សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ លោក សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) បានថ្លែងនៅក្នុងកិច្ចសម្ភាសន៍មួយកាលពីពេលថ្មីៗនេះថា សមាគមបាន និងកំពុងដើរតួនាទីសំខាន់ក្នុងការផលិតធនធានមនុស្សដើម្បីចូលរួមក្នុងការផ្ដល់សេវាកម្មប្រកបដោយគុណភាពនៅក្នុងវិស័យអចលនទ្រព្យក្នុងប្រទេសកម្ពុជា។
លោកបានមានប្រសាសន៍ឱ្យដឹងថា កន្លងមក និងពេលបច្ចុប្បន្ននេះ សមាគមបានរៀបចំនូវការបណ្ដុះបណ្ដាលវគ្គខ្លីៗដល់អ្នកដែលរកស៊ីក្នុងវិស័យអចលនទ្រព្យ ដើម្បីឱ្យពួកគាត់ទទួលបានចំណេះដឹងបន្ថែមពីវិស័យអចលនទ្រព្យ ។ ក្រៅពីនោះសមាគមក៏បានសហការជាមួយសាកលវិទ្យាល័យមួយចំនួនបង្រៀនផ្នែករដ្ឋបាលដីធ្លី ដែលជាការចូលរួមជួយដល់ការបណ្ដុះបណ្ដាលធនធានមនុស្សក្នុងការវាយតម្លៃវិស័យអចលនទ្រព្យផងដែរ ។
លោកបន្តថា សម្រាប់សមាគមខ្លួនឯងបានរៀបចំនូវវគ្គបណ្ដុះបណ្ដាលក្នុងមួយឆ្នាំ ២ ទៅ ៣ ដង ដូចជា ជំនាញវាយតម្លៃអចលនវត្ថុ ជំនាញភ្នាក់ងារអចលនវត្ថុ និងជំនាញគ្រប់គ្រងអចលនទ្រព្យ ដែលជំនាញទាំង ៣ នេះមានសារសំខាន់ណាស់ក្នុងការជួយជំរុញវិស័យអចលនទ្រព្យឱ្យកាន់តែរីកចម្រើន និងមានគុណភាព។
លោកបញ្ជាក់ថា ៖
« បច្ចុប្បន្ន ទីផ្សារអចលនទ្រព្យក្នុងប្រទេសកម្ពុជាមានការរីតលូតលាស់គួរឱ្យកត់សម្គាល់ ជាក់ស្ដែងក្នុងប្រទេសកម្ពុជាមានតំបន់ឧស្សាហកម្មច្រើន ការរៀបចំតំបន់កសិកម្មធំៗក៏មានច្រើន ហើយទាំងអស់នេះ សុទ្ធតែត្រូវការភ្នាក់ងារផ្ដល់ការប្រឹក្សា និងអ្នកវាយតម្លៃអចលនវត្ថុ ដើម្បីជួយកំណត់តម្លៃសម្រាប់អ្នក់ចង់លក់ និងអ្នកទិញអចលនទ្រព្យ» ។
អ្នកជំនាញនៃវិស័យនេះជាច្រើនបាននិយាយស្រដៀងគ្នាជុំវិញការត្រៀមខ្លួនក្នុងការទទួលយកឱកាសអភិវឌ្ឍន៍វិស័យអចលនទ្រព្យនៅក្នុងប្រទេសកម្ពុជា ក្នុងនោះធនធានមនុស្សក្នុងវិស័យអចលនទ្រព្យគឺមានសារសំខាន់ណាស់ ។ មានធនធានមនុស្សហើយត្រូវធ្វើឱ្យធនធានមនុស្សនោះស្របច្បាប់ ដោយត្រូវចុះបញ្ជីនៅក្នុងក្រសួងស្ថាប័នត្រឹមត្រូវ ពោលគឺបើជាក្រុមហ៊ុនត្រូវជាក្រុមហ៊ុនដែលមានអាជ្ញាបណ្ណពីក្រសួង និងមិនត្រូវធ្វើការ ឬធ្វើសកម្មភាពក្រៅផ្លូវច្បាប់ ។
បើតាមប្រធានសមាគមអ្នកវាយតម្លៃ និងភ្នាក់ងារអចលនវត្ថុ (CVEA) លោក សន សៀប បានប្ដេជ្ញាក្នុងការប្រមូលធនធានមនុស្សដែលកំពុងធ្វើសកម្មភាពនៅខាងក្រៅឱ្យចូលមកក្នុងសមាគម ដើម្បីរួមគ្នាពង្រឹងគុណភាពផ្ដល់សេវាក្នុងវិស័យអចលនទ្រព្យដល់វិនិយោគិន ទាំងក្នុង និងក្រៅប្រទេស៕
Account
Security
Favourite Content