សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា (CDC )នៅឆ្នាំ២០២៥ កន្លងទៅនេះ បានចុះបញ្ជីគម្រោងវិនិយោគចំនួន៦៣០ ដែលមានទុនវិនិយោគសរុបប្រមាណ ១០ប៊ីលានដុល្លារអាម៉េរិក និងអាចបង្កើតការងារបានប្រមាណ ៤៣៨ពាន់កន្លែង។
សេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជាបានឱ្យដឹងថា៖ ក្នុងចំណោមគម្រោងវិនិយោគជាង ៦៣០ មានទីតាំងស្ថិតនៅក្រៅតំបន់សេដ្ឋកិច្ចពិសេសចំនួន ៣៨៧ និងគម្រោងវិនិយោគដែលមានទីតាំងស្ថិតនៅក្នុងតំបន់សេដ្ឋកិច្ចពិសេសមានចំនួន ២៤៣។
យោងតាមប្រភព CDC ការចុះបញ្ជីគម្រោងវិនិយោគមានការកើនឡើងចំនួន២១៦ ស្មើនឹងប្រមាណ ៥២% ខណៈទំហំទុនវិនិយោគមានការកើនឡើងប្រមាណ ៣ប៊ីលានដុល្លារអាម៉េរិក ស្មើនឹង ប្រមាណ ៤៥% ធៀបនឹងរយៈពេលដូចគ្នាក្នុងឆ្នាំ២០២៤ ដែលគណៈកម្មការវិនិយោគកម្ពុជា បានចុះបញ្ជីគម្រោង វិនិយោគចំនួន ៤១៤ ក្នុងទំហំទុនវិនិយោគសរុបប្រមាណ ៦,៩ប៊ីលានដុល្លារអាម៉េរិក។ សមិទ្ធផលនេះជាការបង្កើតកំណត់ត្រាថ្មីមួយទៀត ដែលកាលពីឆ្នាំ២០២៤ គណៈកម្មការវិនិយោគកម្ពុជាបានបង្កើតកំណត់ត្រាថ្មីនៃការ ចុះបញ្ជីគម្រោងវិនិយោគម្តងរួចហើយ។
គម្រោងវិនិយោគដែលលេចធ្លោជាងគេប្រចាំឆ្នាំ២០២៥ នៅក្រៅតំបន់សេដ្ឋកិច្ចពិសេសគឺគម្រោងពង្រីកផលិតកម្មកសិដ្ឋានដាំដំណាំហូបផ្លែ និងរោងចក្រកែច្នៃនៅខេត្តរតនគិរី ដែលមានទុនវិនិយោគប្រមាណ២២៦លានដុល្លារ និងអាចបង្កើតការងារជាង៨ពាន់កន្លែង។ ចំណែកគម្រោងលេចធ្លោជាងគេនៅក្នុងតំបន់សេដ្ឋកិច្ចពិសេស គឺគម្រោងបង្កើតរោងចក្រផលិតសំបកកង់រថយន្តចំនួនពីរ នៅក្នុងតំបន់សេដ្ឋកិច្ចពិសេសអាយ អេស អាយ និង តំបន់សេដ្ឋកិច្ចពិសេសស៊ីនបាវិត ខេត្តស្វាយរៀងដែលមានទុនសរុបជាង ៤៣៧លានដុល្លារ ។
សូមបញ្ជាក់ថា គម្រោងវិនិយោគលើវិស័យឧស្សាហកម្ម មានទំហំធំជាងគេដែលមានទុន ៥,៦ប៊ីលាន បន្ទាប់មកវិស័យហេដ្ឋារចនាសម្ព័ន្ធ និងវិស័យផ្សេងៗចំនួន ៣,៨ ប៊ីលាន វិស័យកសិកម្ម-កសិឧស្សាហកម្ម៤៣៦លានដុល្លារ និងវិស័យទេសចរណ៍១៧៥លានដុល្លារ។ រីឯប្រភពទុនឈានមុខគេ គឺប្រទេសចិនដែលមានជាង៥៤ភាគរយ កម្ពុជាជាង៣១% សិង្ហបុរីជិត៦% វៀតណាមជាង៤% និងកោះBritish Virgin ជិត២ភាគរយ។
ប្រភព CDC បានឱ្យដឹងផងដែរថា៖ ខេត្តកំពង់ស្ពឺទទួលបានគម្រោងវិនិយោគច្រើនជាងគេគឺ១៤២គម្រោង បន្ទាប់មកខេត្តស្វាយរៀងចំនួន១៣៩គម្រោង រាជធានីភ្នំពេញចំនួន៧៦គម្រោង ខេត្តតាកែវ៦៤ ខេត្តកោះកុង៥២ ខេត្តព្រះសីហនុ៥១ ខេត្តកណ្តាល៤៨ និងខេត្តកំពង់ឆ្នាំងចំនួន ២១ ។ ដោយឡែកក្រុមប្រឹក្សាអភិវឌ្ឍន៍កម្ពុជា បានឱ្យដឹងផងដែរថា៖នៅក្នុងឆ្នាំ២០២៥នេះ អនុគណៈកម្មាធិការវិនិយោគរាជធានី-ខេត្ត បានសម្រេចចុះបញ្ជីគម្រោងវិនិយោគ សរុបចំនួន ២២៨គម្រោង ដែលមានទុនវិនិយោគសរុបប្រមាណ៧៦៣លានដុល្លារអាម៉េរិកនិងអាចបង្កើត ការងារបានប្រមាណ១០៦ពាន់កន្លែង។
គម្រោងវិនិយោគទាំង ២២៨ នេះសុទ្ធសឹងតែជាការវិនិយោគក្នុងវិស័យឧស្សាហកម្ម និងមានប្រភពទុនវិនិយោគមកពីប្រទេសចិនប្រមាណ៧២៨លានដុល្លារអាម៉េរិក,ក្នុងស្រុកប្រមាណ២២,៦លានដុល្លារអាម៉េរិក, អូស្ត្រាលីប្រមាណ ៥លានដុល្លារអាម៉េរិក, សិង្ហបុរីប្រមាណ ៣,៤លានដុល្លារអាម៉េរិក, សហរដ្ឋ អាម៉េរិកប្រមាណ ១,៥លានដុល្លារអាម៉េរិក, ម៉ាឡេស៊ីប្រមាណ ១លានដុល្លារ អាម៉េរិក និងជប៉ុនប្រមាណ ៦១ម៉ឺនដុល្លារអាម៉េរិក៕
Account
Security
Favourite Content