ភ្នំពេញ៖ «យុទ្ធនាការភ្នំពេញស្អាត» ដែលជាផ្នែកមួយនៃគម្រោងស្អាត ត្រូវបានប្រកាសដាក់ឱ្យដំណើរការជាផ្លូវការកាលពីព្រឹកថ្ងៃទី៣ ខែវិច្ឆិកា ឆ្នាំ២០២៣នៅសាកលវិទ្យាល័យភ្នំពេញអន្តរជាតិដើម្បីចូលរួមចំណែកផ្សព្វផ្សាយក្នុងការគ្រប់គ្រងសំរាម។

យុទ្ធនាការភ្នំពេញស្អាត ធ្វើឡើងក្នុងគោលបំណងប្រមូលផ្តុំតួអង្គពាក់ព័ន្ធ ហើយបង្កើតឲ្យមានសម្លេងតែមួយ ដើម្បីសម្រេចបាននូវចក្ខុវិស័យរួមគ្នាមួយ ពោលគឺ ភាពជាគំរូដែលផ្តើមចេញពីយើងទាំងអស់គ្នា ក្នុងការចូលរួមចំណែកលើកកម្ពស់បរិស្ថានស្អាត ជាពិសេសបញ្ជ្រាបអំពីបញ្ហាប្រឈម និងខិតខំស្វែងរកដំណោះស្រាយរួមមួយស្ដីពី «ការទុកដាក់សំរាមឲ្យបានត្រឹមត្រូវ» ទៅដល់សាធារណជនគ្រប់ស្រទាប់ ដើម្បីបំផុសការចូលរួមចំណែកទាំងអស់គ្នាក្នុងការថែទាំ និងលើកកម្ពស់សោភ័ណភាពទីក្រុងឲ្យមានភាពប្រសើរឡើង។

លោក ហៃ ភិរម្យ សហស្ថាបនិកនៃគម្រោងស្អាតបានលើកឡើងថា យុទ្ធនាការភ្នំពេញស្អាតនេះ បានវិវត្តពីការផ្តោតលើការបញ្ជ្រាបសារអប់រំលើឥរិយាបថក្នុងការគ្រប់គ្រងសំរាម ការលើកទឹកចិត្តឱ្យកាត់បន្ថយការប្រើប្រាស់របស់របរដែលបង្កើតជាសំរាម និងការកែច្នៃសំរាមទៅជាសម្ភារៈដែលអាចប្រើប្រាស់បានម្ដងទៀត។ នៅក្នុងឆ្នាំ២០២៣នេះ គម្រោងស្អាត នឹងផ្តោតបន្ថែមទៅលើការបញ្ជ្រាបសារអប់រំ ដើម្បីលើកតម្កើងវប្បធម៌ និងសីលធម៌សង្គម ដោយប្រតិបត្តិស្របនឹងយន្តការដែលរាជរដ្ឋាភិបាលកំពុងអនុវត្ត។

លោក ហៃ ភិរម្យ បានបន្តថា ក្រោមទិសស្លោកថ្មី «សីលធម៌យើង ប្រពៃណីខ្មែរយើងថ្លាថ្លៃ»នេះ គម្រោងស្អាត បានរៀបចំផែនការសកម្មភាពធំៗចំនួនបួន ដោយរួមមាន៖ ទី១) «ចិត្តខ្ញុំស្អាត ខ្មែរស្អាត ជាការធ្វើបទបង្ហាញដោយព្រះគ្រូ គូ សុភាព ជូនយុវជន យុវនារី និងសិស្សានុសិស្ស ក្នុងន័យបណ្តុះការគិតល្អ ក្នុងនាមជាកូន ជាចៅ ជាបងជាប្អូន ជាញាតិមិត្ត ជាពលរដ្ឋល្អ និងជាសិស្សល្អ យុវជនល្អ (ទី២) «ការងារខ្ញុំស្អាត ខ្មែរស្អាត» ជាកម្មវិធីជជែកពិភាក្សា បង្កើនភាពស្និទ្ធស្នាលជាមួយ បងប្អូនកម្មករ កម្មការិនីរោងចក្រ ក្នុងគោលគំនិតបណ្តុះការគិតល្អក្នុងនាមជាពលរដ្ឋល្អ បុគ្គលិកល្អ បង្កើនប្រសិទ្ធភាព ការងារជាមួយបរិស្ថានស្អាត និងអនាម័យល្អក្នុងបរិវេណធ្វើការ (ទី៣) «ខ្ញុំទំពាំងស្អាត ខ្មែរស្អាត» ជាសកម្មភាពមួយ ក្នុងការចុះទៅចែករំលែក និងផ្សព្វផ្សាយជូនដល់សិស្ស និស្សិតនៅតាមគ្រឹះស្ថានសិក្សា និងសាលារៀនឯកជន ដើម្បី បញ្ជ្រាបសារអប់រំ និងការយល់ដឹងបន្ថែមទៀតអំពីការទុកដាក់សំរាមឱ្យបានត្រឹមត្រូវ និង(ទី៤)«ធុរកិច្ចយើងស្អាត ខ្មែរស្អាត» ដែលជាវេទិកាមួយសម្រាប់ម្ចាស់សហគ្រាស និងសហគ្រិនធ្វើការជជែកពិភាក្សាដើម្បី រិះរកមធ្យោបាយសមស្របនានា ក្នុងគោលបំណងលើកកម្ពស់ការចូលរួមការថែរក្សាអនាម័យ តាមរយៈការកាត់បន្ថយ សំណល់ប្លាស្ទិក នៅក្នុងអាជីវកម្ម ព្រមទាំងជំរុញការអភិវឌ្ឍអាជីវកម្មប្រកបដោយនិរន្តរភាព អនុលោមតាមគោល នយោបាយរបស់រាជរដ្ឋាភិបាល និងបទដ្ឋានគតិយុត្តជាធរមាន។

ឯកឧត្តម ហ៊ុន ម៉ានី រដ្ឋមន្រ្តីក្រសួងមុខងារសាធារណៈ និងជាសហស្ថាបនិកនៃគម្រោងស្អាត បានថ្លែងក្នុងពិធីបើកដំណើរការយុទ្ធនាការភ្នំពេញស្អាតថា៖យុទ្ធនាការភ្នំពេញស្អាត នឹងជះឥទ្ធិពលជាវិជ្ជមានក្នុងការផ្លាស់ប្ដូរឥរិយាបថរបស់មនុស្សម្នាក់ៗលើការថែរក្សាបរិស្ថាន ជាពិសេសការគ្រប់គ្រងសំរាមឱ្យបានត្រឹមត្រូវ ដើម្បីជំរុញកិច្ចការពារបរិស្ថានល្អ អនាម័យស្អាត សោភ័ណ្ឌភាពស្រស់បំព្រងក្នុងសង្គម។

ឯកឧត្តម ហ៊ុន ម៉ានី បានថ្លែងកោតសរសើរ និងវាយតម្លៃខ្ពស់ចំពោះក្រុមការងារ និងយុជនសុឆន្ទៈនៃគម្រោងស្អាតទាំងអស់ ដែលបានខិតខំប្រឹងប្រែងរៀបចំ និងបន្តឱ្យមាននូវយុទ្ធនាការភ្នំពេញស្អាត នៅឆ្នាំនេះ ខណៈយុទ្ធនាការនេះ បានចាប់ផ្ដើមតាំងពីឆ្នាំ២០១៧ ហើយសម្រេចបានលទ្ធផលជាទីមោទន។ ឯកឧត្តម បានបញ្ជាក់ថា យុទ្ធនាការភ្នំពេញស្អាត បាននឹងកំពុងរួមចំណែកយ៉ាងសកម្មជាមួយរាជរដ្ឋាភិបាលកម្ពុជា ជាពិសេសជាមួយអាជ្ញាធរមូលដ្ឋាននៃរដ្ឋបាលរាជធានីភ្នំពេញក៏ដូចជាក្រសួងស្ថាប័នពាក់ព័ន្ធក្នុងការចូលរួមដោះស្រាយបញ្ហាសំរាម។

ឯកឧត្តមបានសង្កត់ធ្ងន់ថា គោលដៅចម្បងមួយនៃគម្រោងនេះ គឺកិច្ចសហការជាមួយក្រសួងស្ថាប័នរដ្ឋ ឯកជន ដៃគូសហការពាក់ព័ន្ធ ដើម្បីផ្សព្វផ្សាយអំពីសារសំខាន់នៃភាពស្អាត វិធីសាស្ត្រក្នុងការទុកដាក់សំរាមឱ្យបានត្រឹមត្រូវ ក្នុងគោលដៅជំរុញកិច្ចការពារបរិស្ថានល្អ អនាម័យស្អាត សោភ័ណ្ឌភាពស្រស់បំព្រង និងផាសុខភាព ដែលជាភាពស៊ីវិល័យរបស់សង្គមសម័យទំនើប។

សម្រាប់យុទ្ធនាការភ្នំពេញស្អាត ឆ្នាំ២០២៣នេះ ត្រូវបានឯកឧត្តមរដ្ឋមន្ត្រី ហ៊ុន ម៉ានី ថ្លែងឱ្យដឹងថា អនុវត្តក្រោមពាក្យស្លោក «សីលធម៌យើងប្រពៃ ខ្មែរយើងថ្លាថ្លៃ» ដោយផ្ដោតលើគោលគំនិតសំខាន់ៗ៣ គឺចិត្តគំនិតស្អាត អាកប្បកិរិយាស្អាត និងប្រតិបត្តិការស្អាត ជាមួយនឹងផែនការសកម្មភាពចំនួន៤ គឺចិត្តខ្ញុំស្អាត ខ្មែរស្អាត, ការងារខ្ញុំស្អាត ខ្មែរស្អាត, ខ្ញុំទំពាំងស្អាត ខ្មែរស្អាត និងធុរកិច្ចយើងស្អាត ខ្មែរស្អាត។

តាមរយៈយុទ្ធនាការនេះ ឯកឧត្តមរដ្ឋមន្រ្តី ជឿជាក់យ៉ាងមុតមាំថា នឹងទទួលបានប្រជាប្រិយភាព និងជះឥទ្ធិពលវិជ្ជមាន ដើម្បីបង្កើតភាពជាគម្រូដល់យុវជនជំនាន់ក្រោយ និងផ្នត់គំនិតចូលរួមជាដំណោះស្រាយលើបញ្ហាប្រឈម ដែលសង្គមជាតិទាំងមូលកំពុងជួបប្រទះ។ បន្ថែមពីនេះ ឯកឧត្តម ក៏ជឿជាក់ថា បទពិសោធ និងដំណើរវិវឌ្ឍទៅមុខកន្លងមករបស់គម្រោងស្អាត នឹងអាចក្លាយជាមូលដ្ឋាន និងជាធាតុចូលបន្ថែមទៀតដល់ក្រុមការងារ ក៏ដូចជាក្រុមយុវជនសុឆន្ទៈស្អាតទាំងអស់ ក្នុងការបន្តបេសកកម្មសម្រាប់ឆ្នាំនេះ និងឆ្នាំបន្តបន្ទាប់។

«យុទ្ធនាការភ្នំពេញស្អាត» នេះ បានធ្វើឡើងជារៀងរាល់ឆ្នាំ ក្នុងអំឡុងខែវិច្ឆិកា ពោលគឺពេញមួយខ ដែលយុទ្ធនាការនេះប្រសិទ្ធនាមថាជា «ខែស្អាត» ហើយឆ្នាំនេះ ក៏ជាឆ្នាំទី៧ផងដែរ នៃយុទ្ធនាការភ្នំពេញស្អាតឆ្នាំ ២០២៣។ យុទ្ធនាការនេះ ត្រូវបានចូលរួម និងអនុវត្តដោយស្ម័គ្រចិត្តពី «យុវជនសុច្ឆន្ទៈស្អាត» ជាច្រើនរូបក្នុងការផ្សព្វផ្សាយ និងបញ្ជ្រាបការយល់ដឹងបន្ថែមពាក់ព័ន្ធនឹងការទុកដាក់សំរាមឱ្យបានត្រឹមត្រូវតាមផែនការសកម្មភាពដែលបានដាក់ចេញក្រោមទិសស្លោក«សីលធម៌យើងប្រពៃណីខ្មែរយើងថ្លាថ្លៃ»៕ដោយៈញ៉ែម សុផល