សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ប្រធាននាយកដ្ឋានអភិវឌ្ឍន៍វារីវប្បកម្មនៃរដ្ឋបាលជលផល ក្រសួងកសិកម្ម រុក្ខាប្រមាញ់ និងនេសាទ បានថ្លែងកាលពីពេលថ្មីៗនេះថា បច្ចុប្បន្ន រដ្ឋបាលជលផល បាន និងកំពុងរៀបចំផែនការយុទ្ធសាស្ត្រថ្មីសម្រាប់ឆ្នាំ២០២៥ – ២០៣៤ ដោយសារទទួលស្គាល់ពីតម្រូវការជាក់ស្ដែងក្នុងការអភិវឌ្ឍន៍វិស័យវារីវប្បកម្មឱ្យស្របតាមស្តង់ដារទីផ្សារអន្តរជាតិ ។
លោក ថាយ សុមុនី ប្រធាននាយកដ្ឋានអភិវឌ្ឍន៍វារីវប្បកម្ម នៃរដ្ឋបាលជលផល បានប្រាប់ AMS ថា វិស័យវារីវប្បកម្មមានភាពរីកចម្រើនស្របតាមបរិបទជាតិ និងអន្តរជាតិ។ នៅពេលដែលវិស័យនេះមានភាពរីកចម្រើន វានឹងរួមចំណែកដល់ការបង្កើនប្រាក់ចំណូលរបស់បងប្អូនដែលជាវារីវប្បករ ពាណិជ្ជករ និងសហគ្រិន ព្រមទាំងបង្កើតឱកាសការងារដល់ប្រជាពលរដ្ឋតាមរយៈការមើលថៃទាំង ការកែច្នៃជាផលិតផលសម្រេចសម្រាប់ផ្គត់ផ្គង់ទីផ្សារនៅក្នុងស្រុក ក៏ដូចជាការនាំចេញផលិតផលវារីវប្បកម្មទៅកាន់ទីផ្សារអន្តរជាតិផងដែរ។
លោក ថាយ សុមុនី បានបញ្ជាក់ឱ្យដឹងថា ៖
« បច្ចុប្បន្ននេះ ការអនុវត្តកសិកម្មមានភាពល្អប្រសើរច្រើន ដោយផ្នែកវារីវប្បកម្ម និងការជ្រើសរើសពូជធ្វើឡើងត្រូវតាមស្តង់ដារដូចដែលក្រសួងកសិកម្មបានណែនាំ ខណៈដែលនាយកដ្ឋានក៏បានចុះពិនិត្យ និងសិក្សាពីកន្លែងចិញ្ចឹមមួយចំនួនដើម្បីជំរុញឱ្យមានការរីកលូតលាស់កាន់តែប្រសើរជាងមុន។ វិស័យវារីវប្បកម្ម ជារួម ទទួលបានការគាំទ្រច្រើនពីថ្នាក់ដឹកនាំ រីឯទីកន្លែងភ្ញាស់ពូជ និងការចិញ្ចឹម យើងធ្វើបាន តែនៅមានកម្រិត…ដូច្នេះ ឱ្យតែមានទីផ្សារក្នុងស្រុក និងការប្រកួតប្រជែង យើងអាចធ្វើការនាំចូលពូជមកបន្ថែម គ្រាន់តែថា ពូជនាំចូលត្រូវមានការធានាថាមិនមានជំងឺ»។
ជាមួយគ្នានេះ លោក វណ្ណ ឌៀង ដែលជាម្ចាស់កសិដ្ឋានបង្កាត់ពូជ និងចែកចាយពូជត្រី អ៊ វណ្ណឌៀង មានទីតាំងស្ថិតនៅសង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ បានប្រាប់ AMS ឱ្យដឹងថា ការចិញ្ចឹម និងបង្កាត់ពូជត្រីរបស់លោកអាចផ្គត់ផ្គង់ដល់ប្រជាពលរដ្ឋស្ទើរគ្រប់ខេត្ត / ក្រុង ដូចជា ខេត្តពោធិ៍សាត់ បាត់ដំបង ព្រៃវែងស្វាយរៀង កំពង់ឆ្នាំង កំពង់ចាម ជាដើមដោយយ៉ាងហោចណាស់អាចផលិត និងចែកចាយចាប់ពី ២០គីឡូក្រាម ឬច្រើនបំផុតអាចឈានដល់ ៣០០គីឡូក្រាមក្នុងមួយថ្ងៃ។ ចំណែកកូនត្រី ដែលកសិដ្ឋានបង្កាត់ពូជ មានច្រើនប្រភេទដូចជាត្រីអណ្ដែង ក្រាញ់ ឆ្ពិន ឆ្លាំង ហើយចំពោះត្រី ដែលលក់ដាច់ជាងគេ គឺត្រីអណ្តែង។
លោក វណ្ណ ឌៀង បានបញ្ជាក់ថា ៖
«សម្រាប់ប្រភេទកូនត្រីអណ្តែងគឺលក់ដាច់ជាងគេ ដោយសារតែកសិករ ក៏ដូចជាវារីវប្បករទិញយកទៅចិញ្ចឹមប្រើពេលត្រឹមតែបីខែប៉ុណ្ណោះ គឺអាចចាប់លក់បាន ចំណែកឯត្រីដទៃទៀត ដូចជា ត្រីក្រាញ់ ត្រីឆ្លាំង និងត្រីឆ្ពិន ជាដើមនោះ គេចិញ្ចឹមរហូតដល់ទៅ ៥ ឬ ៦ ខែ ទើបអាចលក់បាន»។
គួរឱ្យដឹងដែរថា អាជីកម្មខាងផលិត ភ្ញាស់ និងចិញ្ចឹមត្រីសាច់របស់កសិដ្ឋាន អ៊ វណ្ណឌៀង ខាងលើនេះ បានដំណើរការប្រមាណ ៣-៤ឆ្នាំមកហើយ ស្របពេលដែលបច្ចុប្បន្ន ទីផ្សារកូនត្រីក្នុងស្រុកកំពុងតែមានតម្រូវការខ្ពស់ រហូតស្ទើរតែមិនអាចឆ្លើយតបបាន៕
Account
Security
Favourite Content