ភ្នំពេញ៖ តំណាងគម្រោង CAPRED ដែលជាកម្មវិធីអភិវឌ្ឍន៍សេដ្ឋកិច្ចដ៏សំខាន់មួយរបស់អូស្ត្រាលីនៅកម្ពុជា បានចុះទស្សនកិច្ចសិក្សាស្វែងយល់ដោយផ្ទាល់ដល់សហគមន៍កសិកម្មទំនើបនៅត្រាំកក់ និងពិនិត្យលទ្ធភាពពង្រីកកិច្ចសហប្រតិបត្តិការកាន់តែទូលំទូលាយបន្ថែមទៀត ដើម្បីគាំទ្រដល់សហគមន៍កសិកម្មទំនើបនៅកម្ពុជា។ នេះបើតាមការឱ្យដឹងពីឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម។

ឯកឧត្តម ឃឹម ហ្វីណង់ បានឱ្យដឹងថា ការនាំយកតំណាងនៃគម្រោង CAPRED ទៅដល់សហគមន៍កសិកម្មទំនើបនៅត្រាំកក់ដោយផ្ទាល់ គឺក្នុងគោលបំណងសិក្សាស្វែងយល់ និងពិនិត្យលទ្ធភាពពង្រីកកិច្ចសហ​ប្រតិ​បត្តិការ និងគាំទ្រដល់សហគមន៍កសិកម្មទំនើប។ ក្រៅពីអត្ថប្រយោជន៍ដោយផ្ទាល់ជាច្រើន សមាជិកនៃសហគមន៍កសិកម្មទំនើប នឹងត្រូវបានផ្តល់អាទិភាពទទួលបានជំនួយឧបត្ថម គាំទ្របន្ថែមពីគម្រោង និងដៃគូអភិវឌ្ឍន៍នានាផងដែរ។

លោក អ៊ុន អឿន ប្រធានក្រុមប្រឹក្សាភិបាលសហគមន៍កសិកម្មទំនើបបន្លែត្រាំកក់ បានឱ្យដឹងថា គម្រោង CAPRED របស់អូស្ត្រាលី ដែលបានចុះមកដល់សហគមន៍ គឺគ្រាន់តែបានស្វែងយល់ និងសិក្សានូវអ្វីដែលជាតម្រូវការរបស់សហគមន៍ប៉ុណ្ណោះ ដែលចម្លើយនឹងផ្តល់ជូនសហគមន៍កសិកម្មទំនើបនៅពេលក្រោយ។

ប្រធានក្រុមប្រឹក្សាភិបាលសហគមន៍កសិកម្មទំនើបរូបនេះបានបន្តថា​ ៖

«នៅក្នុង​ដំណើរទស្សនកិច្ចសិក្សាស្វែងយល់ដោយផ្ទាល់ដល់សហគមន៍ យើងក៏បានជម្រាបជូននូវចំណុចសំខាន់ៗ ដែលយើងបានស្នើជូនទៅគាត់ តែមិនទាន់ដឹងថា គេនឹងជ្រើសយកចំណុចណាមួយនៅឡើយ ដោយគេបានយកចំណុចទាំងនេះទៅសិក្សាជាមុនសិន ខណៈសហគមន៍យើងបានស្នើជូនទៅគាត់ ទី១-គឺ ការបង្កើនសមាជិកសភាពនៃសហគមន៍ ទី២- ដំណោះស្រាយរកទីផ្សារ ទី៣- គឺរចនាសម្ព័ន្ធមានផ្លូវថ្នល់ អាងទឹក និងសូឡា»។

សូមជម្រាបថា បច្ចុប្បន្នសហគមន៍កសិកម្មទំនើបបន្លែត្រាំកក់ មានផ្ទះសំណាញ់ជាង៦០ ដែលពីមុនមានត្រឹមជាង៤០ ផ្ទះសំណាញ់ប៉ុណ្ណោះ ។ ប៉ុន្តែដោយសារមានការជួយពីក្រុមការងារចុះជួយមូលដ្ខានរបស់ ឯកឧត្តម ឧបនាយករដ្ឋមន្ត្រី សាយ សំអាល់ បានផ្តល់នូវផ្ទះសំណាញ់ចំនួន១០០ខ្នង ដែលកំពុងតែសាងសង់ជាបណ្ដើរៗ និងមានការកើនឡើងនូវចំនួនសមាជិកចូលរួម២០នាក់បន្ថែមទៀត។ នេះបើតាមលោកប្រធានក្រុមប្រឹក្សាបានឱ្យដឹង។

លោក អ៊ុន អឿន បានបន្តថា ៖

«បច្ចុប្បន្ន យើងមានក្រុមហ៊ុនចំនួន២ គឺក្រុមហ៊ុន ហ៊ូ យន់ កសិកម្ម និងក្រុមហ៊ុន ត្រូពិកខេម ដែលទទួលយកបន្លែរបស់យើង។ បើយើងធ្វើផ្ទះសំណាញ់បានច្រើន ហើយមានខាងក្រសួង ក៏ដូចជាគម្រោងពិពិធកម្មកសិកម្មកម្ពុជា (CASDP) ជួយជាបង្អែក យើងអាចពង្រីកទីផ្សារបានបន្ថែមទៀត។ តែដើម្បីពង្រឹងការងារឱ្យមានស្ថិរភាព ខាងសហគមន៍នឹងប្រមូលផ្ដុំគ្នា ចងក្រងជាខ្សែចង្វាក់ការងារ និងធ្វើផែនការផលិត ដោយពង្រីកមុខដំណាំឱ្យបានច្រើនសម្រាប់ទីផ្សារ»។

សូមជម្រាបថា សហគមន៍កសិកម្មទំនើបឃុំត្រាំកក់នេះ បានចាប់យកបន្លែ ៤ប្រភេទជាគោល ក្នុងនោះរួមមាន ស្ពៃក្រញាញ់ ស្ពៃតឿ ស្ពៃចង្កឹះ និងខាត់ណាដើម ហើយនៅថ្ងៃខាងមុខ សហគមន៍នឹងធ្វើការពង្រីកទៅលើប្រភេទបន្លែផ្សេងៗទៀតទៅតាមតម្រូវការទីផ្សារ ជៀសវាងការធ្វើជាន់គ្នា ធ្វើឱ្យទីផ្សារជន់ជោរ ធ្លាកតម្លៃ និងខាតបង់ផលចំណេញ៕