សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
អន្សម ជានំខ្មែរមួយប្រភេទដែលបងប្អូនប្រជាជនខ្មែរចូលចិត្តនិយមទទួលទាន ជាពិសេសនៅក្នុងរដូវមានបុណ្យទានផ្សេងៗ ដូចជារដូវបុណ្យភ្ជុំបិណ្ឌ ក៏ដូចជានាំយកទៅប្រគេនព្រះសង្ឃនៅឯវត្តផងដែរ ដែលធ្វើឱ្យមុខរបរវេចនំអន្សមលក់នេះទទួលបានការគាំទ្រច្រើនពីអតិថិជន។
នំអន្សម ត្បិតថាមានមនុស្សជាច្រើនចូលចិត្តនិយមទទួលទានក៏ពិតមែន ប៉ុន្តែមិនមែនគ្រប់គ្នាសុទ្ធតែចេះវេច និងមានពេលវេលាគ្រប់គ្រាន់ក្នុងការរៀបចំចម្អិននោះទេ ដោយសារការវេចខ្ចប់ និងចម្អិនត្រូវចំណាយពេលយូរ ហើយក៏មិនសូវមានអ្នកចេះជំនាញវេចខ្ចប់អន្សមច្រើននោះដែរ។
អ្នកស្រី ណាន លាងឆាយ ជាអ្នកវេចនំខ្មែរលក់ជាលក្ខណៈគ្រួសារ ជាពិសេសនៅពេលរដូវបុណ្យទានផ្សេងៗនៅក្នុងខេត្តត្បូងឃ្មុំ បានមានប្រសាសន៍ឱ្យដឹងថា អ្នកស្រីចេះពីវិធីវេចនំខ្មែរ និងការផ្សំរសជាតិពីម្ដាយដែលមានជំនាញវេចនំខ្មែរស្ទើរគ្រប់ប្រភេទ ហើយបន្តរហូតមកដល់ជំនាន់អ្នកស្រីក៏សម្រេចចិត្តចាប់យកមុខជំនាញជាអ្នកវេចនំខ្មែរលក់តែម្ដង ព្រោះវាជាមុខរបរដែលអាចធ្វើបាននៅនឹងផ្ទះ ហើយក៏មានទីផ្សារល្អដែរ។
អ្នកស្រីបានបន្តថា ៖
“ខ្ញុំវេចនំលក់តែពេលគេកម្ម៉ង់ ឬក៏ពេលបុណ្យទានធំៗប៉ុណ្ណោះ ប៉ុន្តែមានអ្នកកម្ម៉ង់ជាបន្តបន្ទាប់ស្ទើររាល់ថ្ងៃ ដោយក្នុងនោះអតិថិជនភាគច្រើនជាអ្នករស់នៅក្នុងតំបន់ ហើយក៏មានអ្នកខ្លះទិញយកទៅផ្ញើបងប្អូននៅតាមបណ្តាខេត្តផ្សេងៗ ព្រោះពួកគេចូលចិត្តរសជាតិនំខ្មែរដែលជាស្នាដៃរបស់ខ្ញុំ”
អ្នកស្រីបានបន្តថា ៖
“នំអន្សមរបស់ខ្ញុំអាចមានរសជាតិខុសពីនំរបស់អ្នកដទៃ ដោយសារតែនំដែលខ្ញុំវេចប្រើសណ្ដែកឆ្អិនច្រើនដែលមានរស់ជាតិឈ្ងុយឆ្ងាញ់ ទុកបានយូរថ្ងៃមិនជូរផ្អូម ជាពិសេសនំអន្សមជ្រូកគឺខ្ញុំប្រើបច្ចេកទេសក្នុងការលាយអង្ករ ការផ្សំគ្រឿងលើសាច់ជ្រូក ហើយមានភាពស្ងួត ល្មួតល្អក្រោយពេលឆ្អិនដែលអាចទាក់ចិត្តអ្នកទទួលទានបាន”
អ្នកស្រីបន្ថែមថា ៖
“ភាគច្រើនខ្ញុំវេចនំអន្សមជ្រូក និងនំបត់ ហើយក្រៅពីនេះក៏មានប្រភេទនំគម និងអន្សមចេកខ្លះដែរតាមការកម្ម៉ង់របស់អតិថិជន ហើយមិនវេចអ្វីច្រើននោះទេត្រឹមអង្ករដំណើប១០គីឡូក្រាម ដែលអាចវេចអន្សមជ្រូកបាន ៦០នំ និងអាចចំណេញបានប្រមាណ៦-៧ ម៉ឺនរៀលក្នុងមួយថ្ងៃគ្រាន់នឹងរួចថ្លៃម្ហូបប្រចាំថ្ងៃ”
ចំពោះនំខ្មែរដែលអ្នកស្រីវេច និងចម្អិនរួចរាល់ត្រូវបានលក់ក្នុងតម្លៃសមរម្យ ដូចជា នំអន្សមជ្រូកមួយមានតម្លៃ ៤,០០០រៀល នំបត់ ៣០០រៀល និងនំអន្សមចេក ៥០០រៀល ដែលគេមកយកដល់ផ្ទះខ្លះ និងយកទីលក់នៅផ្សារក្នុងភូមិខ្លះ។ ដោយឡែកគ្រឿងផ្សំសំខាន់ៗសម្រាប់វេចនំរួមមាន អង្ករដំណើប សណ្ដែក សាច់ជ្រូក ដូង ម្រេច ស្ករ អំបិល បង្គាក្រៀម ក្រៅពីនេះមាន ស្លឹកចេក ខ្សែក្រចៅសម្រាប់ចង ។
ដោយឡែក ទាក់ទងនឹងរបៀបធ្វើវិញត្រូវបានអ្នកស្រី លាងឆាយ រៀបរាប់ថា ជាដំបូងត្រូវយកអង្ករទៅតាំទឹករយៈពេលប្រមាណជាង១ម៉ោងរួចលាងឱ្យស្អាត និងទុកឱ្យស្រស់ទឹក លាយជាមួយខ្ទិះដូង និងគ្រឿង។ ចំណែកសណ្ដែកលឿង ត្រូវយកទៅលាង និងដាំបាយសណ្ដែកឱ្យឆ្អិនល្អជាមុនសិន ទើបយកបាយសណ្ដែកទៅឆាលាយគ្រឿង និងដាក់ម្រេច។ ចំណែកផ្នែកសាច់ជ្រូកវិញ ត្រូវលាងឱ្យស្អាតរួចហាន់វែងៗលាយជាមួយនឹងខ្ទឹមសបុក ម្រេច ស្ករ និង បង្គាក្រៀមបុកឱ្យម៉ដ្ឋផងដែរ។
អ្នកស្រីបានសង្កត់ធ្ងន់លើបច្ចេកទេសនៃការវេចខ្ចប់ផងដែរថា សម្រាប់ប្រភេទនំអន្សមជ្រូក ពេលវេចត្រូវដាក់អង្ករ សណ្ដែក និងសាច់ លុះពេលចង ត្រូវចងចំណងខ្សែកណ្ដាល ឬហៅថាខ្សែចង្កេះនំឱ្យជាប់ល្អ ទើបយកធាងចេកបុកអង្ករឱ្យហាប់ ទើបបត់កាច់ក្បាល និងចងចេញរាងស្អាត។ ការចងទៀតសោត ត្រូវប្រើខ្សែក្រចៅ ហើយត្រូវចងឱ្យបានណែនល្អទើបនំអន្សមមិនចូលទឹក និងអាចទុកបានយូរ។ ចុងក្រោយ នៅពេលចម្អិន ដាំទឹកឱ្យពុះ ហើយដាក់ស្ងោរក្នុងរយៈពេលប្រមាណ៧ម៉ោងទើបឆ្អិនល្អ ។
ជាចុងក្រោយ អ្នកជំនាញវេចនំខ្មែររូបនេះបានបញ្ជាក់ថា ការវេចនំមិនពិបាកពេកនោះទេ គ្រាន់តែអង្គុយយូរឈឺចង្កេះបន្តិច តែអាចរកចំណូលបន្ថែមបាន។ មិនថាពេលនេះ ឬបន្តទៅថ្ងៃខាងមុខនោះទេ អ្នកស្រីនៅតែបន្តអាជីពជាអ្នកវេចនំលក់ ដែលក្រៅពីអាចទទួលបានចំណូល ក៏បានចូលរួមចំណែកថែរក្សាប្រភេទនំខ្មែរ ហើយអាចបន្តជំនាញផ្នែកវេចនំខ្មែរនេះទៅអ្នកជំនាន់ក្រោយៗទៀត៕
ជីវប្រវត្តិ: ជានិស្សិតនៃសាលកវិទ្យាល័យភូមិន្ទភ្នំពេញ ដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍។ បច្ចុប្បន្ន ជាអ្នករាយការណ៍ព័ត៌មាននៅ AMS Economy ។
របាយការណ៍ថ្មីៗ
មើលទាំងអស់ ➧
Khmer Insider ជាកម្មវិធីវីដេអូឯកសារមួយដែលបង្កើតឡើងដើម្បីបំផុសគំនិតយុវជន
បទយកការណ៍, អាជីវកម្មថ្មី និងនវានុវត្ត
• 16/10/2024
Khmer Insider ជាកម្មវិធីវីដេអូឯកសារមួយដែលបង្កើតឡើងដើម្បីបំផុសគំនិតយុវជនឲ្យក្លាហានចាប់យកក្តីស្រមៃ ឬចាប់អារម្មណ៍លើការបង្កើតអាជីវកម្មថ្មីៗជាមួយគំនិត ទុន និងឱកាសទីផ្សារផ្សេងៗ
ព័ត៌មានទូទៅ
មើលទាំងអស់ ➧
ការឡើងថ្លៃអេល្យូម បង្កការគំរាមកំហែងដល់វិស័យឈីប វេជ្ជសាស្រ្ត និងអវកាស
ព្រឹត្តិការណ៍, អាជីវកម្មថ្មី និងនវានុវត្ត
• 07/04/2026
វិបត្តិសេដ្ឋកិច្ចពិភពលោកដោយសារសង្រ្គាមនៅមជ្ឈិមបូព៌ាកំពុងលាតសន្ធឹងហួសពីប្រេង ពោលគឺអេល្យូម (Helium) បានក្លាយជាទំនិញ ដែលងាយរងគ្រោះមួយផងដែរ។
កម្មវិធីពិសេសរបស់ AMS ECONOMY
ព័ត៌មានសង្ខេប
Account
Security
Favourite Content