សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ការដាំដំណាំជុំវិញផ្ទះ ជាទម្លាប់ល្អមួយដែលបងប្អូនយើងគួរអនុវត្ត ដោយសារតែវាជាការចំណាយពេលមួយនៅពេលទំនេរមកដាំដុះនូវបន្លែងាយៗ ឆាប់បានផល ហើយថែមទាំងអាចជួយឱ្យមានអារម្មណ៍ល្អ បំបាត់ភាពតានតឹងក្រោយពីបញ្ចប់ការងារប្រចាំថ្ងៃផងដែរ។ ជាក់ស្ដែង អ្នកស្រី កែវ ស្រីម៉ៅ ជាអ្នកដាំបន្លែជុំវិញផ្ទះមួយរូបមានទីលំនៅក្នុងស្រុកត្រាំកក់ ខេត្តតាកែវ បានបង្ហាញពីទស្សនទានផ្ទាល់ខ្លួន និងភាពរីករាយជាមួយការងារក្រៅម៉ោងនៅផ្ទះដោយារដាំដំណាំនៅជុំវិញផ្ទះ។
អ្នកស្រី កែវ ស្រីម៉ៅ បានមានប្រសាសន៍ថា ការដាំដំណាំ បន្លែ បង្ការ នៅជុំវិញផ្ទះ ត្បិតថាមិនមែនជាអាជីវកម្មប្រចាំគ្រួសារ ប៉ុន្តែយ៉ាងហោចណាស់អាចទទួលបានផលពីការដាំដុះសម្រាប់ធ្វើជាម្ហូបអាហារដែលជួយកាត់បន្ថយការចំណាយប្រចាំថ្ងៃ ហើយថែមទាំងអាចធ្វើឱ្យអារម្មណ៍រីករាយសម្បាយចិត្តជាមួយនឹងការរីកដុះដាលនៃដំណាំដែលបានដាំ។
អ្នកស្រីបានបញ្ជាក់ថា ៖
“ខ្ញុំដាំបន្លែតិចតួចនៅជុំវិញផ្ទះ ដោយសារពេលដាំ ក្រោយពីពេលទំនេរពីការងារមកមើលថែវា ធ្វើឱ្យយើងមានអារម្មណ៍ថាសប្បាយចិត្ត ណាមួយពេលបានផលក៏អាចយកបន្លែនេះមកចម្អិនឱ្យកូនៗបានញ៉ាំបន្លែដែលល្អ ធម្មជាតិពិតៗ ជំនួយដល់សុខភាព។”
អ្នកស្រីបន្ថែមថា ៖
“យើងដាំតិចតួចមិនមែនជាដុំកំភួនអ្វីនោះទេ ដែលដាំគ្រាន់លម្អផ្ទះផង ហើយការដាំនេះក៏មិនត្រូវចំណាយពេលច្រើនដែរ ពេលទំនេរពីការងារល្ងាចៗឡើងយើងដាក់ដាំតិចតួច ហើយការមើលថែ គឺគ្រាន់តែស្រោចទឹកព្រឹក-ល្ងាច និងចាប់ដង្កូវចេញខ្លះៗប៉ុណ្ណោះ។”
សម្រាប់អ្នកស្រី ស្រីម៉ៅ កំពុងដាំបន្លែងាយៗរួមមាន ស្ពៃ ស្ពៃក្ដោប ម្រះ ប៉េងប៉ោះ និងដំណាំតូចៗផ្សេងទៀតដូវជា ជី ស្លឹកគ្រៃ ម្ទេស ជាដើម ដោយដាំលើដីចំហៀងផ្ទះទំហំត្រឹមមួយម៉ែត្រជាងដែលអាចទទួលបានផលត្រឹមរយៈពេលខ្លី។ រីឯការចំណាយវិញ អ្នកស្រីមិនបានចំណាយច្រើននោះទេ ពោលគឺគ្រាន់តែចំណាយទៅលើការទិញគ្រាប់ពូជ និងទិញជីកំប៉ុស្តិ៍បន្ថែមតែប៉ុណ្ណោះ ។
ចុងក្រោយ អ្នកស្រី កែវ ស្រីម៉ៅ ក៏បានផ្តាំផ្ញើផងដែរថា សម្រាប់បងប្អូនដែលមានដីទំនេរនៅជុំវិញផ្ទះ ទោះបីទំហំតូចក្ដី ក៏អាចច្នៃដាក់ដាំបន្លែងាយៗបានដែរ ព្រោះវាមិនចំណាយអ្វីច្រើននោះទេ ថែមទាំងផ្ដល់នូវផលចំណេញទាំងទិន្នផលដំណាំធម្មជាតិសម្រាប់ក្រុមគ្រួសារទទួលទាន និងសប្បាយចិត្តពេលឃើញដំណាំលូតលាស់បានល្អនៅជុំវិញផ្ទះ៕
Account
Security
Favourite Content