បរទេស ៖ បុរសដែលមានកេរ្ត៍ឈ្មោះល្បីល្បាញជាងគេពាក់ព័ន្ធទៅនឹងទ្រព្យសម្បត្តិ និងមានលុយច្រើននៅលើពិភពលោក គឺលោក Warren Buffet បច្ចុប្បន្នត្រូវបានគេដឹងថាទ្រព្យសម្បត្តិរបស់លោកបានកើនឡើងដល់ប្រមាណជា ១៤០ពាន់លានដុល្លារហើយ។ មនុស្សភាគច្រើនបានស្គាល់លោកថាជាមហាសេដ្ឋីពាន់លានដុល្លារ និងជាបុគ្គលដែលមានជំនាញខាងបង្កើតលុយផង បង្កើតអាជីវកម្មផង ជាពិសេសចំពោះការវិនិយោគលើលុយតែម្តង។

មានដំបូន្មានដ៏ច្រើនណាស់ដែលលោក Buffet បានផ្តល់ទៅឲ្យមនុស្សជំនាន់ក្រោយពីរបៀបនៃការបង្កើនទ្រព្យសម្បត្តិដើម្បីក្លាយជាអ្នកមាន ប៉ុន្តែក្នុងពេលថ្មីៗនេះ លោកបានផ្តល់យោបល់បន្ថែមថ្មីមួយទៀតដែលជឿជាក់ថាមនុស្សមួយចំនួននៅមិនទាន់បានស្តាប់ និងជ្រាបនៅឡើយនោះទេ។

លោកបានពន្យល់អំពីរបៀបនៃការវិនិយោគដ៏ត្រឹមត្រូវប្រសិនបើអ្នកជាមនុស្សដែលចង់ក្លាយជាអ្នកមានក្នុងរយៈពេលប៉ុន្មានឆ្នាំក្រោយខាងមុខនេះជាមួយនឹងលុយក្នុងដៃប្រហែលជា១ម៉ឺនដុល្លារប៉ុណ្ណោះ។ លោក Buffet ដែលឆ្នាំនេះមានវ័យ៩៤ឆ្នាំទៅហើយ បានណែនាំឲ្យក្រុមអ្នកដែលមានលុយក្នុងដៃប្រមាណ ១ម៉ឺនដុល្លារ ហើយចងក្លាយជាអ្នកមានច្រើនក្នុងពេលឆាប់ខាងមុខនេះ គប្បីចូលរួមការវិនិយោគទៅលើទីផ្សារភាគហ៊ុន ប៉ុន្តែដោយប្រើប្រាស់បច្ចេកទេសដ៏ឆ្លាតវ៉ៃមួយដែលលោកបានធ្លាប់បានឆ្លងកាត់ និងមានជំនឿភាគរយទទួលបានជោគជ័យខ្ពស់។

ចាប់ផ្តើមដំបូង លោកចង់ឲ្យអ្នកធ្វើការសិក្សា និងរៀនសូត្រទៅលើទីផ្សារភាគហ៊ុនឲ្យបានច្បាស់ជាមុនសិន ហើយទើបចាប់ផ្តើមវិនិយោគវាឲ្យបានត្រឹមត្រូវ ពីព្រោះថាអ្នកនឹងអាចទាញយកអត្ថប្រយោជន៍ដ៏មានសក្តានុពលចេញពីអំណាចនៃអត្រាការប្រាក់។ លោកប្រដូចកម្លាំងនៃអត្រាការប្រាក់ដូចទៅនឹងការបង្កើតដុំទឹកកកមួយចេញពីព្រិល ហើយបង្វិលវាចុះពីទីទួលដែលក្រោយមកវានឹងក្លាយទៅជាដុំទឹកកកដ៏ធំសម្បើម និងមានកម្លាំងខ្លាំង។

ដូចទៅនឹងអ្វីដែលលោកធ្លាប់បានពន្យល់ដូចគ្នានៅឯកិច្ចប្រជុំកំពូលប្រចាំឆ្នាំ ជាមួយនឹងម្ចាស់ភាគហ៊ុននានាមកពីជុំវិញពិភពលោកនៅពេលដែលត្រូវបានគេសួរថា តើពួកគេអាចក្លាយទៅជាមហាសេដ្ឋីលានដុល្លារពាន់ដុល្លារដោយរបៀបណា? លោកតែងតែនិយាយដដែលថា៖ ល្បិចតែមួយគត់គឺការបង្កើតដុំទឹកកកពីព្រិល ហើយបង្វិលវានៅទីតាំងទួលដែលមានចំងាយកាន់តែឆ្ងាយ និងកាន់តែខ្ពស់។ យ៉ាងណាក្តី ចំពោះប្រធានបទថា តើលុយ ១០០០០ដុល្លារអាចឲ្យយើងក្លាយជាសេដ្ឋីដោយរបៀបណានោះ លោក Buffet បានផ្តល់យោបល់ថា ពួកគេគួរតែពិចារណាក្នុងការវិនិយោគទៅលើភាគហ៊ុន ប៉ុន្តែជាមួយនឹងភាគហ៊ុននៃក្រុមហ៊ុនតូចៗជាជាងភាគហ៊ុននៃក្រុមហ៊ុនធំៗ។

ពិភាក្សាទៅលើប្រធានបទនេះ ជាមួយនឹងក្រុមការងាររបស់ CNBC កាលពីពេថ្មីៗនេះ លោក Buffet បានពោលបែបនេះថា៖ ការទិញភាគហ៊ុននៅក្រុមហ៊ុនធំគឺជាការប្រកួតប្រជែងក្នុងកម្រិតខ្ពស់ ខណៈដែលការទិញហ៊ុននៅក្រុមហ៊ុនតូចមានជម្រើសច្រើន និងឳកាសទាញយកចំណេញបានច្រើនជាង។

លោកបានបន្តទៀតថា ប្រសិនបើបច្ចុប្បន្ននេះ លោកជាសិស្សនិស្សិតដែលទើបបញ្ចប់ការសិក្សា នោះលោកនឹងប្រើប្រាស់លុយ១ម៉ឺនដុល្លារនេះទៅវិនិយោគជាមួយនឹងក្រុមហ៊ុនតូចៗ ហើយចាប់ផ្តើមពីឈ្មោះរបស់ក្រុមហ៊ុនថែមទៀតផង។ មានន័យថា ប្រសិនបើក្រុមហ៊ុនចាប់ផ្តើមដោយអក្សរ A ហើយជាក្រុមហ៊ុនតូចនោះវានឹងជាគោលដៅអាទិភាពដំបូងដែលលោកត្រូវតែវិនិយោគ។

ជាចុងក្រោយ បុរសអាមេរិករូបនេះចង់ឲ្យអ្នកត្រៀមខ្លួនឲ្យបានរួចរាល់ផងដែរថា ទីផ្សារហ៊ុនវានឹងអាចធ្លាក់។ ប្រសិនបើវាជាតម្លៃដែលអ្នកអាចទិញបាន និងរង់ចាំបាននោះ វាគឺជារឿងធម្មតា ប៉ុន្តែត្រូវចាំថារក្សាទុកហ៊ុនទាំងនោះឲ្យបានច្រើនឆ្នាំ ចាប់ពី១០ ទៅ ២០ឆ្នាំ នោះផលចំណេញដែលអ្នកនឹងទទួលបានអាចមានចំនួនច្រើនសន្ធឹកសន្ធាប់នឹកស្មានមិនដល់នោះឡើយ៕