ភ្នំពេញ ៖ ក្នុងរយៈពេលពេញឆមាសទី១ ឆ្នាំនេះ ទំហំពាណិជ្ជកម្មកម្ពុជា ជាមួយបណ្តាប្រទេសសមាជិកអាស៊ាន មានតម្លៃ ៧,១ ពាន់លានដុល្លារអាមេរិក ដែលស្មើនឹង ៣០ ភាគរយនៃពាណិជ្ជកម្មអន្តរជាតិសរុបរបស់ព្រះរាជាណាចក្រកម្ពុជា ថយចុះប្រមាណ១៧ភាគរយ ។

របាយការណ៍របស់ក្រសួងពាណិជ្ជកម្ម បានបង្ហាញថា ចាប់ពីខែមករាដល់ខែមិថុនា ការនាំចេញសរុបរបស់កម្ពុជាទៅកាន់បណ្តាប្រទេសអាស៊ាន ក្នុងទំហំទឹកប្រាក់ជាង ២,៤ ពាន់លានដុល្លារ កើនឡើង ៣៦ ភាគរយ ខណៈការនាំចូលសរុបមានប្រមាណ ៤,៦ ពានលានដុល្លារ ថយចុះ ៣១ ភាគរយធៀបនឹងឆ្នាំមុន។

ការនាំចេញរបស់កម្ពុជា ជាមួយបណ្ដាប្រទេសអាស៊ានរួមមាន ប្រទេសវៀតណាម ជាង ១៤០០លានដុល្លារ កើនឡើង២២ភាគរយ នាំចូលមានប្រមាណ ១៨០០លានដុល្លារ ថយចុះ១០ភាគរយ, ប្រទេសថៃ ៥២៧លានដុល្លារ កើន៦ភាគរយ នាំចូលប្រមាណ ១៤០០លានដុល្លារ ថយចុះ ២០ភាគរយ, សិង្ហបុរី មានចំនួន ៤១៥លានដុល្លារអាមេរិក កើនឡើងប្រមាណ៥០០ភាគរយ  នាំចូលមានប្រមាណ ៣៧១ ថយចុះ៨២ភាគរយ។

យោងតាមក្រសួងពាណិជ្ជកម្មបានឱ្យដឹងថា ជាទូទៅកម្ពុជានាំចេញផលិតផលកសិកម្ម សម្លៀកបំពាក់ ស្បែក​ជើង ផលិតផលធ្វើដំណើរ គ្រឿងអេឡិចត្រូនិក និងកង់ ទៅកាន់ប្រទេសអាស៊ាន ចំណែកឯការនាំចូលរួមមាន ម្ហូបអាហារ ភេសជ្ជៈ ឧបករណ៍អគ្គិសនី និងអេឡិចត្រូនិច សម្ភារៈសំណង់ គ្រឿងយន្តកសិកម្ម និងរថយន្ត។ ក្នុងឆមាសទីមួយនៃឆ្នាំ២០២៣ ទំហំពាណិជ្ជកម្មអន្តរជាតិរបស់កម្ពុជាមានចំនួនសរុប ២៣,៦ ពាន់លានដុល្លារ ធ្លាក់ចុះ ១៣ ភាគរយ ធៀបនឹងរយៈពេលដូចគ្នាកាលពីឆ្នាំមុន។

តាមការវាយតម្លៃ និងព្យាករណ៍របស់ការិយាល័យស្រាវជ្រាវម៉ាក្រូសេដ្ឋកិច្ចអាស៊ានបូក៣ (AMRO) សេដ្ឋកិច្ចអាស៊ានកំពុងងើបឡើងវិញ ជាមួយនឹងការសម្រេចបាននូវកំណើនផលិតផលក្នុងស្រុកសរុប (GDP) ក្នុងអត្រា ៣,១ភាគរយក្នុងឆ្នាំ២០២១ ជាមួយនឹងការរំពឹងទុកនូវកំណើនក្នុងអត្រា ៥,៣ភាគរយ និង ៤,៩ភាគរយ ក្នុងឆ្នាំ២០២២ និង ឆ្នាំ២០២៣ រៀងគ្នា។ ក្រុមប្រទេសអាស៊ានរួមមាន ប្រ៊ុយណេ កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ និងប្រទេស វៀតណាម។

ប្រធាននាយកដ្ឋានសេដ្ឋកិច្ចអន្តរជាតិ នៃវិទ្យាស្ថានទំនាក់ទំនងអន្តរជាតិ-កម្ពុជា នៃរាជបណ្ឌិត្យសភាកម្ពុជា បណ្ឌិត ហុង វណ្ណៈ បានប្រាប់ AMS ថាពាណិជ្ជកម្មកម្ពុជា-អាស៊ាន ក៏ដូចជាការរួមចំណែករបស់ប្រទេសសមា​ជិក RCEP ដែរ ដែលជាកិច្ចខិតខំប្រឹងប្រែងស្តារសេដ្ឋកិច្ចក្នុងតំបន់ ដោយការផ្តល់លទ្ធភាពទទួលបានទីផ្សារកាន់តែធំទូលាយសម្រាប់ប្រទេសសមាជិក។

លោកបណ្ឌិត ហុង វណ្ណៈ បានមានប្រសាសន៍ថា ៖«ពាណិជ្ជកម្មក្នុងតំបន់នេះ ជាទីផ្សារសេរី ពង្រឹងសមាហរណកម្មសេដ្ឋកិច្ចតំបន់ គាំទ្រដល់ប្រព័ន្ធពាណិជ្ជកម្មបើកចំហ និងបរិយាបន្ន ដោយវាជាយន្តការនៃកិច្ចព្រមព្រៀងទ្វេភាគី FTA រវាងកម្ពុជា ជាមួយនឹងបណ្ដាប្រទេសសមាជិកអាស៊ានដទៃទៀ»។

គួរបញ្ជាក់ថា អាស៊ានគឺជាទីផ្សារធំទី៣ក្នុងតំបន់អាស៊ី និងជាទីផ្សារធំទី៦របស់ពិភពលោក។ រំហូរទុនវិនិយោគមកក្នុងតំបន់អាស៊ាន បានងើបឡើងវិញគួរឱ្យកត់សម្គាល់ ក្នុងទំហំទឹកប្រាក់ប្រមាណ ១៧០ ប៊ីលានដុល្លារអាមេ  រិកនៅឆ្នាំ២០២១ ដែលចំនួននេះ ស្មើនឹងរំហូរទុនវិនិយោគសរុបនៅឆ្នាំ២០១៩ មុនពេលតំបន់អាស៊ានទាំងមូលទទួលរងនូវផលប៉ះពាល់ពីជម្ងឺជំងឺកូវីដ-១៩៕