សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ស្ត្រី បានចូលរួមចំណែកយ៉ាងសំខាន់ក្នុងវិស័យឧស្សាហកម្ម និងសហគ្រាសធុនតូច និងមធ្យមនៅកម្ពុជា។ ជាក់ស្ដែង ក្នុងឆ្នាំ២០២៤ កម្ពុជាមានរោចក្រធុនធំកំពុងដំណើរការចំនួន ២ ៤២៥ ក្នុងនោះរោងចក្រធុនធំកើតថ្មីចំនួន ៣២៦ ដែលមានកម្លាំងពលកម្មស្ត្រីចំនួន ៨៥៤ ៨១៩ នាក់ ក្នុងចំណោមកម្មករចំនួន ១ ១៦០ ១៨១នាក់។
ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្របច្ចេកវិទ្យា និងនវានុវត្តន៍ នៅក្នុងពិធីអបអរខួបលើកទី១១៤ទិវាអន្តរជាតិនារី៨មីនាកាលពីថ្ងៃទី៥ ខែមីនា នៅទីស្តីការក្រសួង បានថ្លែងថា សហគ្រិនស្ត្រី បានដើរតួយ៉ាងសំខាន់ក្នុងវិស័យសេដ្ឋកិច្ច ដោយបច្ចុប្បន្នកំពុងដឹកនាំ ឬជាម្ចាស់សហគ្រាសធុនតូច និងមធ្យមចំនួន ៨ ៣៤៧ មូលដ្ឋាន ដែលផ្តល់ការងារដល់ស្ត្រីជាង ១៤៥ ០០០ នាក់។
ឯកឧត្តមរដ្ឋមន្ត្រីបានបញ្ជាក់ថា៖
«ទំហំផលិតផលរបស់កម្ពុជាដែលបាននាំចេញទៅក្រៅប្រទេស គឺមួយចំណែកធំកើតចេញពីថ្វីដៃរបស់ស្ត្រី ដែលជាកម្មការនីកំពុងធ្វើការនៅតាមរោងចក្រ សហគ្រាស មូលដ្ឋានផលិតកម្មនៅគ្រប់តំបន់ទូទាំងប្រទេស ហើយនេះ ជាគុណបំណាច់ធំធេងរបស់ស្ត្រី ក្នុងការរួមវិភាគទានដល់ការអភិវឌ្ឍសង្គម-សេដ្ឋកិច្ច»។
ឯកឧត្តម ហែម វណ្ឌី បានគូសបញ្ជាក់ពីកិច្ចខិតខំប្រឹងប្រែងជាបន្តបន្ទាប់របស់រដ្ឋាភិបាលក្នុងការគាំទ្រដល់ស្ត្រីតាមរយៈគោលនយោបាយនានា ដែលលើកកម្ពស់លទ្ធភាពទទួលបានការអប់រំ ឱកាសសេដ្ឋកិច្ច និងតួនាទីជាអ្នកដឹកនាំ ដោយធានាថាស្ត្រីបន្តជាភ្នាក់ងារជំរុញវឌ្ឍនភាពសេដ្ឋកិច្ច និងសង្គមរបស់កម្ពុជា។
ជាមួយគ្នានេះ ឯកឧត្តមក៏បានលើកទឹកចិត្តស្ត្រីឱ្យពង្រឹងជំនាញ និងសមត្ថភាពរបស់ខ្លួន ព្រមទាំងអំពាវនាវដល់អ្នកដឹកនាំទាំងអស់ ឱ្យបង្កបរិយាកាសអំណោយផល ដើម្បីឱ្យស្ត្រីមានតួនាទីក្នុងការធ្វើសេចក្តីសម្រេចចិត្ត និងតួនាទីដឹកនាំកាន់តែច្រើន។ក្រសួងឧស្សាហកម្មលើកម្ពស់ភាពអង់អាចសម្រាប់ស្ត្រី ជាកម្លាំងជំរុញកំណើនសេដ្ឋកិច្ច និងការផ្លាស់ប្តូរមុខមាត់ថ្មីក្នុងសង្គម។
ថ្លែងក្នុងពិធីអបអរខួបលើកទី១១៤ ទិវាអន្តរជាតិនារី ៨មីនា របស់ក្រសួងឧស្សាហកម្ម វិទ្យាសាស្ត្របច្ចេកវិទ្យា និងនវានុវត្តន៍ សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា និងជាប្រធានសមាគមនារីកម្ពុជា ដើម្បីសន្តិភាព និងអភិវឌ្ឍន៍ ថ្នាក់កណ្តាលបានលើកឡើងថា របៀបវារៈគោលនយោបាយ និងយុទ្ធសាស្ត្រអភិវឌ្ឍន៍របស់រាជរដ្ឋាភិបាលកម្ពុជា មានគោលដៅ កសាងសង្គមមួយប្រកបដោយយុត្តិធម៌ មានអារ្យធម៌ខ្ពស់ ប្រកបដោយសីលធម៌ សមធម៌ និងបរិយាបន្ន ដែលក្នុងនោះ “ស្ត្រីគឺជាស្នូល”។
សម្តេចកិត្តិសង្គហបណ្ឌិត បានបន្ថែមថា៖
«រាជរដ្ឋាភិបាលកម្ពុជាបានបន្តកំណត់ការលើកកម្ពស់សមភាពយេនឌ័រ និងការបង្កើនភាពអង់អាចរបស់ស្ត្រី និងក្មេងស្រីនៅគ្រប់វិស័យជាអាទិភាព រួមមានវិស័យសេដ្ឋកិច្ច អប់រំ និងសុខភាពជាដើម»។
Account
Security
Favourite Content