopard ដែរ ដែលក្រៅតែពីអាចបាញ់កាំភ្លើងធំរបស់ខ្លួនបានចំងាយ៤គីឡូម៉ែត្រហើយនោះ រថក្រោះប្រវែង ២៦ហ្វីតនេះ ក៏មានបំពាក់មកជាមួយនូវកាំភ្លើងយន្តចំនួន២ប្រភេទដែលក្នុងមានប្រភេទ 7.62 machine guns ចំនួន២ដើម និងកាំភ្លើងយន្តប្រភេទ 12.7mm ចំនួន១ដើមផ្សេងទៀតផងដែរ។ រថក្រោះអាមេរិកនេះមានទំងន់ដល់ទៅ៧១តោន ហើយផលិតឡើងដំបូងតាំងតែពីឆ្នាំ១៩៩០ អាចធ្វើដំណើរបានចំងាយបានទៅដល់២៦៥ម៉ាលជាមួយនឹងល្បឿនធ្វើដំណើរទៅដល់៤២ម៉ាលក្នុងមួយម៉ោង។

Challenger 2 ជាផលិតរបស់ប្រទេសអង់គ្លេសដែលរដ្ឋាភិបាលក្រុ​ងឡុងបានសន្យាផ្តល់ឲ្យអ៊ុយក្រែនចំនួន១៤គ្រឿងគឺជារថក្រោះដែលមានតម្លៃ៥លានផោនដូចគ្នាដែរហើយវាគឺជារថក្រោះដែលធ្លាប់មានប្រវត្តិបាញ់សត្រូវក្នុងចំងាយឆ្ងាយបំផុតកាលពីពេលដែលវាត្រូវបានប្រើប្រាស់ក្នុងប្រតិបត្តិការសង្គ្រាម Gulf War ដោយគ្រានោះស្ថិតនៅក្នុងចំងាយប្រមាណជា ៣ម៉ាល ឬត្រូវជា ៤,៨គីឡូម៉ែត្រ។ រថក្រោះទំងន់៧៥តោននេះអាចធ្វើដំណើរបានល្បឿនប្រមាណជា ៣៧ម៉ាលក្នុងមួយម៉ោង ឬត្រូវជា៥៩គីឡូម៉ែត្រក្នុងមួយម៉ោង អាចផ្ទុកអ្នកបើកបរចំនួន៤នាក់ និងធ្វើដំណើរបានទៅដល់ចំងាយ ៣៤០ម៉ាលផ្លូវរាប ស្មើនឹង ១៦០ម៉ាលក្នុងស្ថានភាពផ្លូវមិនល្អ។

ក្រៅពីនោះគេក៏នឹងអាចឃើញមានវត្តមានរបស់រថក្រោះដែលផលិតក្នុងប្រទេសបារាំង Leclerc ដែលមានតម្លៃ ១៤លានផោនក្នុងមួយគ្រឿងផង និងរថក្រោះទំនើបរបស់រុស្ស៊ី T-90 ផង ព្រមជាមួយនឹងរថក្រោះសល់ពីសម័យសហភាពសូវៀត T-72 ផងដែរ៕