សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កំពត,កែប ៖ ម្ចាស់អាជីវកម្ម និងអ្នកបំពេញភារៈកិច្ចនៅតាមស្ថាប័នអាជីវកម្មនានានៅក្នុងខេត្តកែប – កំពត សរុបប្រមាណ១២០នាក់ បានជួបជុំគ្នានៅក្នុងកម្មវិធីសិក្ខាសាលាស្ដីពី «ទិវាសហគ្រិនភាពកម្ពុជាឆ្នាំ២០២៤» ដែលប្រព្រឹត្តទៅកាលពីថ្ងៃទី៤ ខែវិច្ឆិកា ឆ្នាំ២០២៤កន្លងទៅនេះ ។
កម្មវិធីសិក្ខាសិលានេះត្រូវបាបរៀបចំឡើងដោយសមាគមសហគ្រិនវ័យក្មេងកម្ពុជា សាខាកំពត-កែប ក្រោមអធិបតីភាពដ៏ខ្ពង់ខ្ពស់ពីសំណាក់ ឯកឧត្តម ពេញ ធារម្យ ជាអភិបាលរងនៃគណៈអភិបាលខេត្តកំពត ដែលឯកឧត្តមតែងបានចូលរួមចំណែកយ៉ាងសំខាន់ដើម្បីធ្វើយ៉ាងណាឲ្យសេដ្ឋកិច្ចជាតិមានការអភិវឌ្ឍ ជាពិសេសចូលរួមគាំទ្រដល់សហគ្រិនភាព និងអាជីវកម្មក្នុងប្រទេសផងដែរ។
សូមបញ្ជាក់ផងដែរថា កម្មវិធីទិវាសហគ្រិនភាពកម្ពុជា ត្រូវបានគោរពអញ្ជើញចូលរួមពីសំណាក់វាគ្មិនដែលមានបទពិសោធន៏ជោគជ័យទៅលើអាជីព និងអាជីវកម្មនានាជាច្រើនដូចជា ៖ ឯកឧត្តម តាន់ មុនីវណ្ណ ជាស្ថាបនិក ក្រុមហ៊ុន Winsuo Mart, ឧកញ៉ា សុខ ពិសិដ្ឋ ជាប្រធាន ក្រុមហ៊ុន GGear Group និងជាប្រធានបណ្ដាញសហគ្រិនភាពសកលកម្ពុជា ( GEN Cambodia), លោក វន សំភាស់ នាយក ប្រចាំប្រទេសនៃ អង្គការ អេដ អេ អាក់ស្យុង, លោក ឃឹម ប៊ុនឡែន ប្រធានសមាគមសហគ្រិនវ័យក្មេងកម្ពុជា សាខា កំពត-កែប ( YEAC Kampot-Kep )។
តាមរយៈកម្មវិធីនេះ លោក ឃឹម ប៊ុនឡែន ក៏បានបង្ហាញយ៉ាងសុីជម្រៅថា ខេត្តកំពត និងកែប ជាខេត្តគោលដៅដែលមានសក្តានុពលក្នុងការវិនិយោគយ៉ាងសំខាន់ ដោយហេតុថា ខេត្តទាំងពីរនេះ សម្បូរដោយធនធានធម្មជាតិស្រាប់។ មិនតែប៉ុណ្ណេះខេត្តកំពត និងកែប ក៏ស្ថិតក្នុងតំបន់ពិសេសគួរជាទីចាប់អារម្មណ៍សម្រាប់អ្នកវិនិយោគ ហើយមានចម្ងាយមិនឆ្ងាយឡើយពីរាជធានីភ្នំពេញ ។
លោកឧកញ៉ា សុខ ពិសិដ្ឋ ជាសហគ្រិនមួយរូបដែលបានធ្វើអាជីវកម្មតាំងពីឆ្នាំ២០០៧ ហើយក៏ជាសហគ្រិនមួយរូបដែលបានពង្រីកអាជីវកម្មរបស់ខ្លួនរហូតក្លាយជាបណ្តុំអាជីវកម្មជោគជ័យជាច្រើនកន្លែង ។ ក្នុងឱកាសដ៏មានន័យនេះ លោកឧកញ៉ា សុខ ពិសិដ្ឋ ក៏បានចែករំលែកនូវបទពិសោធន៍របស់លោកដើម្បីក្លាយជាសហគ្រិនជោគជ័យមួយរូបនៅក្នុងទីផ្សារដ៏ប្រកួតប្រជែងនេះ ខណៈដែលការផ្សារភ្ជាប់ទំនាក់ទំនង និងមានអ្នកជួយដឹកផ្លូវ ពិតជាមានគុណតម្លៃណាស់ដើម្បីជួយអាជីវកម្មឱ្យមានការរីកចម្រើន។
ក្នុងជំនួបនេះដែរ លោកឯកឧត្តម តាន់ មុនីវណ្ណ ក៏បានចែករំលែកបទពិសោធន៍នៃការធ្វើអាជីវកម្ម ជាពិសេសសម្រាប់ម្ចាស់អាជីវកម្មដែលកំពុងដំណើរការនៅក្នុងខេត្តកំពត-កែប ដែលត្រូវតែមានភាពបត់បែនទៅតាមតម្រូវការរបស់អតិថិជន ក៏ដូចជាការប្រកួតប្រជែងនៅលើទីផ្សារផងដែរ។
កម្មវិធី «ទិវាសហគ្រិនភាពកម្ពុជាឆ្នាំ២០២៤» ដែលរៀបចំឡើងដោយសហគមសហគ្រិនវ័យក្មេងកម្ពុជា សាខាកំពត-កែប ក៏មានវេទិកាជជែកគ្នាជុំវិញប្រធានបទ «វិនិយោគលើសហគ្រិនវ័យក្មេងដើម្បីសេដ្ឋកិច្ចប្រកបដោយថាមវន្ត និងបរិយាបន្ន» ដែលដឹកនាំដោយលោក មុត ភាព ដែលជាក្រុមប្រឹក្សាភិបាលក្នុងសមាគមសហគ្រិនវ័យក្មេងកម្ពុជាសាខាកំពត-កែប ហើយក៏ជាអ្នកដឹកនាំក្នុងកម្មវិធីនេះផ្ទាល់តែម្ដង។ លោកបានបង្ហាញពីការយល់ឃើញរបស់ខ្លួនថា លោកពិតជាមានសេចក្តីសោមនស្សយ៉ាងក្រៃលែងក្នុងការរួមចំណែកដើម្បីជួយដល់ម្ចាស់អាជីវកម្មក្នុងខេត្តកំពត-កែប ក្នុងការផ្លាស់ប្តូរគំនិតអាជីវកម្ម ការទាក់ទំនងគ្នា និងជួយជ្រោមជ្រែងអាជីវកម្មគ្នាទៅវិញទៅមកដើម្បីការរីកចម្រើនក្នុងវ័ស័យរបស់ខ្លួន ។
លោក មុត ភាព ក៏បានសង្កត់ធ្ងន់ដែរថា កម្មវិធីដែលរៀបចំឡើងដោយសមាគមសហគ្រិនវ័យក្មេងកម្ពុជាកំពត-កែប នេះ មិនត្រឹមតែធ្វើឡើងដើម្បីអបអរសាទរទិវាសហគ្រិនប៉ុណ្ណោះទេ ប៉ុន្តែក៏ដើម្បីជួយពង្រឹងដល់អាជីវកម្មក្នុងខេត្តកំពត និងកែប ឲ្យមានការអភិវឌ្ឍជានិរន្តរ៍។
ជារឿងដ៏អស្ចារ្យមួយ គ្រប់អ្នកដែលបានចូលរួមទាំងអស់សុទ្ធតែមានសុទិដ្ឋិនិយម ដែលទទួលបានបទពិសោធន៍ និងមេរៀនល្អៗពីការចែករំលែករបស់វាគ្មិនដែលមានបទពិសោធន៍នៅក្នុងដំណើរភាពជាសហគ្រិន។ ជាចុងក្រោយ កម្មវិធីមួយនេះពិតជាបានចូលរួមជួយដល់ម្ចាស់អាជីវកម្មក្នុងខេត្តកំពត-និងកែប ដើម្បីអភិវឌ្ឍអាជីវកម្មរបស់ពួកគេបន្ថែមទៀតក្នុងបរិបទដែលមានការប្រកួតប្រជែងមួយនេះ៕
Account
Security
Favourite Content