សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ បន្ទាប់ពីស្ពានឆ្លងទន្លេសាបបានសាងសង់រួចជាបន្តបន្ទាប់ គេសង្កេតឃើញថា តំបន់ជ្រោយចង្វារកាន់តែមានភាពទាក់ទាញ ហើយរំពឹងថានឹងក្លាយជាតំបន់ពាណិជ្ជកម្មចម្រុះផងដែរ ក្រោយផ្សារទំនើបដ៏ធំមួយរបស់ប្រទេសថៃ បានប្រកាសពីកិច្ចសហការជាមួយក្រុមហ៊ុន OCIC បង្កើតទីតាំងនៅតំបន់ទីក្រុងរណបជ្រោយចង្វារ ។
អ្វីដែលគួរឱ្យកត់សម្គាល់ នៅមុនចូលឆ្នាំខ្មែរកន្លងទៅនេះ ក្នុងចំណោមសមិទ្ធផលសំខាន់ៗចំនួន២ រួមមានស្ពានអាកាសឬស្សីកែវ និងស្ពានបេតុងខ្សែកាបឆ្លងទន្លេសាបពីឬស្សីកែវទៅជ្រោយចង្វារបានដាក់ដំណើរការ និងបង្កឱ្យមានភាពស្រួលដល់ការធ្វើដំណើររបស់ពលរដ្ឋពីតំបន់មួយទៅតំបន់មួយទៀត ។
ដោយឡែក កាលពីចុងសប្ដាហ៍កន្លងទៅនេះ ផ្សារទំនើបដ៏ល្បីរបស់ថៃ Big C បានប្រកាសពីកិច្ចសហប្រតិបត្តិការជាមួយក្រុមហ៊ុន OCIC ក្នុងការបង្កើតទីតាំងផ្សារទំនើបនៅតំបន់ទីក្រុងរណបជ្រោយចង្វារលើផ្ទៃដី ២,៧ហិចតា ។ ផ្សារទំនើបនេះ នឹងត្រូវបានសាងសង់ឡើងនៅជាប់នឹងរង្វង់មូលនាងមច្ឆា ហើយក៏ជាទីតាំងដែលមានមនុស្សឆ្លងកាត់ច្រើនផងដែរ ។
អ្នកជំនាញនៃវិស័យអចលនទ្រព្យបានបង្ហាញថា តំបន់ណាដែលមានការអភិវឌ្ឍហេដ្ឋារចនាសម្ព័ន្ធច្រើន តំបន់នោះតែងតែទទួលបានគម្រោងវិនិយោគច្រើនដូចគ្នានិងជាទីតាំងដែលទាក់ទាញដល់វិនិយោគិនក្នុងការបណ្ដាក់ទុនវិនិយោគផងដែរ។
លោក ថាន់ ចាន់ណា អគ្គនាយកក្រុមហ៊ុន ចាន់ណា លែន បានឱ្យដឹងផងដែរថា នៅពេលមានការអភិវឌ្ឍកាន់តែខ្លាំង តំបន់ជ្រោយចង្វារ និងផ្លូវជាតិលេខ៦A ក៏កាន់តែទាក់ទាញលើការវិនិយោគពីសំណាក់វិនិយោគិនក្នុង និងក្រៅប្រទេសផងដែរ ហើយនៅពេលមានការវិនិយោគកាន់តែច្រើន តម្លៃដីធ្លីនៅតំបន់នោះក៏កាន់តែមានការឡើងខ្ពស់ផងដែរ ដែលជំរុញឱ្យវិនិយោគិនត្រូវអភិវឌ្ឍអចលនទ្រព្យប្រភេទណាដែលមានតម្លៃខ្ពស់ដូចគ្នាដើម្បីរកប្រាក់ចំណេញបាន។
លោក ប៉ូ អ៊ាវគង់ អគ្គនាយកក្រុមហ៊ុន Advance ក៏បានឱ្យដឹងដែរថា តំបន់ជ្រោយចង្វារ ជាពិសេសនៅតាមបណ្ដោយផ្លូវជាតិលេខ៦A ឃើញថាមានការអភិវឌ្ឍលំនៅឋានដែលមានតម្លៃខ្ពស់ៗជាច្រើនគម្រោង ដូចជា បុរីប៉េងហួត ឌឹផ្លរ៉ា អ័រគីដេ វិមានភ្នំពេញ មេគង្គលេន រួមជាមួយនឹងគម្រោងបុរីជាច្រើនទៀតកម្រិតអភិជនដែលកំពុងបន្តសកម្មភាពអភិវឌ្ឍន៍ឥតឈប់ឈរ។
លោកបន្តថាទៀត ជាការពិតណាស់ នៅពេលដែលតំបន់ណាមានការអភិវឌ្ឍខ្លាំង ជាពិសេសវិស័យលំនៅដ្ឋាន នឹងជួយជំរុញឱ្យមានកំណើនប្រជាសាស្ត្រកាន់តែច្រើន រួមជាមួយនឹងការលេចចេញនូវមជ្ឈមណ្ឌលពាណិជ្ជកម្មចម្រុះផ្សេងៗផងដែរ ដែលទាំងអស់នេះសុទ្ធតែជាចលករជួយជំរុញឱ្យមានតម្រូវការប្រើប្រាស់ដីធ្លីខ្ពស់៕
Account
Security
Favourite Content