ភ្នំពេញ ៖ ស្របពេលដែលវិស័យសាងសង់សំណង់អគារតូច-ធំបន្តរីកលូតលាស់កាន់តែច្រើន តម្រូវការស្មៅលម្អរសួនច្បារក៍មានកាន់តែច្រើនឡើងៗផងដែរនៅក្នុងទីផ្សារប្រទេសកម្ពុជា ដែលក្នុងនោះមានទាំងនៅក្នុងគម្រោងអភិវឌ្ឍន៍បុរី បណ្តុំលំនៅដ្ឋាន សណ្ឋាគារ ដែលស្ថិតក្នុងវិស័យឯកជន ហើយក៏មានតម្រូវការសម្រាប់សំណង់វិស័យរដ្ឋផងដែរទៅលើការសាងសង់គម្រោងមន្ទីរ និងក្រសួងជាដើម។

លោក ព្រីន ថាន ម្ចាស់កសិដ្ឋានដាំស្មៅពិភពបៃតងធម្មជាតិ ​បានឱ្យដឹងថា​ មុខរបរដាំស្មៅសម្រាប់ដេគ័រលម្អរសួនច្បារ ពិតជាមានតម្រូវការច្រើនឡើងៗពិតមែន ខណៈដែលអាគារបុរី ខុនដូរ ក្រុមហ៊ុន និងអគាររដ្ឋាភិបាលជាដើម មានការរីកដុះដាលគួរឱ្យកត់សម្កាល់នៅក្នុងរយៈពេលប៉ុនានឆ្នាំចុងក្រោយនេះ។

លោកបញ្ជាក់ថា ៖

«មិនថានៅតាមផ្ទះ ឬតាមបូរីទេ សូម្បីមន្ទីរពេទ្យ វត្តអារ៉ាម មន្ទីរពេទ្យ ក៏មានតម្រូវការរៀបចំសួនច្បារ លម្អរក្នុងបរិវេណទីធ្លាដែរ ដើម្បីកែលម្អរលើកសម្រស់សោភ័ណភាព និងបរិយាកាសឱ្យកាន់តែស្រស់ស្អាត និងមានផាសុកភាពសម្រាប់អង្គុយលេង»។

យ៉ាងណាក៍ដោយ នេះមិនមែនជាស្មៅដុះនៅតាមវាលស្រែនោះទេ តែជាពូជស្មៅនាំចូលមកពីប្រទេសជប៉ុន ឬប្រទេសម៉ាឡេស៊ី ដែលគេដាំឡើង ហើយក៏មិនមែនសម្រាប់ធ្វើជាចំណីសត្វគោនោះដែរ តែដាំសម្រាប់តាំងលម្អរនៅតាមសួនច្បារប៉ុណ្ណោះ ដែលក្នុងមួយម៉ែត្រការ៉េ មានតម្លៃចន្លោះពី ១ដុល្លារ ឡើងទៅ អាស្រ័យលើការកម្ម៉ង់តិច ឬច្រើន ការដឹកជញ្ជូនទៅតាមទីតាំងជិត ឬឆ្ងាយប៉ុណ្ណោះ។

ម្ចាស់កសិកដ្ឋានខាងលើឱ្យដឹងបន្ថែមថា ការដាំស្មៅសម្រាប់ដេគ័រសួនច្បារនេះ មានរយៈពេលប្រមាណជាង២០ឆ្នាំមកហើយ ពោលគឺមុខរបរនេះបន្សល់ទុកតាំងពីឪពុកម្តាយជំនាន់មុនៗមកម្ល៉េះ។ សម្រាប់កសិដ្ឋានពិភពស្មៅបៃតងធម្មជាតិ ត្រូវបានដាំដុះនៅក្នុងភូមិអញ្ចើញលើ ឃុំពុកឬស្សី ខេត្តកណ្តាល ដែលដាំដុះលើផ្ទៃដីប្រមាណជា ៤ហិកតា ប៉ុន្តែចំនួននេះមិនអាចផ្គត់ផ្អង់គ្រប់គ្រាន់តាមតម្រូវការរបស់អតិថិជននោះឡើយ ពោលគឺម្ចាស់កសិដ្ឋានខាងលើ បានសហការជាមួយសកសិករចំនួន ២ភូមិ គឺភូមិអញ្ចើញលើ និងភូមិស្វាយអាត់ ធ្វើយ៉ាងណាផ្គត់ផ្គង់ឱ្យគ្រប់គ្រាន់ទៅតាមតម្រូវការរបស់អតិថិជន នៅទូទាំង ២៥ខេត្តក្រុងក្នុងប្រទេសកម្ពុជា។

គួរកត់សម្គាល់ថា ចំពោះការដាំស្មៅជប៉ុន ឬស្មៅម៉ាឡេស៊ី ហាក់មិនមានការលំបាកនោះទេ ដោយគ្រាន់តែទាមទារឱ្យមានការថែមទាំបន្តិចបន្តួចតែប៉ុណ្ណោះ ដោយដំបូងឡើយ អ្នកដាំដុះ គ្រាន់តែរៀបចំភ្ជួរដី ហាលទុកមួយរយៈខ្លី ហើយរាស់ដីឱ្យបានស្មើល្អមុននឹងយកគ្រាប់ពូជទៅសាបព្រោះនៅលើដីនោះ។ ការសាបព្រោះស្មៅ មិនមានអ្វីខុសពីការសាបព្រោះស្រូវនោះឡើយ ពោលគឺមានលក្ខណៈដូចគ្នា រួចហើយគេបូមកទឹកដាក់មួយសប្តាហ៍ ២ ទៅ ៣ ដង អាចដុះលូតលាស់បានហើយ។ ប៉ុន្តែ ទោះជាយ៉ាងណា ក៏ទាមទារឱ្យមានបន្ថែមជីគីមីខ្លះៗ ដើម្បីជួយឱ្យស្មៅដុះល្អ ហើយក្នុងរយៈពេល ២ ទៅ ៣ខែ គេអាចឈូសយកស្មៅទៅដាំនៅតាមសួនច្បារថ្មីបានហើយ៕ វិន ឈុនហ៊ាត