បរទេស ៖ សកលវិទ្យាល័យជាតិបច្ចេកវិទ្យាការពារជាតិចិន ឬ NUDT (China’s National University of Defense Technology ថ្មីៗនេះបានអភិវឌ្ឍនូវបច្ចេកវិទ្យាដ្រូនដ៏អស្ចារ្យមួយប្រភេទដែលមានទំហំ និងរូបរាងប៉ុនសត្វមូសប៉ុណ្ណោះ ប៉ុន្តែអាចប្រើប្រាស់ក្នុងប្រតិបត្តិការយោធាបានយ៉ាងមានប្រសិទ្ធភាព។

បើទោះបីជាមិនមានព័ត៌មានលំអិតពីបច្ចេកវិទ្យានេះក្តី ប៉ុន្តែគេជឿជាក់ថា ការអភិវឌ្ឍរបស់ NUDT គឺផ្តោតសំខាន់ទៅលើសមត្ថភាពយោធាសំខាន់ៗមួយចំនួនដូចជាមុខងារឈ្លបយកការណ៍ និងឃ្លាំមើលសកម្មភាពនានា ទាំងនៅទីតាំងដែលមិនអំណោយផល និងទីតាំងដែលគ្រោះថ្នាក់ខ្លាំង។

ចំណុចពិសេសដែលធ្វើឲ្យដ្រូនយោធានេះអាចទាក់ទាញអតិថិជនដើម្បីបញ្ជាទិញបាននោះគឺដោយសារតែទំហំដ៏តូចរបស់វាដែលអាចមានភាពងាយស្រួលក្នុងការលាក់ខ្លួនពីសត្រូវ។ ស្លាបទាំងសងខាងរបស់វាមានលក្ខណៈដូចទៅនឹងស្លាបរបស់សត្វមូសពិតៗ និងអាចធ្វើសកម្មភាពដូចទៅនឹងសត្វស្លាបមែនទែន។

ដ្រូននេះ មានបំពាក់មកជាមួយនឹងជើងដ៏តូចស្តើង និងមានរោមផងដែរ ដែលអាចប្រើប្រាស់ជាជើងសម្រាប់បញ្ឈរ និងទប់ខ្លួននៅពេលដែលវាត្រូវចុះចត។ បន្ថែមពីមុខងារសម្រាប់ឃ្លាំមើលហើយនោះ នៅក្នុងប្រតិបត្តិការប្រយុទ្ធនានា ដ្រូននេះអាចប្រើប្រាស់សម្រាប់បេសកកម្មជួយសង្គ្រោះនានា ក៏ដូចជាផ្តល់សញ្ញាសម្រាប់ប្រភេទអាវុធអេឡិចត្រូនិកផងដែរ។

ដ្រូនដែលមានរូបរាងដូចទៅសត្វមូសរបស់ NUDT និងជាប្រភេទដ្រូនខ្នាតតូចនឹងក្លាយទៅជាផ្នែកមួយដ៏សំខាន់នៃរបៀបធ្វើសង្គ្រាមរបស់ពិភពលោកនាពេលអនាគត៖

ដ្រូនប្រភេទតូចបែបនេះ បច្ចុប្បន្នគឺជាឧបករណ៍ដ៏មានតម្លៃសម្រាប់ប្រតិបត្តិការឈ្លបយកការណ៍ និងបេសកកម្មពិសេស។ វាដើរតួនាទីដូចជាយន្តហោះគ្មានមនុស្សបើកដែលមានលក្ខណៈពិសេសរួមបញ្ចូលកម្រិតខ្ពស់នៃប្រព័ន្ធថាមពល ការគ្រប់គ្រងអេឡិចត្រូនិក និងឧបករណ៍ចាប់សញ្ញាទៅក្នុងកញ្ចប់ដ៏តូចស្ទើរតែមិនគួរឱ្យជឿ។

យន្តហោះគ្មានមនុស្សបើកខ្នាតតូចទាំងនេះអាចដំណើរការដោយសំងាត់បំផុត ប៉ុន្តែទោះយ៉ាងណាក៏ដោយ ដោយសារទំហំដ៏តូចរបស់វា បានក្លាយជាបញ្ហាប្រឈមនៅពេលផលិត ពីព្រោះថាវិស្វកម្មនៅក្នុងមាត្រដ្ឋានដ៏តូចបែបនោះមានភាពលំបាកក្នុងការរចនាខ្លាំងណាស់ ជាពិសេសជាមួយនឹងសមាសធាតុដែលកាន់តែតូចជាងខ្លួនរបស់វាទៀតនោះដូចជា ថ្ម ឧបករណ៍ទំនាក់ទំនង និងឧបករណ៍ចាប់សញ្ញា(sensor)ជាដើម។

សម្រាប់នៅពេលអនាគត ដ្រូនខ្នាតតូច ឬមីក្រូដ្រូន នឹងក្លាយទៅជំហានដ៏សំខាន់មួយនៅក្នុងបច្ចេវិទ្យានៃការផលិតរ៉ូបូតយោធាខ្នាតតូច ជាពិសេស សម្រាប់ប្រទេសមហាអំណាច ដូចជា ចិន និងអាម៉េរិកជាដើម។ តាមរយៈការផលិត និងបង្កើតមីក្រូដ្រូននេះ ក៏បានបង្ហាញពីការប្រកួតប្រជែងកាន់តែខ្លាំងក្នុងការប្រណាំងជាសកល ដែលមនុស្សយន្តខ្នាតតូច ឆ្លាតវៃ និងបំបាំងកាយផងដែរ។ វានឹងអាចកំណត់ឡើងវិញពីរបៀបដែលទាហាន និងអ្នកវិទ្យាសាស្ត្រធ្វើសង្គ្រាម ក៏ដូចជារបៀបរស់នៅថ្មីជាមួយពិភពលោក មិនថានៅក្នុងសមរភូមិ ឬការប្រើប្រាស់ប្រចាំថ្ងៃរបស់មនុស្សនោះទេ៕