សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បាងកក៖ ក្រុមមន្ត្រីជំនាញនៃប្រទេសថៃកាលពីថ្ងៃពុធសប្តាហ៍នេះបានប្រកាសថា ខ្លួនបានបើកប្រតិបត្តិការបង្ក្រាប និងរឹបអូសបានប្រភេទសំណល់អេឡិចត្រូនិកដែលនាំចូលពីប្រទេសអាមេរិកក្នុងបរិមាណរហូតដល់ទៅ ២៣៨តោន នៅឯផែស្តុកទំនិញនាទីក្រុងបាងកក។ សំណល់ដ៏ច្រើននេះត្រូវបានគេស្តុកនៅក្នុងទូកុងទីន័រប្រមាណជា ១០ និងត្រូវបានគេចាត់ទុកថាជាកាកសំណល់ធំបំផុតមួយដែលថៃបានបង្ក្រាបក្នុងឆ្នាំនេះ។
យោងតាមការបញ្ជាក់ដោយអគ្គនាយកដ្ឋានគយនៃប្រទេសថៃ លោក Theeraj Athanavanich បានឱ្យដឹងថា សំណល់ភាគច្រើនសុទ្ធតែជាកំទេចកំទីលោហៈ និងបំណែកបន្ទះសៀគ្វីតូចៗ។ មន្ត្រីជាន់ខ្ពស់ថៃរូបនេះបានបន្តទៀតថា ថៃបានធ្វើការចោទប្រកាន់ចំពោះកាកសំណល់នាំចូលទាំងនោះទៅលើករណីចំនួន២គឺ ទី១ អំពីការប្រកាសនូវប្រភេទសំណល់មិនត្រឹមត្រូវដោយដើមឡើយថាជាប្រភេទកាកសំណល់ដែលអាចយកមកធ្វើផលិតកម្មឡើងវិញបាន ប៉ុន្តែជាក់ស្តែងសំណល់ទាំងនោះមិនអាចកែច្នៃបានទៅវិញ ហើយមួយទៀតទៅលើករណីនាំចូលសំណល់អេឡិចត្រូនិកខុសច្បាប់។ បន្ថែមពីនោះ ថៃនឹងរៀបចំនូវផែនការបញ្ចូនត្រឡប់ទៅកាន់ប្រទេសដើមវិញនូវកុងទីន័រទាំងអស់នោះផងដែរ។
លោកបញ្ជាក់បែបនេះទៀតថា៖
«វាគឺជាកិច្ចការងារដ៏សំខាន់សម្រាប់ធ្វើចំណាត់ការចំពោះទំនិញប្រភេទនេះ ព្រោះវាអាចផ្តល់ផលប៉ះពាល់ធ្ងន់ធ្ងរទៅដល់បរិស្ថាន និងគ្រោះថ្នាក់ចំពោះសុខភាពរបស់ពលរដ្ឋ ជាពិសេស សហគមន៍ដែលរស់នៅជុំវិញរោងចក្រដែលនឹងទទួលយកទំនិញទាំងនោះមកប្រើប្រាស់»។
គួរឲ្យដឹងដែរថា កាកសំណល់អេឡិចត្រូនិកបង្កគ្រោះថ្នាក់ដល់សុខភាពមនុស្សយ៉ាងធំធេងដោយសារតែសមាសធាតុជាច្រើនផ្ទុកទៅដោយសារធាតុសំណ បារត និងជាតិពុលផ្សេងៗទៀត។ ដោយឡែក ក្រុមហ៊ុនអ្នកកែច្នៃឡើងវិញមានគោលដៅសំខាន់មួយគឺចម្រាញ់យកសារធាតុមាស ប្រាក់ ប៉ាឡាដ្យូម និងទង់ដែង ដែលភាគច្រើនបានមកពីបន្ទះសៀគ្វីទាំងនោះ។ ប៉ុន្តែប្រសិនបើការគ្រប់គ្រងកាកសំណល់ទាំងនោះមានភាពធូររលុង ឬប្រើវិធីដែលមិនមានសុវត្ថិភាពក្នុងការទាញយកលោហៈមានតម្លៃ វានឹងអាចបង្កផលប៉ះពាល់ខ្លាំងចំពោះមជ្ឈដ្ឋានរស់នៅ។
កន្លងមករបាយការណ៍របស់អង្គការសហប្រជាជាតិធ្លាប់បាននិយាយថា កាកសំណល់អេឡិចត្រូនិកកំពុងកើនឡើងយ៉ាងលឿននៅទូទាំងពិភពលោក ដោយនៅឆ្នាំ២០២២ កាកសំណល់អេឡិចត្រូនិកត្រូវបានគេរកឃើញក្នុងចំនួន ៦២លានតោន ព្រមទាំងត្រូវបានគេព្យាករណ៍ថាអាចនឹងបន្តកើនឡើងដល់ ៨២លានតោន នៅត្រឹមឆ្នាំ២០៣០។
របាយការណ៍ដដែលបានព្រមានដែរថា មានតែ២២ភាគរយប៉ុណ្ណោះនៃកាកសំណល់ត្រូវបានប្រមូល និងកែច្នៃឡើងវិញបានត្រឹមត្រូវនៅឆ្នាំ២០២២ ហើយបរិមាណនោះត្រូវបានគេរំពឹងថានឹងធ្លាក់ចុះមកត្រឹម ២០ភាគរយទៅវិញ នៅចុងទសវត្សរ៍នេះ ដោយសារតែការប្រើប្រាស់កាន់តែខ្ពស់ ហើយជម្រើសជួសជុលមានកំណត់ វដ្តជីវិតនៃផលិតផលខ្លីជាងមុន និងហេដ្ឋារចនាសម្ព័ន្ធគ្រប់គ្រងមិនទាន់គ្រប់គ្រាន់នៅឡើយ៕
Account
Security
Favourite Content