ស្រលិត ឬគេចំណាំហៅថា ឡៃហៀង ជារុក្ខជាតិវល្លិ៍មួយប្រភេទដែលគេនិយមដាំទាំងសម្រាប់លម្អ និងអាចទទួលទានផ្ការបស់វា​ ដែលគេអាចយកទៅច្នៃជាម្ហូបបានច្រើនមុខ និងមានឱជារសឈ្ងុយឆ្ងាញ់។ មិនត្រឹមតែប៉ុណ្ណោះ ស្រលិត ក៏ជាដំណាំដែលងាយស្រួលដាំ មិនពិបាកថែទាំ និងអាចទទួលបានទិន្នផលរយៈពេលយូរ។

ផ្កាស្រលិត ជាផ្កាដែលគេអាចដាំលម្អក៏បាន ព្រោះវាមានភាពស្រស់ស្អាត ហើយផ្ការបស់វាក៏អាចយកទៅចម្អិនធ្វើជា​ម្ហូបបានច្រើនមុខ មិនថា ស្ងោរ ឆា និងចៀនជាមួយស៊ុតក៏បាន។ មិនត្រឹមតែមានប្រយោជន៍ច្រើនប៉ុណ្ណោះទេ ផ្កាស្រលិត គឺជារុក្ខជាតិដែលងាយស្រួលដាំ និងត្រូវការយៈពេលដាំត្រឹមតែប្រមាណ ៣០ថ្ងៃប៉ុណ្ណោះ និងអាចប្រមូលផលរហូតដល់ទៅ ៥ឆ្នាំ។   

គេអាចដាំស្រលិតតាមរយៈការបំបៅមែក ឬទិញកូនដំណាំពីសួននានា ហើយក្នុងករណីដាំតាមរយៈកាត់យកមែក គេអាចយកមែកមកបណ្ដុះដោយរើសយកមកមែកណាដែលល្អ មិនចាស់ពេក មិនខ្ចីពេក ប្រវែងប្រមាណ ៣-៥សង់ទីម៉ែត្រ ដាក់បណ្ដុះក្នុងថង់បណ្ដុះ រយៈពេលត្រឹម ១៥ថ្ងៃវាក៏ចាប់ផ្ដើមដុះឫស និងទុក ១សប្ដាហ៍ក្រោយទើបអាចយកទៅដាំបាន។  

ចំពោះការរៀបចំដី ក្នុងករណីកសិករដាំលក្ខណៈអាជីវកម្ម គេត្រូវព្យួរសម្អាតដី និងលើករងសម្រាប់ដាំ តែបើស្ថានភាពដីមិនសូវល្អ គេក៏អាចជីកជារណ្ដៅដើម្បីដាំក៏បាន។ ការជីករណ្ដៅដាំនេះ គេអាចជីកជម្រៅប្រមាណ ៣០-៥០សង់ទីម៉ែត្រ ដោយបន្ថែមជីលាមកសត្វ និងជីផ្សេងទៀតដើម្បីជំនួយឫសដំណាំ។ បន្ទាប់ពីដាំបាន ១៥-៣០ថ្ងៃ អ្នកដាំគួរធ្វើទ្រើង ឬបង្គោលសំណាញ់ដើម្បីឱ្យស្រលិតតោងឡើង តែមិនត្រូវដាក់បង្គោលជិតៗគ្នាពេកនោះទេ ព្រោះដំណាំត្រូវការរងងាយលូតលាស់ ស្រូបយកពន្លឺបានគ្រប់គ្រាន់ ចេញផ្កាល្អ និងងាយស្រួលប្រមូលផលផ្កា។

​ពាក់ព័ន្ធនឹងការថែទាំស្រលិត ក្នុងករណីគេដាំជាលក្ខណៈគ្រួសារទុកគ្រាន់សម្រាប់ហូប គេមិនបាច់មើលថែខ្លាំងក៏បាន ប៉ុន្តែក្នុងលក្ខណៈអាជីវកម្ម អ្នកដាំស្រលិតត្រូវប្រើប្រាស់ជីទឹក ឬជីកំប៉ុស្ត និងជីលាមកសត្វ ២សប្ដាហ៍ម្ដង ដើម្បីបំប៉នដំណាំឱ្យលូតលាស់បានល្អ។ ក្រៅពីនេះ ដើម្បីជំរុញឱ្យស្រលិតចេញផ្កាល្អ និងមានទម្ងន់ធ្ងន់ គេត្រូវការផ្គត់ផ្គង់ទឹកឱ្យបានគ្រប់គ្រាន់ ហើយការតាក់តែងមែកក៏ជារឿងសំខាន់ដែរ ដោយសារនៅពេលយើងប្រមូផលផ្កាហើយ ការកាត់មែកចាស់ចោលធ្វើឱ្យស្រលិតពន្លកថ្មី និងឆាប់ចេញផ្កាជាបន្តបន្ទាប់។

ប្រសិនបើមានសត្វល្អិតបំផ្លាញ កសិករក៏អាចលាយជី រូបមន្ត ១៥:១៥ ឆ្លាស់គ្នាជាមួយជីរូបមន្ត ២៥ : ៧ : ៧ ដើម្បីលាយបាញ់ក្នុងរយៈពេល ២សប្ដាហ៍ម្ដងដែរ។ ត្បិតថា យើងអាចប្រមូលផលស្រលិតបានច្រើនក៏ពិតមែន តែកំឡុងពេលរដូវរងារចន្លោះពីខែ តុលា ដល់ខែវិច្ឆិកា ស្រលិតមិនសូវចេញផ្កាល្អនោះទេ ដែលជាពេលមួយកសិករអាចឆ្លៀតតាក់តែងមែក និងថែទាំដើមឱ្យបានល្អ ត្រៀមចេញផ្កានៅខែបន្ទាប់ ហើយការកាត់មែកចាស់ៗចោលនេះ ក្នុងរយៈពេលត្រឹម ២-៣សប្ដាហ៍ ពន្លកថ្មីៗនឹងដុះចេញមកផងដែរ។ គួរបញ្ជាក់ដែរថា ស្រលិតជាដំណាំត្រូវការរយៈពេលដាំត្រឹម ៣០ថ្ងៃ វានឹងចេញផ្កា តែការឱ្យផលដំបូងៗគឺមិនសូវបានផ្កាល្អនោះទេ លុះដល់រយៈពេលដែលវាចេញផ្កាល្អបំផុត គឺកំឡុងពេល ៨-១០ខែបន្ទាប់ ហើយវាចេញផ្កាច្រើននៅចន្លោះខែឧសភា ដល់ខែកក្កដា៕