បរទេស ៖ យោងតាមប្រភពពីបរទេសបានលើកឡើងថា កសិកររបស់ប្រទេសអេក្វាឌ័រ ត្រូវបានជាប់គាំងនៅក្នុងវដ្តនៃភាពក្រីក្រដោយពួកគេប្រឈមនឹងប្រាក់កម្ចីមានអត្រាការប្រាក់ខ្ពស់ កង្វះចំណេះដឹងកសិកម្ម និងទីផ្សារសម្រាប់កសិកម្មតូចចង្អៀត។ ជាលទ្ធផល ទិន្នផលមានកម្រិតទាបធ្វើឲ្យការប្រមូលផលរបស់កសិករទទួលបានតម្លៃទាប និងជាប់បំណុលច្រើនលើសលប់។

Pronaca គឺជាអ្នកផលិតនូវផលិតផលបសុបក្សី និងសាច់ជ្រូក និងជាអ្នកទិញពោតលឿងដ៏ធំជាងគេមួយនៅអេក្វាឌ័រ។ នៅឆ្នាំ២០១៦ ក្រុមហ៊ុននេះបានប្តេជ្ញាចិត្តរួមបញ្ចូលកសិករខ្នាតតូចចំនួន ៥០០ នាក់នៅក្នុងខ្សែសង្វាក់តម្លៃពោតរបស់ពួកគេ ហើយផលិតកម្មរបស់ពួកគេបានកើនឡើងបន្ថែម ៥ ភាគរយ។

លោក Luis V. Bakker នាយកប្រតិបត្តិរបស់ Pronaca បាននិយាយថា នៅពេលដែលពួកគេបានដឹងអំពីបញ្ហាប្រឈមដែលកសិករជួបប្រទះ លោកបានសម្រេចចិត្តថា Pronaca ត្រូវតែផ្លាស់ប្តូរសក្ដានុពលនៃទីផ្សារនេះ។ ឥឡូវនេះ កសិករមើលឃើញថា Pronaca គឺជាដៃគូអាជីវកម្មរបស់ពួកគេ ព្រោះក្រុមហ៊ុននេះបានផ្លាស់ប្តូរជីវិតរបស់មនុស្សជាច្រើនដែលធ្លាប់រស់នៅក្នុងភាពក្រីក្រ និងមានសង្ឃឹមតិចតួចក្នុងការធ្វើឱ្យប្រសើរឡើង។ គម្រោងនេះបានទទួលភាពជោគជ័យ ជំរុញឲ្យ Pronaca អនុវត្តគម្រោងសម្រាប់ផលិតកម្មស្រូវ គោមត្នោត និងផលិតផលបសុបក្សីដោយទទួលបានភាពជោគជ័យដូចគ្នា។

ជាមួយគ្នានេះ ដើម្បីធ្វើឲ្យទីផ្សារនៅអេក្វាឌ័រមានតុល្យភាព Pronaca បានចាប់ផ្តើមដោយការកាត់ផ្តាច់ឈ្មួញកណ្តាល ហើយចាប់ផ្តើមទិញដោយផ្ទាល់ពីកសិករ។ ក្រុមហ៊ុនផ្តល់ជំនួយផ្នែកហិរញ្ញវត្ថុដលកសិករសម្រាប់ទិញគ្រាប់ពូជ ជី និងការផ្គត់ផ្គង់កសិកម្មផ្សេងទៀតដែលមានការបញ្ជាក់ក្នុងតម្លៃសមរម្យ និងផ្តល់ជំនួយបច្ចេកទេសក្នុងការលើកកម្ពស់ផលិតភាពដំណាំប្រកបដោយគុណភាព និងនិរន្តរភាព។ មិនត្រឹមតែប៉ុណ្ណោះ Pronaca ក៏បានធានាផងដែរនូវការទិញពីកសិករផ្ទាល់ ១០០ ភាគរយនៃការប្រមូលផលក្នុងតម្លៃកំណត់ដោយរដ្ឋាភិបាល។ ជាមួយនឹងប្រតិបត្តិការនេះ Pronaca បានបង្កើនផលិតភាពពោតរបស់កសិករបន្ថែម ដែលមានការចូលរួមពីកសិករខ្នាតតូចចំនួន ៥០០ នាក់នៅក្នុងខ្សែសង្វាក់តម្លៃពោតរបស់ខ្លួនជាលើកដំបូង។ កសិករទទួលបានការបណ្តុះបណ្តាលអំពីការធ្វើកសិកម្មប្រកបដោយនិរន្តរភាពរួមមាន ការអនុវត្ត ការគ្រប់គ្រងឧបករណ៍ និងការផ្តល់លទ្ធភាពទទួលបានហិរញ្ញប្បទាន។  Pronaca បានពង្រីកជម្រើសផលិតកម្មរបស់ពួកគេលើសពីពោត ដោយផ្ទេរចំណេះដឹងបច្ចេកទេសដែលត្រូវការបន្ថែមដើម្បីដាំបន្លែ កែលម្អអាហារូបត្ថម្ភ ខណៈពេលដែលបង្កើនប្រាក់ចំណូលផងដែរ។

រហូតមកដល់ពេលនេះ Pronaca គាំទ្រសកម្មភាពកសិកម្មរបស់កសិកររាប់ពាន់នាក់ ហើយបានទិញពោតពីកសិករប្រហែល ៤០ ភាគរយនៃផលិតកម្មពោតសរុបរបស់អេក្វាឌ័រថែមទៀតផង។ លើសពីនេះ Pronaca ធ្វើការរួមគ្នាជាមួយរដ្ឋាភិបាលក្រោមគំនិតផ្តួចផ្តើមហៅថា “កម្មវិធីធុរកិច្ចបរិយាបន្ន” ដែលជាកម្មវិធីដែលគាំទ្រកសិករខ្នាតតូចក្នុងការបង្កើនផលិតភាពដីធ្លីដោយផ្តល់ជំនួយបច្ចេកទេស ហិរញ្ញប្បទានសម្រាប់ការទិញគ្រាប់ពូជ សម្ភារៈឧបករណ៍ និងផ្តល់ឱកាសចូលក្នុងទីផ្សារ។ នៅក្រោមកម្មវិធីនេះ Pronaca ក៏ធានាផងដែរនូវការទិញផលិតផលពីកសិករក្នុងបរិមាណ និងតម្លៃកំណត់តាមរយៈកិច្ចព្រមព្រៀងទិញ។ មិនត្រឹមតែប៉ុណ្ណោះ  Pronaca ក៏បានជួយអភិវឌ្ឍន៍សហគ្រាស​ខ្នាត​តូច​ និង​មធ្យម (MSME) ផងដែរ ដោយក្រុមហ៊ុននេះបានទិញប្រហែល ៣៤០ លានដុល្លារអាមេរិកពីអ្នកផ្គត់ផ្គង់ក្នុងស្រុក ដែលក្នុងនោះជាង ៩០ ភាគរយត្រូវបានចាត់ទុកថាជាសហគ្រាស​ខ្នាត​តូច​ និង​មធ្យម (MSME)។ លើសពីនេះ Pronaca ផ្គត់ផ្គង់អ្នកលក់រាយតូចៗជាង ៦៥ ០០០ នៅទូទាំងប្រទេសជាមួយនឹងផលិតផលរបស់ខ្លួន ដែលជាការគាំទ្រដល់ខ្សែសង្វាក់ផ្គត់ផ្គង់ដ៏ធំ​មួយ ហើយភាគច្រើនគឺជាសហគ្រាសធុនតូច និងមធ្យម។ តាមរយៈអ្នកចែកចាយផ្តាច់មុខចំនួន ៤៣ កន្លែង Pronaca បម្រើអតិថិជនជាង ៧៥ ០០០ នាក់នៅទូទាំងប្រទេសដោយផ្ទាល់ និងដោយប្រយោល។

គួរឲ្យបញ្ជាក់ផងដែរថា Pronaca មានចំណែកសំខាន់មួយនៅក្នុងវិស័យកសិកម្មរបស់ប្រទេសអេក្វាឌ័រ ហើយវាគឺជាសាជីវកម្មធំជាងគេទី ៤ របស់អេក្វាឌ័រ ដែលគ្រប់គ្រងកន្លែងចិញ្ចឹមជ្រូក និងបសុបក្សីសម្រាប់យកសាច់ជាង ១១៥ នៅទូទាំងប្រទេស។ ទន្ទឹមនឹងនេះ ការអនុវត្តអាជីវកម្មបរិយាបន្នរបស់ Pronaca កំពុងជួយកសិករឲ្យរួចផុតពីជីវភាពក្រីក្រ បង្កើនផលិតភាព និងជួយពួកគេរកចំណូលបានសមរម្យ៕