ភ្នំពេញ៖ ប្រទេសកម្ពុជា​ទទួលបានប្រាក់​ជាង ៧,៦​ ពាន់​លាន​ដុល្លារ​ពី​ការនាំចេញ​ទំនិញ​ទៅ​ទីផ្សារ​អាមេរិក​នៅក្នុងរ​យៈ​ពេល ៩ ​ខែ​ដើមឆ្នាំ​២០២៤ កើន​ជាង ១០ ​ភាគរយ បើ​ធៀប​រយៈពេល​ដូចគ្នា​ឆ្នាំ​២០២៣​ ខណៈ​អាមេរិក​នៅតែ​ជា​ប្រទេស​នាំមុខគេ​ដែល​ទទួល​ទិញ​ទំនិញ​ពី​កម្ពុជា គឺ​ចំនួន​ជិត ១/៣ ​នៃ​ទឹកប្រាក់​នាំចេញ​សរុប​។ នេះ​បើតាម​អគ្គនាយក​ដ្ឋា​ន​គយ និង​រដ្ឋាករ​កម្ពុជា ​(GDCE)​។​

​បើយោងតាម GDCE ចាប់ពី​ខែមករា​ ដល់ខែកញ្ញា ឆ្នាំ​២០២៤ ការនាំចេញ​-​នាំចូល​ទំនិញ​រវាង​កម្ពុជា និង​អាមេរិក មាន​ចំនួន​សរុប ៧,៨​ ពាន់​លាន​ដុល្លារ កើនជាង ១០​ ភាគ​រយ​បើ​ធៀប​រយៈពេល​ដូចគ្នា​ឆ្នាំ​ ២០២៣ ដែលមានជាង ​៧ ​ពាន់​លាន​ដុល្លារ ក្នុងនោះ​ទំនិញ​កម្ពុជា​នាំទៅ​អាមេរិក ចំនួន ៧,៦​ ពាន់​លាន​ដុល្លារ កើន ១០,៣ ភាគរយ ចំណែក​ទំនិញ​អាមេរិក​នាំមក​កម្ពុជា​ចំនួន ១៩៣ ​លាន​ដុល្លារ កើន ៦,៧​ ភាគរយ​។​

នៅក្នុងរយៈពេល ៩ ខែ គិតចាប់ពីខែមករា ដល់ខែកញ្ញា ឆ្នាំ ២០២៤ កម្ពុជាសម្រេចបាន​ទឹក​ប្រាក់​ជាង ១៩,៨៣ ពាន់ លានដុល្លារ ពីការ​នាំទំនិញចេញទៅក្រៅប្រទេស ​កើន​ឡើង ១៧ ភាគរយ បើធៀបនឹងរយៈ​ពេលដូចគ្នាក្នុងឆ្នាំ ២០២៣ ដែលមានទំហំទឹកប្រាក់ ១៦,៩៤ ពាន់​លានដុល្លារ។ នេះ​បើយោងតាម​ទិន្ន​​ន័យ​របស់ ​GDCE​ ។ ការនាំចេញទំនិញ​របស់កម្ពុជាមានទំហំទឹកប្រាក់ ១៩,៨៣ ពាន់លានដុល្លារ កើន​ឡើង ១៧% ចំណែកឯការនាំទំនិញចូលមកវិញមានទំហំទឹកប្រាក់ ២១,១០ ពាន់លានដុល្លារ កើនឡើង ១៥,៩%។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានមានប្រសាសន៍ប្រាប់ AMS Economy នារសៀលថ្ងៃទី១៤ ខែតុលា ថា៖

« ការកើនឡើងនៃការនាំចេញរបស់កម្ពុជាទៅកាន់សហរដ្ឋអាមេរិកនេះ ជាសញ្ញាណល្អមួយសម្រាប់សេដ្ឋកិច្ចកម្ពុជា និងអាមេរិក។ នេះក៏អាចជាឱកាសល្អចំពេលប្រទេសមួយចំនួនក្នុងតំបន់មានអស្ថិរភាពដែលធ្វើឱ្យមានការបញ្ជាទិញពីសហរដ្ឋអាមេរិកមកកាន់កម្ពុជាកើនឡើង»។

អ្នកឧកញ៉ា បានបញ្ជាក់ថា៖ មិនត្រឹមតែការនាំចេញពីកម្ពុជាទៅអាមេរិកមានការកើនឡើងប៉ុណ្ណោះទេ ការនាំចូលពីអាមេរិកក៏មានការកើនឡើងដូចគ្នាផងដែរ។

អ្នកឧកញ៉ាអនុប្រធានសភាពាណិជ្ជកម្មកម្ពុជា បានបន្តលើកឡើងថា៖

« ទំនាក់ទំនងកម្ពុជា និងអាមេរិក កាន់តែល្អប្រសើរ ជាពិសេស រវាងសភាពាណិជ្ជកម្មកម្ពុជា ដែលមានការិយាល័យតំណាងនៅរដ្ឋកាលីហ្វ័រញ៉ា ។ ថ្មីៗនេះ ឯកឧត្តមឧបនាយករដ្ឋមន្ត្រី ស៊ុន ចាន់ថុល ក៏បានទៅទាក់ទាញវិនិយោគនៅសហរដ្ឋអាមេរិក ហើយសភាពាណិជ្ជកម្មកម្ពុជា ក៏បានទៅតាំងពិព័រណ៍ផលិតផលចំនួន២លើករួចហើយនៅទឹកដីអាមេរិក ក្នុងគោលបំណងទាក់ទាញការវិនិយោគ»។

អ្នកឧកញ៉ា បានបន្ថែមថា៖ តាមរយៈការគោះទ្វារវិនិយោគនៅអាមេរិក និងការតាំងពិព័រណ៍របស់សភាពាណិជ្ជកម្មនៅអាមេរិក ក៏ដូចជាសកម្មភាពបង្កើតឱកាសវិនិយោគរបស់ការិយាល័យតំណាងសភាពាណិជ្ជកម្មកម្ពុជានៅអាមេរិក រំពឹងថាពាណិជ្ជកម្ម កម្ពុជា-អាមេរិក នឹងកាន់តែល្អប្រសើរ និងកើនឡើងថែមទៀត៕