សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី Vietnam Plus បានរាយការណ៍ថា ការវិនិយោគផ្ទាល់ពីបរទេសដែលបានចុះបញ្ជីនៅក្នុងប្រទេសវៀតណាមរួមមាន ការវិនិយោគបន្ថែម ការវិនិយោគថ្មី និងការរួមចំណែកដើមទុនតាមរយៈការទិញភាគហ៊ុនជាសរុបឈានដល់ ៣១,៤ ពាន់លានដុល្លារក្នុងរយៈពេល ១១ ខែដំបូងនៃឆ្នាំ២០២៤ ។
យោងតាមទីភ្នាក់ងារវិនិយោគបរទេសរបស់ក្រសួងផែនការ និងវិនិយោគវៀតណាម បានឱ្យដឹងថា ទំហំជិត ១៧,៣៩ ពាន់លានដុល្លារត្រូវបានចាក់ចូលទៅក្នុងគម្រោងថ្មីចំនួន ៣ ០៣៥ គម្រោង ខណៈដែល ទំហំ ៩,៩៣ ពាន់លានដុល្លារត្រូវបានបន្ថែមទៅគម្រោងដែលមានស្រាប់ចំនួន ១ ៣៥០ ហើយទំហំទឹកប្រាក់ ៤,០៦ ពាន់លានដុល្លារទៀតត្រូវបានចំណាយដោយអ្នកវិនិយោគបរទេសដើម្បីទិញភាគហ៊ុន។ ដោយឡែក សម្រាប់តែក្នុងខែវិច្ឆិកា ការវិនិយោគផ្ទាល់ពីបរទេសមានចំនួន ៤,១២ ពាន់លានដុល្លារត្រូវបានចុះបញ្ជី។ ទន្ទឹមនឹងនេះ វិនិយោគិនបរទេសបានវិនិយោគលើវិស័យចំនួន ១៨ ក្នុងចំណោមវិស័យទាំង ២១ នៅក្នុងសេដ្ឋកិច្ចវៀតណាម។ ក្នុងចំណោមវិស័យទាំងនោះ ឧស្សាហកម្មកែច្នៃ និងផលិតកម្មបាននាំមុខគេជាមួយនឹងទុនវិនិយោគសរុបឈានដល់ជិត ២០,២ ពាន់លានដុល្លារអាមេរិក ដែលស្មើនឹងប្រមាណ ៦៤,៤ ភាគរយនៃចំនួនសរុប។ បន្ទាប់មក អាជីវកម្មអចលនទ្រព្យដែលមានដើមទុនសរុបចំនួន ៥,៦៣ ពាន់លានដុល្លារអាមេរិក ឬ ១៧,៩ ភាគរយនៃចំនួនសរុប។
វិនិយោគិនបរទេសកំពូលៗរបស់វៀតណាមរួមមាន៖ សិង្ហបុរី កូរ៉េខាងត្បូង ហុងកុង ជប៉ុន ចិន តួកគី និងតៃវ៉ាន់។ សិង្ហបុរី បាននាំមុខគេក្នុងបញ្ជី ដែលបានវិនិយោគជិត ៩,១៤ ពាន់លានដុល្លារអាមេរិក ស្មើនឹង ២៩,១ ភាគរយនៃចំនួនសរុប កើនឡើង ៥៣,៧ ភាគរយធៀបនឹងឆ្នាំមុន។ បន្ទាប់មក គឺ កូរ៉េខាងត្បូង ជាប់ចំណាត់ថ្នាក់លេខ ២ ដែលមានទឹកប្រាក់វិនិយោគចំនួន ៣,៨៩ ពាន់លានដុល្លារអាមេរិក ស្មើនឹង ១២,៤ ភាគរយនៃចំនួនសរុប ប៉ុន្តែធ្លាក់ចុះ ៩ ភាគរយធៀបនឹងឆ្នាំមុន។
នៅក្នុងឆ្នាំ២០២៤ នេះ ខេត្ត Bac Ninh បាននាំមុខគេក្នុងលក្ខខណ្ឌទុនវិនិយោគពីបរទេសដែលមានទឹកប្រាក់ចំនួន ៥,០៤ ពាន់លានដុល្លារអាមេរិក ឬ ស្មើរនឹង ១៦ ភាគរយនៃចំនួនសរុប ដែលកើនឡើងជាង ៣ ដងធៀបនឹងរយៈពេលដូចគ្នាកាលពីឆ្នាំមុន។ បន្ទាប់មក គឺខេត្ត Quang Ninh មានទុនវិនិយោគពីបរទេសដែលមានទឹកប្រាក់ចំនួន ២,២៩ ពាន់លានដុល្លារអាមេរិក ឬ ស្មើនឹង ៧,៣ ភាគរយនៃចំនួនសរុប។ យ៉ាងណាមិញ បើគិតពីចំនួនគម្រោង ទីក្រុងហូជីមិញ ឈរនៅលំដាប់កំពូលរបស់បញ្ជីវៀតណាម។ លើសពីនេះ កត្តាមួយចំនួនដែលវៀតណាមអាចទាក់ទាញអ្នកវិនិយោគពីបរទេសមានដូចជា៖ ស្ថិរភាពនយោបាយ, វៀតណាមមានកំណើនសេដ្ឋកិច្ចខ្លាំង, តម្លៃពលកម្មទាប, ការកើនឡើងនៃកិច្ចព្រមព្រៀងពាណិជ្ជកម្ម, និងទីតាំងភូមិសាស្ត្ររបស់វៀតណាមនៅជិតខ្សែសង្វាក់ផ្គត់ផ្គង់ពិភពលោក។ មិនត្រឹមតែប៉ុណ្ណោះ វៀតណាម បានផ្តល់ការលើកទឹកចិត្តមួយចំនួនសម្រាប់វិនិយោគិនបរទេស រួមមាន៖ ការលើកលែងពន្ធលើការនាំចូល, ការលើកលែងថ្លៃជួលទីតាំង និងការលើកទឹកចិត្តពិសេស។ ឧស្សាហកម្មវៀតណាមដែលទទួលផលប្រយោជន៍ភាគច្រើនពី FDI រួមមាន៖ ការកែច្នៃ និងការផលិត, អចលនទ្រព្យ, ការបោះដុំ និងរាយ, និងវិទ្យាសាស្ត្រ និងបច្ចេកវិទ្យា៕
Account
Security
Favourite Content