សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ គម្រោងអភិវឌ្ឍន៍ជលផលក្រោយប្រមូលផល (CAPFISH) បានឈានដល់ដំណាក់កាលបញ្ចប់ដោយសម្រេចបាននូវសមិទ្ធផលជាច្រើនសម្រាប់វិស័យម្ហូបអាហារ និងជលផល តាមរយៈនវានុវត្តន៍ ការស្រាវជ្រាវ និងភាពជាដៃគូចម្រុះវិស័យ។ នៅក្នុងសិក្ខាសាលាបិទបញ្ចប់គម្រោងនាថ្ងៃទី៧ ខែតុលា ឆ្នាំ២០២៥ តំណាងស្ថាប័ននៃរាជរដ្ឋាភិបាល វិស័យឯកជន ដៃគូអភិវឌ្ឍន៍ និងសាកលវិទ្យាល័យ បានពិនិត្យសមិទ្ធផលសំខាន់ៗដែលសម្រេចបាន និងពិភាក្សាអំពីយុទ្ធសាស្ត្រនិរន្តរភាពរបស់គម្រោង។
ឯកឧត្តម បណ្ឌិត ហ៊ុល សៀងហេង អនុរដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងថា គម្រោងនេះបានកសាងមូលដ្ឋានគ្រឹះសម្រាប់របៀបវារៈជាតិស្តីពីការស្រាវជ្រាវអនុវត្ត(applied research)កម្មសិទ្ធិបញ្ញា ការផ្ទេរបច្ចេកវិទ្យា ការអនុវត្តម៉ាកសម្គាល់ភូមិសាស្ត្រទំនិញ (GI) និងសន្ទស្សន៍នវានុវត្តន៍ ដើម្បីពង្រឹងឧស្សាហកម្មម្ហូបអាហារ និងផលិតផលជលផលរបស់កម្ពុជា។
ឯកឧត្តមបានសង្កត់ធ្ងន់ថា៖
«នវានុវត្តន៍ ការស្រាវជ្រាវ និងអភិវឌ្ឍន៍ គឺជាឧបករណ៍ដ៏មានឥទ្ធិពលសម្រាប់កសាងឧស្សាហកម្មម្ហូបអាហារប្រកបដោយនិរន្តរភាពហើយបទពិសោធនៃគម្រោង CAPFISH +នឹងជួយពង្រឹងយុទ្ធសាស្ត្ររបស់យើងសម្រាប់ពេលអនាគត»។
សិក្ខាសាលាបានរំលេចនូវសមិទ្ធផលសំខាន់ៗរបស់គម្រោង ដូចជាការដាក់ឱ្យដំណើរការថ្នាលបច្ចេកវិទ្យា ស្រាវជ្រាវ និងនវានុវត្តន៍ម្ហូបអាហារ (FTRIP) ការបង្កើតមជ្ឈមណ្ឌលវេចខ្ចប់កម្ពុជា (CPC) ការបង្កើតគំរូគោលនយោបាយកម្មសិទ្ធិបញ្ញាកម្រិតសាកលវិទ្យាល័យ ការចុះបញ្ជីប្រហុកសៀមរាបជាម៉ាកសម្គាល់ប្រភេទភូមិសាស្ត្រ (GI) និងការអនុវត្តគោលការណ៍ណែនាំស្តីពីនវានុវត្តន៍សហគ្រាសកម្ពុជាជាដើម។
លោកបណ្ឌិត ឈួន ចំណាន ប្រធាននាយកដ្ឋានបច្ចេកវិទ្យាកែច្នៃ និងគុណភាព នៃរដ្ឋបាលជលផល បានលើកឡើងថា សមិទ្ធផលទាំងនេះបង្កើតបានជាមូលដ្ឋានដ៏រឹងមាំសម្រាប់ការប្រកួតប្រជែងរយៈពេលវែងក្នុងវិស័យ កសិ-អាហារ និងជលផលរបស់កម្ពុជា។
ជាមួយគ្នានោះ បណ្ឌិត Thombathu Seetharama Shetty ទីប្រឹក្សាបច្ចេកទេសជាន់ខ្ពស់នៃអង្គការ UNIDO ក៏បានរំលេចដែរថា ថ្នាលបច្ចេកវិទ្យា ស្រាវជ្រាវ និងនវានុវត្តន៍ម្ហូបអាហារ បានផ្សារភ្ជាប់ការស្រាវជ្រាវជាមួយនឹងតម្រូវការក្នុងឧស្សាហកម្ម ដោយប្រែក្លាយលទ្ធផលវិទ្យាសាស្ត្រឱ្យទៅជានវានុវត្តន៍ជាក់ស្តែងសម្រាប់សហគ្រាសកម្ពុជា និងបង្កើនសមត្ថភាពប្រកួតប្រជែងនៅលើឆាកអន្តរជាតិ។
គម្រោង CAPFISH-Capture បានទទួលមូលនិធិពីសហភាពអឺរ៉ុប ដែលអនុវត្តដោយរដ្ឋបាលជលផល ក្រោមការគាំទ្របច្ចេកទេសពីអង្គការ UNIDO។ គម្រោងនេះគ្រោងនឹងបញ្ចប់នៅខែធ្នូ ឆ្នាំ២០២៥ ហើយសមិទ្ធផលរបស់គម្រោងត្រូវបានរំពឹងថា នឹងបន្តជំរុញកិច្ចសហប្រតិបត្តិការ បង្កើនភាពធន់ និងភាពប្រកួតប្រជែងនៃវិស័យកសិ-អាហារ និងជលផលរបស់កម្ពុជា៕
Account
Security
Favourite Content