បរទេស ៖ សហភាពអឺរ៉ុបបានប្រកាសធ្វើសង្គ្រាមពាណិជ្ជកម្មជាមួយនឹងចិនកាលពីដើមខែកក្កដានេះ តាមរយៈការបង្កើនតម្លៃពន្ធយ៉ាងច្រើនទៅលើការនាំចូលរថយន្តអគ្គិសនីចិនដែលបច្ចុប្បន្នកំពុងមានទីផ្សារខ្លាំងទាំងនៅអឺរ៉ុប និងអាស៊ី។

ចាប់ពីខែកក្កដាតទៅ ការនាំចូលរថយន្តអគ្គិសនីរបស់ចិនគ្រប់ប្រភេទនឹងត្រូវអនុវត្តជាមួយនឹងកាតព្វកិច្ចពន្ធនាំចូលដល់ទៅ៣៨ភាគរយលើសពីការនាំចូលចាស់ដែលមានត្រឹមតែ១០ភាគរយ។ អឺរ៉ុបអះអាងថា រថយន្តអគ្គិសនីទាំងនោះសុទ្ធតែមានជាប់ពាក់ព័ន្ធទៅនឹងក្រុមហ៊ុនដែលស្ថិតនៅក្រោមបុត្រសម្ព័ន្ធ និងការគាំទ្រពីក្រោយដោយក្រុមហ៊ុនរបស់រដ្ឋាភិបាលទីក្រុងប៉េកាំងដែលធ្វើឲ្យតម្លៃទីផ្សារមានកម្រិតទាបខ្លាំងធៀបទៅនឹងរថយន្តរបស់អឺរ៉ុប ហើយវានឹងអាចបណ្តាលឲ្យមានផលប៉ះពាល់ខ្លាំងដល់ក្រុមហ៊ុនអ្នកផលិតក្នុងស្រុករបស់ពួកគេ។ យ៉ាងណាក៏ដោយ បើទោះបីជាបានខិតខំចរចា និងសម្របសម្រួលជាច្រើនដងក៏ដោយ នៅទីបំផុត ចិននៅតែមិនអាចរារាំងការអនុវត្តច្បាប់ពន្ធថ្មីរបស់អឺរ៉ុបបាននោះឡើយ។

គិតត្រឹមថ្ងៃទី១០ខែកក្កដានេះ ចិនកំពុងបន្តធ្វើការស៊ើបអង្កេតទៅលើករណីអនុវត្តច្បាប់ប្រឆាំងទៅនឹងការប្រកួតប្រជែងតម្លៃជាមួយនឹងទំនិញរបស់អឺរ៉ុបមួយប្រភេទ គឺផលិតផលសាច់ជ្រូក និងផលិតផលដែលធ្វើពីសាច់ជ្រូកទាំងអស់ ហើយប្រសិនបើរកឃើញកំហុសណាមួយពិតមែននោះ ចិននឹងប្រើប្រាស់ច្បាប់ដែលគេស្គាល់ឈ្មោះថា Anti-Dumping ។

យ៉ាងណាក៏ដោយ ទោះបីជាមិនទាន់អាចប្រាកដប្រជាបានថា ចិនពិតជាអនុវត្តគោលការណ៍ច្បាប់ Anti-Dumping ដែលនឹងធ្វើឲ្យប៉ះពាល់ដល់កម្រិតណានៅឡើយ ប៉ុន្តែដោយផ្ទាល់វានឹងធ្វើឲ្យមានការកើនឡើងនៃតម្លៃទំនិញជាសាច់ជ្រូក និងផលិតផលធ្វើពីសាច់ជ្រូកដែលជាអាហារប្រចាំថ្ងៃដ៏មានប្រជាប្រជាប្រិយបំផុតរបស់ពលរដ្ឋចិន។ មិនត្រឹមតែប៉ុណ្ណោះអង្គការពាណិជ្ជកម្មពិភពលោកក៏នឹងអាចចូលរួមពាក់ព័ន្ធ និងធ្វើការវាយតម្លៃព្រមទាំងស៊ើបអង្កេតទៅលើការអនុវត្តច្បាប់ Anti-Dumping នេះផងដែរ។

គួរឲ្យដឹងថា គោលការណ៍ច្បាប់ Anti-Dumping គឺជាច្បាប់ដែលនឹងត្រូវអនុវត្តទៅលើទំនិញទាំងឡាយណាដែលរដ្ឋាភិបាលនៃប្រទេសមួយរកឃើញថា ការនាំចូលនៃទំនិញទាំងនោះធ្វើឡើងជាមួយនឹងតម្លៃទាបជាងទីផ្សារ ដែលវាអាចធ្វើឲ្យខូចតម្លៃទីផ្សារក្នុងស្រុក ពីព្រោះថាវាក៏ជាទំនិញដែលកំពុងផលិតនៅក្នុងស្រុកផងដែរ។

អ្វីដែលគេអាចមើលឃើញនោះគឺថា ការពិចារណាអនុវត្ត​ Anti-Dumping នេះគ្រាន់តែជាអ្វីដែលចិននឹងត្រូវប្រើប្រាស់ដំបូងបំផុតដើម្បីដាក់សំពាធត្រឡប់ទៅអឺរ៉ុបចំពោះបញ្ហាតម្លើងពន្ធរថយន្តអគ្គិសនីប៉ុណ្ណោះ ហើយចិន ក៏មិនងាយអនុវត្តវាទៅលើមុខទំនិញជាច្រើនទៀតនោះទេ ពីព្រោះថាវានឹងអាចបណ្តាលឲ្យមានបញ្ហាលើទីផ្សារផ្គត់ផ្គង់ទាំងក្នុង និងក្រៅប្រទេសរបស់ខ្លួន។

សូមរំលឹកដែរថា កាលពីឆ្នាំ២០២៣កន្លងទៅនេះ ចិននាំចូលសាច់ជ្រូកពីអ្នកផ្គត់ផ្គង់នៅអឺរ៉ុបក្នុងទំហំប្រមាណជា ៣ពាន់លានដុល្លារ ដែលទំហំនេះគិតជាចំណែកទីផ្សារផ្គត់ផ្គង់សរុបរបស់ប្រទេសចិនគឺមានទៅដល់ពាក់កណ្តាល ខណៈដែលទំហំពាណិជ្ជកម្មរវាងចិន និងអឺរ៉ុបកាលពីឆ្នាំកន្លងទៅមានទៅដល់ជិត ២៨០ពាន់លានអឺរ៉ូ៕