សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានជំរុញឱ្យក្រសួងសាធារណការ និងក្រុមហ៊ុនរ៉ូយ៉ាល់គ្រុប បញ្ចប់ការចរចាគម្រោងផ្លូវដែកយ៉ាងយូរត្រឹមដំណាច់ឆ្នាំ ២០២៤នេះ និងឈានដល់ការចុះអនុស្សរណៈយោគយល់គ្នា ដើម្បីដំណើរការគម្រោងនេះ ហើយបើសិនជាមិនបញ្ចប់ក្នុងឆ្នាំ២០២៤នេះទេ សម្ដេចនឹងដកគម្រោងនេះចេញវិញ ។
មានប្រសាសន៍នៅក្នុងពិធីអបអរសាទរខួប ២០ឆ្នាំ កម្ពុជាចូលជាសមាជិកអង្គការពាណិជ្ជកម្មពិភពលោក នៅព្រឹកថ្ងៃទី១៤ ខែតុលា ឆ្នាំ២០២៤ សម្ដេចមហាវបរធិបតី ហ៊ុន ម៉ាណែត បានមានប្រសាសន៍ថា កម្ពុជាបានអភិវឌ្ឍន៍ប្រព័ន្ធហេដ្ឋារចនាសម្ព័ន្ធជាច្រើន រួមមានផ្លូវជាតិ ផ្លូវទឹក ផ្លូវល្បឿនលឿន ។ ក្រៅពីនេះ កម្ពុជាក៏មានផ្លូវដែក និងកំពុងធ្វើបច្ចុប្បន្នលើកកម្រិតគុណភាពផ្លូវដែកឱ្យបានកាន់តែប្រសើរផងដែរ ។
សម្ដេចធិបតីបន្តថា សម្រាប់គម្រោងផ្លូវដែក សម្ដេចធិបតីបានឱ្យគោលការណ៍ទៅក្រសួងពាក់ព័ន្ធ និងក្រុមហ៊ុនឯកជន ធ្វើការចរចាគ្នា ដើម្បីធ្វើយ៉ាងណាឱ្យបញ្ចប់ការចរចា និងឈានទៅចុះអនុស្សរណៈយោគយល់ ដើម្បីអនុវត្តគម្រោងជាផ្លូវការ ព្រោះគម្រោងផ្លូវដែកនេះបានកកស្ទះរាប់ឆ្នាំមកហើយ ដូច្នេះ មិនអាចទុកនៅបន្តទៀតទេ ។
សម្ដេចធិបតី ហ៊ុន ម៉ាណែត បញ្ជាក់ថា ៖
«បន្ទាប់ពីគម្រោងផ្លូវដែលមានស្រាប់បានបញ្ចប់ហើយ រាជរដ្ឋាភិបាលក៏នឹងឱ្យពិនិត្យលទ្ធភាពក្នុងការសិក្សាគម្រោងផ្លូវដែកទៅកាន់ប៉ែកខាងកើតនៃប្រទេស ពីព្រោះការដឹកជញ្ជូនតាមផ្លូវដែកនេះមានសារសំខាន់ណាស់ ស្របនឹងកម្ពុជាបាន និងកំពុងអភិវឌ្ឍហេដ្ឋារចនាសម្ព័ន្ធជាច្រើនហើយមកដែរ ។ បច្ចុប្បន្ននេះ យើងមានថវិកាមួយចំនួន ដើម្បីដំណើរការគម្រោងនេះ ដូច្នេះហើយយើងត្រូវចាប់ផ្ដើមដំណើរការគម្រោងនេះ បើសិនជាទុកទៅទៀតវាកាន់តែយូរ ។ ផ្លូវដែកនេះវាមានសារសំខាន់ណាស់ទាំងការដឹកជញ្ជូនមនុស្ស និងទំនិញ»។
លោកឧកញ៉ា ស៊ិន ចន្ធី ប្រធានសមាគមភស្តុភារកម្មកម្ពុជា បានលើកឡើងថា ការអភិវឌ្ឍហេដ្ឋារចនាសម្ព័ន្ធកាន់តែច្រើន នឹងធ្វើឱ្យថ្លៃដើមនៃការដឹកជញ្ជូនរបស់កម្ពុជាកាន់តែធ្លាក់ចុះ ធ្វើឱ្យកម្ពុជាមានភាពប្រកួតប្រជែងទាំងក្នុងស្រុក ក្នុងតំបន់ និងអន្តរជាតិ ។
លោកឧកញ៉ាបន្តថា តម្លៃដឹកជញ្ជូននៅមានកម្រិតខ្ពស់ ធ្វើឱ្យទំនិញរបស់កម្ពុជាក៏មានតម្លៃខ្ពស់ និងមានភាពពិបាកប្រកួតប្រជែងជាមួយទំនិញមកពីបណ្ដាប្រទេសនានា ក៏ដូចជាក្នុងតំបន់ និងអន្តរជាតិ ប៉ុន្តែបើសិនជាថ្លៃដឹកជញ្ជូនកាន់តែទាប នឹងធ្វើឱ្យការទំនិញធ្លាក់ចុះ ហើយអាចទាក់ទាញបានការវិនិយោគកាន់តែច្រើន ។
ពាក់ព័ន្ធនឹងគម្រោងផ្លូវដែកនេះដែរ រាជរដ្ឋាភិបាលកម្ពុជាក៏បាឱ្យក្រុមហ៊ុនចិនមួយសិក្សាគម្រោងលើកកម្ពស់ផ្លូវដែកដោយកែប្រែផ្លូវដែកបច្ចុប្បន្ននេះនេះទៅជាផ្លូវដែកល្បឿនលឿន តភ្ជាប់ពីភ្នំពេញទៅកាន់តំបន់ប៉ែកខាងជើង ( ភ្នំពេញ- ប៉ោយប៉ែត ) ។
តាមការសិក្សាក៏បានបង្ហាញថា គម្រោងនេះ ត្រូវការថវិកាប្រមាណ ៤ពាន់លានដុល្លារអាមេរិក ហើយគម្រោងនេះដែរ ក៏បានដាក់បញ្ចូលក្នុងផែនការមេ អភិវឌ្ឍន៍កម្ពុជាដល់២០៣៣ផងដែរ ។
គួរបញ្ជាក់ថា បច្ចុប្បន្ន កម្ពុជាមានផ្លូវដែកដែលកំពុងប្រើប្រាស់ចំនួនពីរខ្សែ គឺផ្លូវដែកតភ្ជាប់ពីភ្នំពេញទៅកាន់ក្រុងព្រះសីហនុ ផ្លូវដែកមួយខ្សែទៀតតភ្ជាប់ពីភ្នំពេញ ទៅកាន់ខេត្តបាត់ដំបង ដោយភាគច្រើនផ្ដោតលើការដឹកជញ្ជូនទំនិញ ៕
Account
Security
Favourite Content