សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
របរលក់បាយឆា ត្បិតស្ដាប់ទៅជាមុខរបរតូចតាច តែក៏ជាការងារមួយសុចរិត មិនប៉ះពាល់ដល់អ្នកដទៃ មិនខុសច្បាប់ ប៉ុន្តែអាចរកចំណូលចិញ្ចឹមគ្រួសារបានសមរម្យ ដោយមិនចាំបាច់ធ្វើចំណាកស្រុកទៅរកការងារធ្វើនៅក្រៅប្រទេសឆ្ងាយពីគ្រួសារនោះឡើយ។
បើគេជិះតាមផ្លូវចុះពីស្តុបវិទ្យាស្ថានបរទេស ឬ ស្តុប IFL ប្រមាណ ៥០ម៉ែត្រ ងាកនៅខាងស្ដាំដៃបន្តិចនោះគេនឹងឃើញតូបបាយឆាមួយ មានដាក់តុតម្រៀបគ្នាយ៉ាងមានសណ្ដាប់ធ្នាប់ ដែលជាតូបលក់បាយឆា មីឆារបស់អតីតចុងភៅនៅប្រទេសថៃម្នាក់ កំពុងមមាញឹកឆាយបាយជូនអតិថិជនរបស់ខ្លួន ទាំងអ្នកដែលអង្គុយរង់ចាំទទួលទាននៅនឹងកន្លែង និងអ្នកទិញខ្ចប់យកទៅទទួលទាននៅខាងក្រៅ។
លោក កែវ សុណ្ណារឹទ្ធ ជាអតីតចុងភៅនៅអាហារដ្ឋានមួយកន្លែងក្នុងទឹកដីប្រទេសថៃដែលមានបទពិសោធន៍ជាង១០ឆ្នាំ ហើយក៏ជាម្ចាស់តូបលក់បាយឆា មីឆានៅម្ដុំវិទ្យាស្ថាន IFL បានប្រាប់ AMS ឱ្យដឹងថា ការបើកអាជីវកម្មមិនថាតូច ឬធំទេ នៅក្នុងប្រទេសគឺងាយស្រួលជាងធ្វើការនៅក្រៅប្រទេស ព្រោះអាចគ្រប់គ្រងអាជីវកម្មដោយខ្លួនឯងបាន បើចង់លក់ក៏លក់ ពេលហត់អាចសម្រាកបាន ដែលមិនដូចធ្វើការឱ្យគេនោះទេ។
លោកពោលថា ៖
« នៅខ្មែរគឺស្រួលជាង យើងឯករាជ្យ មិនបាច់ធ្វើការឱ្យគេពិបាកឈប់ ការលក់ដូរ ឬរកស៊ីដោយខ្លួនឯងនេះគឺចង់លក់ក៏បាន មិនចង់លក់ក៏បាន ណាមួយខ្លួនកាន់តែមានអាយុច្រើនហើយ មិនចង់នៅធ្វើការស្រុកគេទៀតទេ មកបើករកស៊ីនៅស្រុកខ្មែរក៏អាចរកបានពី ៣០-៤០ម៉ឺនរៀលក្នុងមួយថ្ងៃដែរ»។
លោកបន្តថា ពីមុនធ្លាប់ធ្វើជាមេចុងភៅនៅភោជនីយដ្ឋានមួយកន្លែងក្នុងទឹកដីប្រទេសថៃ ហើយចេះធ្វើម្ហូបច្រើនមុខ មិនថាម្ហូបថៃ ជប៉ុន ឬអឺរ៉ុបនោះទេ តែមកខ្មែរនេះពិបាកលក់ម្ហូបបន្តិច ព្រោះម្ហូបថៃហឹរពេក ក៏សម្រេចចិត្តលក់បាយឆា និងមីឆាតែម្ដងទៅ។
លោកបញ្ជាក់ថា ៖
«នៅកន្លែងខ្ញុំមានលក់បាយឆាម្រះព្រៅ បាយឆាបន្លែ មីឆា ដែលមានតម្លៃចាប់ពី ៧០០០រៀលឡើងទៅ អាស្រ័យទៅតាមប្រភេទមី និងសាច់ ដូចជាសាច់គោ ពងទា និងគ្រឿងសមុទ្រជាដើម។ សម្រាប់ពេលបើកលក់អាជីវកម្មនេះ យើងបើកលក់ចាប់ពីម៉ោង ៧ព្រឹក ដល់រសៀលត្រឹមម៉ោង ២ គឺលលក់រហូតដល់អស់បាយ»។ នេះជាអ្វីដែលលោកបានលើកឡើង។
ចំពោះអាហារដែលគេពេញនិយមជាងគឺបាយឆាម្រះព្រៅ និងបាយផាត់កាផៅ ដែលមានរសជាតិឆ្ងាញ់ប្លែកបែបម្ហូបថៃផងដែរ ហើយអតិថិជនភាគច្រើនជាសិស្សនិស្សិត គ្រូបង្រៀន និងអ្នកធ្វើការនៅម្ដុំៗនេះស្រាប់ ដែលនិយមមកអង្គុយទទួលទានបាយថ្ងៃត្រង់នៅជិតៗសាលា ឬកន្លែងធ្វើការ។
យ៉ាងណាមិញ លោកក៏ត្រូវចំណាយលើការជួលទីតាំង ៧០ដុល្លារ និងថ្លៃទឹកប្រើប្រាស់ ១០ដុល្លារប្រចាំខែផងដែរ។ ទោះជាបែបនេះក្ដី លោក កែវ សុណ្ណារឹទ្ធ បានប្រាប់ឱ្យដឹងទៀតថា លោកបានចាប់ផ្ដើមបើកអាជីវកម្មលក់បាយឆា មីឆានេះតាំងពីឆ្នាំ២០១៨ ដោយពីមុនលោកក៏ធ្លាប់លក់នៅខេត្តបាត់ដំបងផងដែរ។ ក្នុងការចាប់ផ្ដើមអាជីវកម្មនេះលើកដំបូង លោកបានចំណាយដើមទុនប្រមាណ ៥០០ដុល្លារទៅលើការទិញសម្ភារសម្រាប់ចម្អិនផងដែរ។
ចុងក្រោយ លោកក៏សូមអរគុណដល់អតិថិជនដែលតែងតែគាំទ្រអាជីវកម្មរបស់លោកកន្លងមក ហើយលោកក៏មានគម្រោងចង់បើកជាងហាងបាយម្ហូបកម្ម៉ង់មួយផងដែរនៅពេលដែលលោកសន្សំបានដើមទុនគ្រប់គ្រាន់នាពេលអនាគត៕
Account
Security
Favourite Content