សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា CDC បានត្រៀមធ្វើទំនើបកម្មនីតិវិធីវិនិយោគជាមួយនឹងការដាក់ឱ្យដំណើរការជាផ្លូវការនូវប្រព័ន្ធគ្រប់គ្រងគម្រោងវិនិយោគកម្ពុជា (cdcIPM) នៅថ្ងៃទី២៧ ខែវិច្ឆិកាឆ្នាំ២០២៤ ខាងមុខ ដែលប្រព័ន្ធនេះមានគោលបំណងសម្រួលនិតិវិធីវិនិយោគជាឌីជីថល ធ្វើឱ្យកាន់តែងាយស្រួលសម្រាប់អាជីវកម្មក្នុងការវិនិយោគនៅកម្ពុជា។
ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានលើកឡើងកាលពីថ្មីៗនេះថា ប្រព័ន្ធគ្រប់គ្រងគម្រោងវិនិយោគកម្ពុជា The CDC Investment Project Management System (cdcIPM) គឺជាប្រព័ន្ធបច្ចេកវិទ្យា ដែលអនុញ្ញាតឱ្យវិនិយោគិនអាចដាក់ពាក្យស្នើសុំចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់ (QIP) តាមប្រព័ន្ធអនឡាញបានពីគ្រប់ទីកន្លែង និងគ្រប់ពេលវេលា។
ឯកឧត្តម ឧបនាយករដ្ឋមន្ត្រី បានលើកឡើងនៅក្នុងព្រឹត្តិការណ៍វេទិកាធុរកិច្ច ដោយបានគូសបញ្ជាក់ថា ការដាក់ពាក្យ និងការទទួលបានវិញ្ញាបនបត្រចុះបញ្ជីគម្រោង គឺសុទ្ធសឹងតែធ្វើឡើងជាទម្រង់ឌីជីថល។ ពិសេសជាងនេះនៅពេលឆាប់ៗខាងមុខ ប្រព័ន្ធនេះក៏នឹងឈានទៅដល់ការតភ្ជាប់ជាមួយក្រសួង-ស្ថាប័នពាក់ព័ន្ធផងដែរ ។ ប្រព័ន្ធនេះ ជាសមិទ្ធផលសំខាន់មួយរបស់រដ្ឋាភិបាលក្នុងការកែទម្រង់ និងលើកកម្ពស់បរិយាកាសវិនិយោគក្នុងប្រទេស។
ឯកឧត្តម ស៊ុន ចាន់ថុល បានបញ្ជាក់ថា៖
«យើងបានដាក់ប្រព័ន្ធនេះឱ្យដំណើរការសាកល្បងជាលក្ខណៈផ្ទៃក្នុង ហើយគ្រោងនឹងដាក់ឱ្យដំណើរការប្រព័ន្ធនេះជាផ្លូវការនៅថ្ងៃទី២៧ ខែវិច្ឆិកាខាងមុខនេះ ។ វិនិយោគិនទាំងអស់អាចដាក់ពាក្យតាមអនឡាញសម្រាប់គម្រោងវិនិយោគតាមរយៈប្រព័ន្ធនេះ ដែលនឹងផ្តល់ភាពកាន់តែងាយស្រួល និងទាន់ពេលវេលា»។
សូមជម្រាបថា គម្រោងវិនិយោគ ដែលមានលក្ខណៈសម្បត្តិគ្រប់គ្រាន់ អាចរួមបញ្ចូលដំណាក់កាលមួយ ឬច្រើន រួមទាំងកម្មវិធីពង្រីកគម្រោងវិនិយោគ ដែលមានលក្ខណៈសម្បត្តិគ្រប់គ្រាន់ផងដែរ។ គម្រោងវិនិយោគដែលមានលក្ខណៈសម្បត្តិគ្រប់គ្រាន់អាចមានសិទ្ធិទទួលបានការលើកទឹកចិត្តពន្ធ ដូចជាការលើកលែងពីការបង់ប្រាក់ជាមុន១ ភាគរយនៃពន្ធលើប្រាក់ចំណូល និងការលើកលែងពន្ធអប្បបរមា។
ឯកឧត្តម ឧបនាយករដ្ឋមន្ត្រី ស៊ុន ចាន់ថុល បានបន្តថា ៖
«កម្ពុជាបានមើលឃើញពីការកើនឡើងនៃការវិនិយោគ ដោយសារតែកម្ពុជាមានសន្តិភាព ស្ថិរភាពនយោបាយ ស្ថិរភាពម៉ាក្រូសេដ្ឋកិច្ច និងកិច្ចព្រមព្រៀងពាណិជ្ជកម្មសេរីពហុភាគី និងទ្វេភាគី ដូចជាកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) កិច្ចព្រមព្រៀងពាណិជ្ជកម្មសេរីទ្វេភាគីជាមួយប្រទេសចិន កូរ៉េខាងត្បូង និងអេមីរ៉ាតអារ៉ាប់រួម»។
សូមជ្រាបថា ក្នុងរយៈពេល១០ខែនៃឆ្នាំ២០២៤ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគចំនួន៣៤៦ ដែលមានទុនសរុបចំនួន ៥.៥ ពាន់លានដុល្លារអាមេរិក មានការកើនឡើង ៣៨% បើធៀបនឹងរយៈពេលដូចគ្នាក្នុងឆ្នាំ២០២៣។ ដោយគម្រោងវិនិយោគភាគច្រើនផ្តោតលើឧស្សាហកម្ម ហេដ្ឋារចនាសម្ព័ន្ធ ថាមពល កសិកម្ម និងទេសចរណ៍ ហើយប្រភពសំខាន់នៃការវិនិយោគមានមកពីប្រទេសចិន បន្ទាប់មកគឺការវិនិយោគក្នុងស្រុក។
គិតត្រឹមខែតុលា ឆ្នាំ២០២៤ កម្ពុជាមានកិច្ចព្រមព្រៀងពាណិជ្ជកម្មសេរីទ្វេភាគី និងតំបន់ចំនួន ៤ រួមមាន កិច្ចព្រមព្រៀងពាណិជ្ជកម្មសេរីកម្ពុជា-ចិន (CCFTA) កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ (CKFTA) កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយកម្ពុជា-អេមីរ៉ាតអារ៉ាប់រួម (CEPA) និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ៕
Account
Security
Favourite Content