សិង្ហបុរី អស់រយៈពេលជាច្រើនឆ្នាំមកហើយនៅតែឈរក្នុងតំណែងជាប្រទេសដែលមានបណ្តាញហេដ្ឋារចនាសម្ព័ន្ធដ៏ល្អឯកលើសបណ្តាប្រទេសណាទាំងអស់ ទាំងក្នុងតំបន់ និងពិភពលោកក្តីតាមរយៈការវាស់វែង និងស្រាវជ្រាវជាច្រើនធៀបទៅនឹងប្រទេស និងទីក្រុងកំពូលៗលើលោកជាង២០០។

ការតភ្ជាប់រវាងសិង្ហបុរីទៅកាន់ពិភពលោកបានយ៉ាងមានប្រសិទ្ធភាពខ្លាំង ទាំងផ្លូវអាកាស ផ្លូវទឹក និងសូម្បីតែបណ្តាញហេដ្ឋារចនាសម្ព័ន្ធទំនាក់ទំនងតាមបច្ចេកវិទ្យាអនឡាញ និងការតភ្ជាប់បណ្តាញធ្វើដំណើរដ៏ទំនើបយ៉ាងខ្វាត់ខ្វែងគ្រប់គ្រាន់ទាំងនៅក្នុងស្រុក និងកំពុងផ្តល់បទពិសោធជាច្រើនទៅដល់បណ្តាប្រទេសជាច្រើនទៀតដើម្បីអាចទទួលរៀនយកគំរូនៃការរៀបចំវិស័យដ៏សំខាន់សម្រាប់សេដ្ឋកិច្ចនេះយកទៅប្រើប្រាស់រៀងៗខ្លួន។

ប្រទេសសិង្ហបុរីបានអនុវត្តនូវគោលការណ៍បង្កើនតម្លាភាព និងយុត្តិធម៌នៃលទ្ធកម្មសាធារណៈ ដែលជួយជំរុញសកម្មភាពវិនិយោគនៅក្នុងគម្រោងហេដ្ឋារចនាសម្ព័ន្ធបានទទួលជោគជ័យ និងការគាំទ្របំផុតពីសំណាក់គ្រប់ភាគីពាក់ព័ន្ធ ជាពិសេសពលរដ្ឋរបស់ខ្លួន ហើយក្នុងនោះវាក៏ជាកត្តាសំខាន់មួយផងដែរ ដែលសិង្ហបុរីមានសមត្ថភាពខ្ចីបំណុលក្នុងអត្រាទាបដើម្បីផ្តល់មូលនិធិដល់ការវិនិយោគនានានៅក្នុងវិស័យ។

នៅមានបទពិសោធផ្សេងទៀតដែលសិង្ហបុរីបានអនុវត្តដើម្បីរៀបចំគម្រោង និងការអភិវឌ្ឍវិស័យហេដ្ឋារចនាសម្ព័ន្ធប្រកបដោយគុណភាព និងនិរន្តភាពបំផុតចំពោះសេដ្ឋកិច្ចជាតិ។

សិង្ហបុរី បានកំណត់យកកូនសោរដ៏ចាំបាច់ចំនួន៤មកធ្វើការរួមគ្នាដើម្បីទទួលបានការអភិវឌ្ឍលើវិស័យហេដ្ឋារចនាសម្ព័ន្ធឲ្យបានគ្រប់ជ្រុងជ្រោយ និងជោគជ័យបំផុតដែលរួមមានទាំងភាគីរដ្ឋាភិបាល, ភាគីធនាគារ, ភាគីក្រុមហ៊ុនអ្នកអភិវឌ្ឍ និងភាគីខាងក្រុមហ៊ុនអ្នកផលិតកម្ម។

សិង្ហបុរីជឿជាក់ថា កិច្ចសហប្រតិបត្តិការដ៏ល្អរវាងដៃគូទាំង៤នឹងអាចដោះស្រាយបញ្ហា និងឧបសគ្គសំខាន់ៗទាំងអស់ ជាពិសេសបញ្ហាចំនួន៤ធំៗដែលតែងតែរាំងស្ទះដល់ការអភិវឌ្ឍគម្រោងហេដ្ឋារចនាសម្ព័ន្ធ ក្នុងនោះទី១គឺទំហំ និងពេលវេលាអនុវត្តគម្រោង, ទី២បញ្ហាប៉ះពាល់ដល់ប្រព័ន្ធអេកូឡូស៊ី, ទី៣បញ្ហាខ្វះលទ្ធភាពនៃមូលនិធិអនុវត្តគម្រោងនិងទី៤គឺភាពមិនច្បាស់លាសនៃបទប្បញ្ញត្តិ។

ផែនការអភិវឌ្ឍនគររូបនីយកម្ម (Urban Planning) ដែលជាឧបករណ៍មួយមិនអាចមើលរំលងឡើងក្នុងការគាំទ្រដល់ការអភិវឌ្ឍវិស័យហេដ្ឋារចនាសម្ព័ន្ធ។ សម្រាប់ការរៀបចំដីធ្លីនៅក្នុងប្រទេសសិង្ហបុរីនឹងបែងចែកមុខងារនៃការប្រើប្រាស់ទៅជា៥កម្រិតធំៗ ហើយទាមទារឲ្យមានទំហំស្មើគ្នាឬប្រមាណជា២០ភាគរយដូចគ្នាដែលលក្នុងនោះមានដីធ្លីសម្រាប់លំនៅដ្ឋានដីធ្លីសម្រាប់អគារការិយាល័យ, ដីធ្លីសម្រាប់ហេដ្ឋារចនាសម្ព័ន្ធផ្លូវថ្នល់, ដីធ្លីសម្រាប់ហេដ្ឋារចនាសម្ព័ន្ធសាធារណៈ និងដីធ្លីសម្រាប់សាធារណៈជន។

ខណៈពេលដែលគម្រោងភាគច្រើនតែងតែត្រូវបានអនុវត្តដោយមូលនិធិសាធារណៈក្តី ប៉ុន្តែ សិង្ហបុរីនៅតែបន្តស្វែងរកការចូលរួមពីអ្នកវិនិយោគស្ថាប័នឯកជន ដើម្បីបង្កើនការយល់ដឹងអំពីហេដ្ឋារចនាសម្ព័ន្ធជាក្រុមដើម្បីធ្វើឱ្យវាកាន់តែទាក់ទាញដល់អ្នកវិនិយោគ និងជាផ្នែកមួយជួយជំរុញការអភិវឌ្ឍន៍គម្រោងថ្មីៗ។

គួរឲ្យដឹងដែរថា បច្ចុប្បន្ននេះ សិង្ហបុរីវិនិយោគប្រហែល៥ភាគរយនៃ GDP របស់ខ្លួនលើហេដ្ឋារចនាសម្ព័ន្ធ ស្មើនឹង២០ពាន់លានដុល្លារអាមេរិកគិតនៅក្នុងឆ្នាំ២០១៥ ហើយតួលេខនេះនៅតែបន្តកើនឡើងរហូត។ ជាក់ស្តែងនៅក្នុងឆ្នាំ២០២០សិង្ហបុរីប្រកាសវិនិយោគដល់ទៅ៦ភាគរយនៃ GDP ដែលស្មើនឹង៣០ពាន់លានដុល្លារអាមេរិក ដែលធ្វើឱ្យវិស័យនេះកាន់តែទាក់ទាញសម្រាប់ការវិនិយោគ៕