សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ធុរកិច្ចបរិយាបន្ន គឺជាទំនោរថ្មីនៃអាជីវកម្មដែលលេចរូបរាងឡើងដំបូងនៅក្នុងឆ្នាំ២០១១ ដោយមានប្រភពចេញពីក្រុមប្រទេសដែលមានសេដ្ឋកិច្ចខ្លាំងក្លាទាំង២០ (G20) ។ រីឯគោលបំណងនៃការបង្កើតធុរកិច្ចបរិយាបន្ននេះគឺដើម្បីជុំរុញសេដ្ឋកិច្ចជាតិ តាមរយៈការរួមចំណែកជួយលើកកម្ពស់ស្តង់ដារនៃការរស់នៅរបស់ប្រជាជនជាសកល។ គោលបំណងនេះក៏ស្របជាមួយនឹងគោលដៅអភិវឌ្ឍន៍ប្រទេសប្រកបដោយចីរភាព (Sustainable Development Goals) នៅត្រង់ចំណុចទី១ គឺកាត់ផ្ដាច់នូវភាពក្រីក្រផងដែរ។ ក្រោយមក គំរូអាជីវកម្មនេះបានសាយភាយទៅទូទាំងពិភពលោក ដោយប្រទេសជាច្រើនបានយកវាទៅអនុវត្តនៅក្នុងអាជីវកម្មក្នុងស្រុករៀងៗខ្លួន។
សម្រាប់កម្ពុជា គំរូអាជីវកម្មបរិយាបន្នបានចូលមកនៅក្នុងឆ្នាំ២០២០ ដោយកម្ពុជាជាអ្នកនាំមុខគេក្នុងការលើកកម្ពស់ធុរកិច្ចបរិយាបន្ននៅទូទាំងតំបន់អាស៊ាន។ ក្នុងរយៈពេលប៉ុន្មានឆ្នាំនៃការលើកកម្ពស់ធុរកិច្ចបរិយាបន្ននេះ ភាគីពាក់ព័ន្ធបានរៀបចំនូវកម្មវិធីជាច្រើន ដែលក្នុងនោះក៏មាននូវកម្មវិធី ប្រកួតប្រជែងរវាងម្ចាស់អាជីវកម្មនៅក្នុងសហគ្រាសនធុនមីក្រូ តូច និងមធ្យមផងដែរ។
លោក ប៊ុន វុធឌីកា ស្ថាបនិកហាងនំបុ័ង CHRIZT BEN ដែលធ្លាប់បានចូលរួមក្នុងកម្មវិធីសម្ពោធយុទ្ធនាការធុរកិច្ចបរិយាបន្ន បានបង្ហាញពីចំណាប់អារម្មណ៍ចង់ស្វែងយល់បន្ថែមពីគំរូអាជីវកម្មថ្មីនេះ។ លោកយល់ថា កម្មវិធីបែបនេះគឺពិតជាល្អ និងមានសារៈសំខាន់ចំពោះសហគ្រាសធុនមីក្រូ តូច និងមធ្យមមែនទែន ដោយពួកគេអាចស្វែងយល់បានកាន់តែច្បាស់អំពីលក្ខខណ្ឌនៃអាជីវកម្មបរិយា បន្ន។
សម្រាប់រូបលោកផ្ទាល់ ក៏ទទួលបានចំណេះដឹងបន្ថែមទៀតអំពីអាជីវកម្មបរិយាបន្ននេះ ដោយលោកបានអះអាងថា ៖ «អាជីវកម្មប្រភេទនេះតម្រូវឱ្យមានទុនគ្រប់គ្រាន់អាចឈរជើងបាន ហើយអាចរួមចំណែកជួយដល់ប្រជាជនក្នុងតំបន់ផ្សេងទៀត និងមានភាពច្នៃប្រតិដ្ឋចំពោះអាជីវកម្ម»។ តាមរយៈអាជីវកម្មបរិយាបន្ននេះ សហគ្រាសគាត់អាចចូលរួមប្រកួតប្រជែងគ្នា ដើម្បីដឹងពីសមត្ថភាពរបស់ខ្លួន ហើយអាចពង្រឹងអាជីវកម្មរបស់ខ្លួនឱ្យកាន់តែរឹងមុំា។ អ្វីដែលកាន់តែពិសេសគឺអ្នកឈ្នះគាត់អាចទទួលបានទុនបន្ថែមដើម្បីយកទៅពង្រីកអាជីវកម្មរបស់គាត់ទៀត»។
ទោះជាយ៉ាងនេះក្ដី លោកយល់ថា គួរតែមានការបញ្ច្រាបចំណេះដឹងឱ្យកាន់តែច្បាស់បន្ថែមទៀតអំពីនិយមន័យនៃពាក្យថា «បរិយាបន្ន» ឱ្យកាន់តែទូលំទូលាយ តើសហគ្រាសនឹងទទួលបានទុនប៉ុន្មាននៅពេលគាត់ឈ្នះការប្រកួត? ហើយតើពួកគាត់នឹងទទួលបានការគាំទ្រក្នុងកម្រិតណាជាដើម ?
លោកបានបញ្ជាក់ថា ៖ «ខ្លួនខ្ញុំផ្ទាល់ពិតជាមានចំណាប់អារម្មណ៍ខ្ពស់ក្នុងការប្រែក្លាយអាជីវកម្មឱ្យទៅជាអាជីវកម្មបរិយាបន្ន ប៉ុន្តែខ្ញុំនៅមិនទាន់យល់ច្បាស់អំពីធុរកិច្ចបរិយាបន្ននេះនៅឡើយ។ ដូច្នេះ ជារឿងល្អប្រសិនបើអ្នកពាក់ព័ន្ធខិតខំបញ្ជ្រាបចំណេះដឹងបន្ថែមទៀតទៅកាន់ម្ចាស់អាជីវកម្ម»៕
Account
Security
Favourite Content