សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រុមហ៊ុនចិន Shijiazhuang Hongray Group Co., Ltd. ដែលមានរោងចក្រផលិតស្រោមដៃពេទ្យ និងឧបករណ៍ការពារខ្លួន(PPE) នៅក្នុងតំបន់សេដ្ឋកិច្ចមេហាតធេន ខេត្តស្វាយរៀង បច្ចុប្បន្នកំពុងស្វែងរកទីតាំងសាងសង់រោងចក្របន្ថែមទៀត ដើម្បីពង្រីកសង្វាក់ផលិតកម្មរបស់ខ្លួន។
លោក លាវ គួយស៊ី (Liu Guixi) ប្រធានក្រុមហ៊ុន Shijiazhuang Hongray Group Co., Ltd. ក្នុងជំនួបពិភាក្សាជាមួយ ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជាកាលពីពេលថ្មីៗនេះបានមានប្រសាសន៍ថា ក្នុងដំណើរទស្សនកិច្ចមកកម្ពុជាលើកនេះ ក្រុមហ៊ុនមានបំណងស្វែងរកទីតាំងសាងសង់រោងចក្របន្ថែមទៀតនៅកម្ពុជា ដើម្បីពង្រីកសង្វាក់ផលិតកម្មស្រោមដៃពេទ្យ និងឧបករណ៍ការពារខ្លួន(PPE) ឱ្យបានកាន់តែច្រើនសម្រាប់ការនាំចេញ។
លោកបានបញ្ជាក់ថា ៖
«ក្រុមហ៊ុន Shijiazhuang Hongray Group Co., Ltd. គឺជាក្រុមហ៊ុនដ៏ធំមួយដែលមានបទពិសោធន៍ប្រមាណ ៣០ឆ្នាំកន្លងមកហើយ ក្នុងការផលិតស្រោមដៃពេទ្យ និងឧបករណ៍ការពារផ្ទាល់ខ្លួន(PPE) នាំចេញទៅទីផ្សារអាម៉េរិក និងសហគមន៍អឺរ៉ុប។ គោលបំណងស្វែងរកទីតាំងថ្មី គឺដើម្បីពង្រីកការវិនិយោគបង្កើតរោងចក្រផលិតស្រោមដៃពេទ្យ និងឧបករណ៍ការពារផ្ទាល់ខ្លួន (PPE) ដោយមានតម្រូវការពង្រីកខ្សែច្រវាក់ផលិតកម្មរហូតដល់ទៅ ១០ខ្សែបន្ថែមទៀត»។
ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានថ្លែងគាំទ្រចំពោះគម្រោងពង្រីកការវិនិយោគរបស់ក្រុមហ៊ុន និងបានជំរុញលើកទឹកចិត្តឱ្យក្រុមហ៊ុន ពិនិត្យលទ្ធភាពក្នុងការយកជ័រកៅស៊ូក្នុងស្រុកឱ្យបានច្រើនជាអតិបរមា ធ្វើជាធាតុចូលផលិតកម្មជំនួសឱ្យការប្រើសារធាតុគីមីផ្សេងៗ ដើម្បីកាត់បន្ថយនូវហានិភ័យប៉ះពាល់បរិស្ថាន ដែលបណ្តាលមកពីដំណើរការផលិតកម្មរបស់ក្រុមហ៊ុន។
ឯកឧត្តមបានលើកឡើងថា ៖
«នៅកម្ពុជា មានស្ថានភាពដ៏ល្អប្រសើរលើការវិនិយោគ ដែលរួមមានដូចជា របបលើកទឹកចិត្តប្រកបដោយភាពទាក់ទាញក្រោមច្បាប់ស្តីពីវិនិយោគដែលបើកចំហ មានតម្លាភាព និងអាចប៉ាន់ប្រមាណទុកជាមុនបាន និងសក្តានុពលវិនិយោគក្នុងវិស័យអាទិភាពមួយចំនួន»។
គួរបញ្ជាក់ថា រហូតមកទល់បច្ចុប្បន្នកម្ពុជាមានរោងចក្រ-សហគ្រាសចំនួន ៤៥,៣៨៦ ផ្តល់ការងារដល់កម្មករសរុបចំនួន ១,៨៧លាននាក់ ទទួលបានប្រាក់ឈ្នួលជាមធ្យមប្រចាំឆ្នាំប្រមាណ ៦ពាន់លានដុល្លារអាម៉េរិក។ ក្នុងចំណោមទាំង ៤៥,៣៨៦ នេះ មានសហគ្រាសក្នុងវិស័យកាត់ដេរ ១,៦៥៧ សហគ្រាស ដែលមានកម្មករសរុប៩៧ ម៉ឺននាក់ ទទួលប្រាក់ឈ្នួលមធ្យមប្រចាំឆ្នាំប្រមាណ ៣ពាន់លានដុល្លារអាម៉េរិក៕
Account
Security
Favourite Content