សៀមរាប ៖ ក្រោយការទន្ទឹងរង់ចាំអស់ជាច្រើនខែ ឥឡូវបាវអង្ករកញ្ចប់ថ្មី ដែលរចនាបែបខ្មែររបស់សហគមន៍កសិកម្មទំនើបស្រូវ​នាងអំ បានបញ្ចេញដាក់លក់លើទីផ្សារហើយ ដោយបងប្អូនប្រជាពលរដ្ឋដែលគាំទ្រអង្ករនាងអំ អាចបញ្ជាទិញបានចាប់ពីពេលនេះតទៅ។

ក្នុងឱកាសដាក់លក់អង្ករនាងអំ នៅខេត្តសៀមរាប ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យ ក្រសួងកសិ​កម្ម រុក្ខាប្រមាញ់ និងនេសាទ បានគូសបញ្ជាក់ថា ឥឡូវនេះ សហគមន៍កសិ​កម្មទំនើបស្រូវនាងអំ នៅខេត្តសៀមរាប បានដាក់លក់ស្រូវ​នាងអំដោយផ្ទាល់តែម្ដងដើម្បីឱ្យប្រជាពលរដ្ឋនៅក្នុងតំបន់ងាយស្រួលរកទិញយកទីទទួលទាន។

ឯកឧត្តម ឃឹម ហ្វីណង់ បានបញ្ជាក់ថា ៖

«សហគមន៍កសិកម្មទំនើបនាងអំ បានវិវឌ្ឍន៍ខ្លួនដោយអាចមានលទ្ធភាពឈានទៅដល់ការរៀបចំវេចខ្ចប់បានយ៉ាងស្អាត​ ក្នុងរួបភាពជាកញ្ចប់តូច និងកញ្ចប់ធំ ដើម្បីផ្តល់ជាជម្រើសដល់អ្នកដែលចង់សាក ឬភ្លក្សរសជាតិអង្ករនាងអំ ហើយសម្រាប់អ្នកដែលទិញក្នុងបរិមាណច្រើន ខាងសហគមន៍នឹងមានការជួយដឹកជញ្ជូនដល់លំនៅដ្ឋានតែម្ដង។ អង្ករនាងអំ ដាំដោយកសិករដែលជាសមាជិកសហគមន៍កសិកម្មទំនើបស្រូវនាងអំដោយផ្ទាល់។ កន្លងទៅនេះ យើងធ្លាប់ឃើញសហគមន៍ដែលជាអ្នកធ្វើស្រូវ ផលិតស្រូវ លក់ស្រូវសើម តែឥឡូវ សហគមន៍កសិកម្មទំនើបស្រូវនាងអំ មិនត្រឹមតែផលិតស្រូវទេ ប៉ុន្តែបានក្លាយទៅជាអ្នកផលិតអង្ករ និងលក់ដោយផ្ទាល់តែម្តង។ សូមបងប្អូនប្រជាពលរដ្ឋ កុំភ្លេចចូលរួមគាំទ្រអង្ករក្នុងស្រុករបស់សហគមន៍កសិករយើងទាំងអស់គ្នា»។

អ្នកស្រី ឈិន សុភាសី ហៅស្រី មុំ ប្រធានសហគមន៍កសិកម្មទំនើបស្រូវនាងអំ បានថ្លែងថា ការរង់ចាំអស់ជាច្រើនខែ ឥឡូវបានអង្ករថ្មី ដែលរចនាបែបខ្មែររបស់សហគមន៍ស្រូវនាងអំបានមកដល់ហើយ ហើយសម្រាប់បងប្អូនប្រជាពលរដ្ឋដែលគាំទ្រអង្ករនាងអំ អាចបញ្ជាទិញនៅពេលឥឡូវនេះបាន ពីព្រោះបរិមាណអង្ករមានកំណត់។

អ្នកស្រីបានបញ្ជាក់ថា ៖

«ចាប់ពីថ្ងៃទី៤ ខែមេសា ឆ្នាំ២០២៥ រហូតដល់ចូលឆ្នាំហើយ ​ចាប់ពីម៉ោង១រសៀល ដល់ម៉ោង៨យប់ អង្ករនាងអំរបស់យើងមានលក់នៅផ្សារហេរីថេក វ៉ក ជាន់ផ្ទាល់ដី(ទល់មុខហាងការ៉េមDQ) ជាមួយនឹងសំបកវេចខ្ចប់ថ្មី ដើម្បីលក់ចែកចាយ​ដល់ពុកម៉ែបងប្អូនបានភ្លក្សរសជាតិអង្ករសប្រណិតប្រភេទបាយទន់រ កិនចេញពីពូជស្រូវប្រពៃណី ដែលរួមគ្នាដាំដោយដៃរបស់បងប្អូនកសិករដែលជាសមាជិកសហគមន៍កសិកម្មទំនើបស្រូវនាងអំផ្ទាល់តែម្ដង»។

អ្នកស្រី​​ ប្រធានសហគមន៍កសិកម្មទំនើបស្រូវនាងអំបានបញ្ជាក់ថា​៖ «  ស្រូវនាងអំ លក់ក្នុងទម្ងន់១០គីឡូក្រាម ថ្លៃ ៣៦.០០០រៀល (១០kg ៣៦.000៛)និងទម្ងន់២៥គីឡូក្រាម ថ្លៃ៨៥.០០០រៀល (២៥kg ៨៥.000៛)»។

សូមជម្រាបថា ស្រូវនាងអំ ជាពូជស្រូវប្រវតិ្តសាស្រ្តដែលរកឃើញដោយស្ត្រីចំណាស់ម្នាក់ឈ្មោះ អំ ដោយដាំដុះតាមប្រពៃណីក្នុងរដូវវស្សា និងជាប្រភេទអង្ករសុវតិ្ថភាព បាយទន់រមួតល្មម មានរស់ជាតិផ្អែមស្រាលៗ ទន់ស្ងួត ក្លិនក្រសូប។ សម្រាប់ការដាក់លក់ខាងលើនេះត្រូវបានបែងចែកតម្លៃ និងបរិមាណផ្សេងគ្នា ដូចជា ទម្ងន់១០គីឡូក្រាម ថ្លៃ ៣៦ ០០០រៀល និងទម្ងន់ ២៥គីឡូក្រាម ថ្លៃ ៨៥០០០រៀល ៕