សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កំពង់ស្ពឺ នៅតែជាខេត្តដែលមានការទាក់ទាញលើការវិនិយោគផ្នែកឧស្សាហកម្ម ជាពិសេសរោងចក្រកាត់ដេរ ទាំងគម្រោងវិនិយោគថ្មីៗ និងគម្រោងរោងចក្រដែលរើទីតាំងចេញពីកណ្ដាលក្រុងភ្នំពេញ។ ជាក់ស្ដែងតាមការប្រកាសរបស់ក្រុមប្រឹក្សាអភិវឌ្ឍន៍កម្ពុជាក្នុងចំណោមគម្រោងវិនិយោគថ្មីចំនួន១១ ដែលអនុម័តនៅថ្ងៃទី០៧ ខែកុម្ភៈ ឆ្នាំ២០២២នេះ ខេត្តកំពង់ស្ពឺទទួលបានគម្រោងវិនិយោគថ្មីចំនួន៥ទៅហើយ ។
បើតាមសេចក្ដីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជាដដែលឱ្យដឹងក្នុងចំណោមគម្រោងវិនិយោគចំនួន៥ដែលបោះទីតាំងនៅខេត្តកំពង់ស្ពឺមានទឹកប្រាក់សរុបជិត៣០លានដុល្លារអាមេរិក ដោយសារតែគម្រោងទាំងនេះគឺជាគម្រោងរោងចក្រ ដូច្នេះទឹកប្រាក់នៃគម្រោងនីមួយៗមានទុនវិនិយោគក្រោម១០លានដុល្លារអាមេរិកប៉ុណ្ណោះ ។ គម្រោងទាំង៥ដែលវិនិយោគនៅខេត្តកំពង់ស្ពឺនេះ រួមមាន ៖
១. គម្រោងបង្កើតរោងចក្រកាត់ដេរសម្លៀកបំពាក់ និងវាយនភណ្ឌក្នុងផ្ទះ ដែលមានទីតាំងវិនិយោគស្ថិតនៅក្បាលដីលេខ១ ផ្លូវជាតិលេខ៤១ ភូមិដូនកែវ ឃុំសែនដី ស្រុកសំរោងទង ខេត្តកំពង់ស្ពឺ ក្នុងទុនវិនិយោគប្រមាណ ៦,៤លានដុល្លារអាម៉េរិក និងអាចបង្កើតការងារបានចំនួន ៥៣១កន្លែង។
២. គម្រោងបង្កើតរោងចក្រផលិតស្បែកជើង ដែលមានទីតាំងវិនិយោគស្ថិតនៅភូមិរោងគោ ឃុំសំរោងទង ស្រុកសំរោងទង ខេត្តកំពង់ស្ពឺ ក្នុងទុនវិនិយោគប្រមាណ ៦,៤លានដុល្លារអាម៉េរិក និងអាចបង្កើតការងារបានចំនួន ១.៤៧៨កន្លែង។
៣. គម្រោងបង្កើតរោងចក្រផលិតកាបូប កាត់ដេរសម្លៀកបំពាក់ ខ្សែកាត ម៉ាស និងអៀម ដែលមានទីតាំងវិនិយោគស្ថិតនៅភូមិត្រាវ ឃុំទឹកល្អក់ ស្រុកគងពិសី ខេត្តកំពង់ស្ពឺ ក្នុងទុនវិនិយោគប្រមាណ ៥,៨លានដុល្លារអាម៉េរិក និងអាចបង្កើតការងារបានចំនួន ១.២៦៣កន្លែង។
៤. គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅភូមិស្លែង ឃុំមហាសាំង ស្រុកភ្នំស្រួច ខេត្តកំពង់ស្ពឺ ក្នុងទុនវិនិយោគប្រមាណ ៥,៤លានដុល្លារអាម៉េរិក និងអាចបង្កើតការងារបានចំនួន ២.១៣៥កន្លែង។
៥. គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅភូមិទួលធ្នង់ ឃុំព្រះនិព្វាន្ត ស្រុកគងពិសី ខេត្តកំពង់ស្ពឺ ក្នុងទុនវិនិយោគប្រមាណ ៥,២លានដុល្លារអាម៉េរិក និងអាចបង្កើតការងារបានចំនួន ៧៩៨កន្លែង ។
លោក ប៊ូ សេងហូ ប្រធានសាខានៃក្រុមហ៊ុនអចលនទ្រព្យ C1 Zillion Holding ប្រចាំខេត្តកំពង់ស្ពឺ បានឱ្យដឹងថា តាមរយៈកំណើននៃការវិនិយោគរោងចក្រឧស្សាហកម្មទាំងនេះបានជំរុញឱ្យតម្រូវការប្រើប្រាស់ដីសម្រាប់សង់រោងចក្រ ឃ្លាំងនៅក្នុងទឹកដីខេត្តកំពង់ស្ពឺ មានកំណើនឡើង ជាពិសេសនៅតាមបណ្ដោយផ្លូវសំខាន់ៗ នៃខេត្តកំពង់ស្ពឺ ជាពិសេសផ្លូវ៥១ ផ្លូវ៤១ និងផ្លូវដែលទើបសាងសង់ថ្មីៗមួយចំនួនទៀត ។
លោកបន្តថា នៅពេលអនាគតខេត្តមួយនេះនឹងមានការវិនិយោគកាន់តែច្រើនបន្ថែមទៀតជាពិសេសរោងចក្រឧស្សាហកម្ម និងអាចផ្ដល់ឱកាសការងារជាច្រើនដល់ប្រជាពលរដ្ឋក្នុងខេត្តផ្ទាល់ក៏ដូចជាប្រជាពលរដ្ឋមកពីបណ្ដាខេត្តនានាជាដើម ៕
Account
Security
Favourite Content