បរទេស ៖ ជម្លោះដែនទឹកនៅសមុទ្រចិនខាងត្បុងរវាងភាគីហ្វីលីពីន និងប្រទេសចិន ជាញឹកញាប់បានកើតឡើងជាបន្តបន្ទាប់ និងកាន់តែឡើងកំដៅខ្លាំងតាំង ជាពិសេសគឺកាលពីខែមិថុនាកន្លងមកដែលវាបានក្លាយទៅជាក្តីបារម្ភថានឹងអាចបង្កឲ្យការប៉ះទង្គិចគ្នានៃកម្លាំងយោធារវាងភាគីទាំងពីរ និងអាចឈានទៅដល់ការចូលរួមពាក់ព័ន្ធពីសំណាក់សហរដ្ឋអាមេរិកទៀតផង។

រដ្ឋាភិបាលទីក្រុងវ៉ាស៊ិនតោននៅក្នុងជម្លោះនេះតែងតែបានបង្ហាញពីគោលជំហ ហើយថាខ្លួនមានកាតព្វកិច្ចដើម្បីជួយការពារហ្វីលីពីន ឬមានន័យថា ប្រសិនបើយោធាហ្វីលីពីនរងការវាយប្រហារណាមួយនោះអាមេរិកនឹងបញ្ចេញទ័ពជំនួយជាមិនខាន។

យ៉ាងណាក្តី មកដល់សប្តាហ៍នេះ ស្ថានភាពកំដៅដោយយោធាបានធ្លាក់ចុះមកវិញបន្តិចហើយដោយសារតែភាគីចិន និងហ្វីលីពីន បានឈានទៅដល់ការសម្រេចចិត្តរួមគ្នាមួយក្នុងការបង្កើនប្រសិទ្ធភាពនៃទំនាក់ទំនងគ្នាឡើងវិញចំពោះកិច្ចការងារកងទ័ពជើងទឹក។

ប្រទេសចិន និងហ្វីលីពីន បានយល់ព្រមក្នុងការបង្កើតបណ្តាញទូរស័ព្ទក្នុងកម្រិតបន្ទាន់មួយក្នុងគ្រាដែលទំនាក់ទំនងបានធ្លាក់ដល់កម្រិតទាបនាបំផុតនាពេលកន្លងមក ក្នុងគោលបំណងដើម្បីគ្រប់គ្រងជម្លោះឱ្យកាន់តែប្រសើរឡើង ជាពិសេសនៅក្នុងជម្លោះដ៏ខ្លាំងក្លាចំនួន ២ ចុងក្រោយ ដែលក្នុងនោះភាគីហ្វីលីពីនបានចោទប្រកាន់កងកម្លាំងចិនថាបានបង្កើនសកម្មភាពបង្កហេតុកាន់តែខ្លាំងឡើង ហើយចិននិយាយថា កប៉ាល់ហ្វីលីពីនបានរំលោភបំពាន ទោះបីជាមានការព្រមានម្តងហើយម្តងទៀតក៏ដោយ។

ជាលទ្ធផលនៃការធ្វើការឡើងវិញរួមគ្នា កិច្ចព្រមព្រៀងដែលបានចុះហត្ថលេខានាពេលថ្មីៗនេះនឹងបើកឲ្យមានការទំនាក់ទំនងដោយផ្ទាល់រវាងការិយាល័យប្រធានាធិបតីចិន និងហ្វីលីពីន ដើម្បីជួយទប់ស្កាត់ការប្រឈមមុខដាក់គ្នាជាថ្មី និងនៅក្នុងដែនសមុទ្រចិនខាងត្បូងដែលកំពុងមានជម្លោះដ៏ក្តៅគគុកនេះ។

យ៉ាងណាក្តី កាលពីថ្ងៃអង្គារសប្តាហ៍នេះ ឧត្តមសេនីយឯក CQ Brown ដែលជាប្រធានអគ្គសេនាធិការចម្រុះរបស់អាមេរិកបានជួបជាមួយប្រមុខយោធាហ្វីលីពីន ឧត្តមសេនីយ៍ Romeo Brawner នៅទីក្រុងម៉ានីល ដោយបានពិភាក្សាអំពីវិធីដើម្បីបង្កើនទំនាក់ទំនងការពារជាតិ ពង្រឹងសមត្ថភាពយោធាក្នុងប្រតិបត្តិការរួមគ្នា និងធានានូវសមត្ថភាពក្នុងតំបន់។

សូមរំលឹកឡើងវិញក្នុងអំឡុងពេលនៃការប្រឈមមុខដាក់គ្នារវាងកងកម្លាំងចិន និងហ្វីលីពីននៅតំបន់ Second Thomas Shoal ដែលកាន់កាប់ដោយហ្វីលីពីនក្នុងខែសីហា ឆ្នាំ២០២៣ រដ្ឋាភិបាលហ្វីលីពីនបាននិយាយថា ខ្លួនមិនអាចទាក់ទងមន្ត្រីចិនតាមរយៈយន្តការទំនាក់ទំនងដែនសមុទ្របានឡើយក្នុងរយៈពេលជាច្រើនម៉ោង។

បណ្តាញទូរស័ព្ទបន្ទាន់នេះត្រូវបានរៀបចំឡើងបន្ទាប់ពីប្រធានាធិបតីហ្វីលីពីន លោក Ferdinand Marcos Jr. បានជួបជាមួយប្រធានាធិបតីចិន Xi Jinping នៅទីក្រុងប៉េកាំងតាំងពីក្នុងខែមករាឆ្នាំ២០២៣ម្ល៉េះ។

មន្ត្រីចិន និងហ្វីលីពីន ដែលបានបន្តដោះស្រាយជម្លោះដែនទឹកបានជួបពិភាក្សាគ្នានៅទីក្រុងម៉ានីល កាលពីថ្ងៃទី២ ខែកក្កដាកន្លងទៅ ជជែកទៅលើហេតុការណ៍ប្រឈមមុខដាក់គ្នាយ៉ាងហិង្សានៅទីតំបន់ដែនទឹក Second Thomas Shoal កាលពីខែមិថុនាកន្លងទៅ ដែលក្នុងនោះបុគ្គលិកឆ្មាំសមុទ្រចិនបានប្រើប្រាស់កាំបិត និងពូថៅ បង្កឲ្យទាហានជើងទឹកហ្វីលីពីនបានរងរបួសធ្ងន់ធ្ងរ។

ក្រសួងការបរទេសហ្វីលីពីនបានចេញសេចក្តីថ្លែងការណ៍មួយបន្ទាប់ពីកិច្ចពិភាក្សាថា ភាគីទាំងពីរបានទទួលស្គាល់នូវតម្រូវការក្នុងការពង្រឹងយន្តការទំនាក់ទំនងដែនសមុទ្រទ្វេភាគីនៅសមុទ្រចិនខាងត្បូង ហើយបានចុះហត្ថលេខាលើការរៀបចំមួយស្តីពីការកែលម្អយន្តការទំនាក់ទំនងដែនសមុទ្រហ្វីលីពីន-ចិន។

កិច្ចពិភាក្សាតាមបណ្តាញទូរស័ព្ទក្នុងកម្រិតបន្ទាន់នេះក៏នឹងអាចត្រូវបានធ្វើឡើងតាមរយៈក្រសួងការបរទេស និងសមភាគីនៃក្រសួងការបរទេស រួមទាំងនៅរដ្ឋមន្ត្រីការបរទេស និងអនុរដ្ឋមន្ត្រីការបរទេស ឬតាមរយៈតំណាងដែលបានកំណត់របស់ភាគីទាំង ២ ផងដែរ៕