សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សៀមរាប ៖ អង្គការអុកស្វាម សហការជាមួយដៃគូចំនួន៩ បានប្រកាសពីការចាប់ផ្តើមអនុវត្តគម្រោងថ្មីដ៏សំខាន់មួយឈ្មោះថា “ភាពធន់នឹងអាកាសធាតុសម្រាប់ទាំងអស់គ្នា – Climate Change Resilience for All” ហៅកាត់ CREFA កាលពីថ្ងៃទី១ ខែមេសា ឆ្នាំ២០២៤ នៅខេត្តសៀមរាប។ ក្រោមជំនួយផ្នែកហិរញ្ញវត្ថុពីស្ថានទូតអៀរឡង់ គម្រោងនេះមានគោលបំណងដោះស្រាយភាពងាយរងគ្រោះចំពោះការប្រែប្រួលអាកាសធាតុ តាមរយៈសកម្មភាពដែលលើកកម្ពស់សមត្ថភាពបន្សុំា និងការកាត់បន្ថយផលប៉ះពាល់នៃការប្រែប្រួលអាកាសធាតុ។ គម្រោងនេះ នឹងធ្វើការជាមួយរាជរដ្ឋាភិបាល និងវិស័យឯកជន ដោយផ្តោតលើកិច្ចសន្ទនា គោលនយោបាយ ការកសាងសមត្ថភាពថ្នាក់មូលដ្ឋាន និងលើកកម្ពស់ការអភិវឌ្ឍប្រកបដោយនិរន្តរភាព ស្របតាមគោលដៅអភិវឌ្ឍន៍ប្រកបដោយចីរភាព។ គម្រោងនេះក៏ផ្តោតសំខាន់លើការលើកកម្ពស់សមភាពយេនឌ័រ និងបរិយាបន្នសង្គម ដោយមានការវិភាគពីសមភាពយេនឌ័រ ពិការភាព និងបរិយាបន្នសង្គម ដែលនឹងជាមគ្គុទេសន៍សម្រាប់សកម្មភាពគម្រោង។
លោក Seán Farrell អនុប្រធានបេសកកម្មនៅស្ថានទូតអៀរឡង់ បានមានប្រសាសន៍ថា ៖ ការគាំទ្រកម្មវិធីអាកាសធាតុគឺជាផ្នែកដ៏សំខាន់មួយនៃយុទ្ធសាស្ត្រអភិវឌ្ឍន៍របស់ប្រទេសអៀរឡង់។ រដ្ឋាភិបាលអៀរឡង់បានប្តេជ្ញាចិត្តក្នុងការបង្កើនទ្វេដងនូវហិរញ្ញវត្ថុអាកាសធាតុជាសាកលដែលយ៉ាងហោចណាស់ ២២៥ លានអឺរ៉ូក្នុងឆ្នាំ២០២៥ ។ ការប្រែប្រួលអាកាសធាតុប៉ះពាល់ដល់មនុស្សគ្រប់រូប ប៉ុន្តែផលប៉ះពាល់នោះមានភាពខុសគ្នា ។ ប្រជាជនក្រីក្របំផុតនៅលើពិភពលោកប្រឈមមុខនឹងផលប៉ះពាល់ដ៏អាក្រក់បំផុត។
លោកបានបន្ថែមថា រដ្ឋាភិបាលអៀរឡង់ជឿជាក់ថា ជំនួយដល់ប្រជាជនដែលងាយរងគ្រោះ និងប្រឈមមុខនឹងបញ្ហាដែលបង្កឡើងដោយបម្រែបម្រួលអាកាសធាតុពួកគាត់នឹងបានប្រសើរឡើង ។ អៀរឡង់ រីករាយក្នុងការចាប់ផ្តើមកម្មវិធីនេះជាមួយអង្គការ អុកស្វាម និងអង្គការក្នុងស្រុកទាំងអស់ ដែលជាផ្នែកមួយនៃការប្តេជ្ញាចិត្តចំពោះអាកាសធាតុនៅជាមួយប្រជាជាតិដែលរងផលប៉ះពាល់ខ្លាំងជាងគេ។
លោកជំទាវ ងិន លីណា រដ្ឋលេខាធិការ និងជាប្រធានក្រុមការងារបញ្ជ្រាបយេនឌ័រក្រសួងបរិស្ថាន បានមានប្រសាសន៍ថា ក្រសួងបរិស្ថានបានរៀបចំយុទ្ធសាស្ត្រចក្រា វិស័យបរិស្ថាន ឆ្នាំ២០២៣-២០២៨ ក្នុងគោលបំណងតម្រង់ទិស និងចង្អុលបង្ហាញការងារអាទិភាព ដើម្បីធានាឱ្យបាននូវចីរភាព បរិស្ថាន និងសុក្រឹតកម្មបរិស្ថានកិច្ច ឆ្លើយតបទៅនឹងការប្រែប្រួល អាកាសធាតុ និងលើកកម្ពស់សេដ្ឋកិច្ចបៃតង សំដៅសម្រេចគោលដៅ នៃយុទ្ធសាស្ត្របញ្ចកោណ គឺជាប្រទេសអព្យាក្រឹតកាបូន និងមានគម្របព្រៃឈើ៦០% នៅឆ្នាំ២០៥០។
លោក ម៉ម សម្បត្តិ នាយកប្រតិបត្តិនៃអង្គការ អភិវឌ្ឍន៍ និងភាពជាដៃគូក្នុងសកម្មភាព បានបញ្ជាក់ថា តាមរយៈកិច្ចខិតខំប្រឹងប្រែងរួមគ្នានៃគម្រោង CREFA នឹងផ្តល់សិទ្ធិអំណាចដល់សហគមន៍ព្រៃឈើ និងតំបន់ការពារ ពង្រឹងសមត្ថភាពមូលដ្ឋាន និងបង្កើនភាពធន់សម្រាប់អនាគតដ៏រឹងមាំនៃប្រជាជនកម្ពុជាទាំងអស់ ។
លោកស្រី ភាណ សោភ័ណ នាយិកាអង្គការអុកស្វាម មានប្រសាសន៍ថា ស្របតាមអាទិភាពរបស់រដ្ឋាភិបាលអៀរឡង់ និងផែនការយុទ្ធសាស្ត្ររបស់រាជរដ្ឋាភិបាលកម្ពុជា CREFA នឹងចូលរួមចំណែកជាមួយរាជរដ្ឋាកម្ពុជាដើម្បីសម្រេចបានសមភាពយេនឌ័រ អនុវត្តសកម្មភាពអាកាសធាតុ អភិបាលកិច្ច អព្យាក្រឹតភាពកាបូន យុទ្ធសាស្ត្រចក្រា ផែនការអភិវឌ្ឍជាតិ ផែនការយុទ្ធសាស្ត្រស្តីពីការប្រែប្រួលអាកាសធាតុកម្ពុជា គោលនយោបាយកំណើនបៃតង និង ការប្តេជ្ញាចិត្តអន្តរជាតិ។ ការប្រទាក់ក្រឡាគ្នាទាំងនេះ បង្ហាញពីសារៈសំខាន់នៃគម្រោងក្នុងការដោះស្រាយបញ្ហាការប្រែប្រួលអាកាសធាតុ និងការលើកកម្ពស់ការអភិវឌ្ឍប្រកបដោយចីរភាពនៅកម្ពុជា”៕
Account
Security
Favourite Content