សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី CNA បានរាយការណ៍ថា រដ្ឋបាល Donald Trump កំពុងពិចារណាយ៉ាងខ្លាំងលើការហាមឃាត់ការធ្វើដំណើរពីប្រទេសផ្សេងៗបន្ថែមទៀត ដោយបន្ថែមជាតិសាសន៍ ៣៦ ប្រទេសបន្ថែមទៀតមិនឱ្យចូលទឹកដីសហរដ្ឋអាម៉េរិក។
កាលពីដើមខែមិថុនានេះ ប្រធានាធិបតីអាម៉េរិក Donald Trump បានចុះហត្ថលេខាលើសេចក្តីប្រកាសមួយដែលហាមឃាត់សញ្ជាតិចំនួន ១២ ប្រទេសក្រោមហេតុផលថា ការផ្លាស់ប្តូរនេះគឺចាំបាច់ដើម្បីការពារសហរដ្ឋអាម៉េរិកពីភេរវករបរទេស និងការគំរាមកំហែងសន្តិសុខជាតិផ្សេងទៀត។ បន្ថែមពីនេះ វិធានការណ៍នេះគឺជាផ្នែកមួយនៃការបង្រ្កាបជនអន្តោប្រវេសន៍នៅក្នុងអាណត្តិទីពីររបស់ Trump រួមមានការនិរទេសជនជាតិវេណេស៊ុយអេឡារាប់រយនាក់ ក៏ដូចជាការបដិសេធចុះឈ្មោះពីនិស្សិតបរទេសមួយចំនួនជាដើម។
រដ្ឋមន្ត្រីក្រសួងការបរទេសអាម៉េរិក លោក Marco Rubio បានចុះហត្ថលេខាក្នុងលិខិតការទូតផ្ទៃក្នុងមួយ និងរាយបញ្ជីប្រទេសជាច្រើនដែលកំពុងជាប់ក្នុងការហាមឃាត់ ជាមួយនឹងការស្វែងរកវិធានការកែតម្រូវ។ ទន្ទឹមនឹងនេះ ក្រសួងការបរទេសបានកំណត់អត្តសញ្ញាណប្រទេសចំនួន ៣៦ ដែលអាចត្រូវបានហាមឃាត់ពេញលេញ ឬដោយផ្នែកសម្រាប់ការចូលទឹកដីអាម៉េរិក ប្រសិនបើពួកគេមិនបំពេញតាមស្តង់ដាររបស់អាម៉េរិកក្នុងរយៈពេល ៦០ ថ្ងៃ។ ក្នុងចំណោមកង្វល់ដែលក្រសួងការបរទេសបានលើកឡើង គឺរដ្ឋាភិបាលប្រទេសមួយចំនួនខ្វះកិច្ចសហប្រតិបត្តិការ ឬការគ្រប់គ្រងដោយប្រសិទ្ធភាពក្នុងការធ្វើឯកសារអត្តសញ្ញាណដែលអាចទុកចិត្តបាន និងសុវត្ថិភាពនៃលិខិតឆ្លងដែនរបស់ប្រទេសនោះ។ មិនត្រឹមតែប៉ុណ្ណោះ ប្រទេសមួយចំនួនមិនសហការក្នុងការសម្របសម្រួលលើការដកសញ្ជាតិរបស់ខ្លួនចេញពីអាម៉េរិក ខណៈដែលសញ្ជាតិមួយចំនួនកំពុងស្នាក់អាម៉េរិកលើសរយៈពេលនៃទិដ្ឋាការ។ ការព្រួយបារម្ភរបស់អាម៉េរិកមួយទៀតនោះ គឺជនជាតិនៃប្រទេសមួយចំនួនពាក់ព័ន្ធនឹងអំពើភេរវកម្មនៅអាម៉េរិក ឬ សកម្មភាពប្រឆាំងជាដើម។
មន្ត្រីជាន់ខ្ពស់ក្រសួងការបរទេស បានលើកឡើងយ៉ាងដូច្នេះថា ៖
«យើងកំពុងវាយតម្លៃឡើងវិញនូវគោលនយោបាយដើម្បីធានាសុវត្ថិភាពរបស់ពលរដ្ឋអាម៉េរិក និងរបៀបដែលជនបរទេសអនុវត្តតាមច្បាប់របស់យើង។ ក្រសួងការបរទេសអាម៉េរិកបានប្តេជ្ញាការពារប្រទេសជាតិ និងពលរដ្ឋរបស់ខ្លួន ដោយប្រកាន់ខ្ជាប់នូវសន្តិសុខជាតិដែលមានស្តង់ដារខ្ពស់បំផុត និងសុវត្ថិភាពសាធារណៈតាមរយៈដំណើរការទិដ្ឋាការរបស់អាម៉េរិក»។
លោកបានបញ្ជាក់ទៀតថា ប្រសិនបើប្រទេសទាំងនោះមិនដោះស្រាយបញ្ហាក្នុងរយៈពេល ៦០ ថ្ងៃនោះទេ សញ្ជាតិមកពី ៣៦ ប្រទេសអាចប្រឈមមុខនឹងការហាមឃាត់ទាំងស្រុង ឬដោយផ្នែករួមមាន៖ អង់ហ្គោឡា, អង់ទីហ្គា, បាប៊ូដា, បេនីន, ប៊ូតាន, ប៊ូគីណាហ្វាសូ, កាបូវើដ, កាមេរូន, កូតឌីវ័រ, សាធារណរដ្ឋប្រជាធិបតេយ្យកុងហ្គោ, ជីប៊ូទី, ដូមីនីកា, អេត្យូពី, ហ្គាបុង, កំប៊ី, ហ្គាណា, កៀគីស្ថាន, លីបេរីយ៉ា, ម៉ាឡាវី, ម៉ូរីតានី, នីហ្សេរីយ៉ា, សាំងឃីត, ណេវីស, សាំងលូស៊ី, សៅថម និងព្រីនស៊ីប, សេណេហ្គាល់, ស៊ូដង់ខាងត្បូង, ស៊ីរី, តង់ហ្សានី, តុងហ្គា, ទូវ៉ាលូ, អ៊ូហ្គង់ដា, វ៉ានូអាទូ, ហ្សាំប៊ី, និងហ្ស៊ីមបាវ៉េ។ នេះគឺជាការរឹតបន្តឹងបន្ថែមពីលើការហាមឃាត់សញ្ជាតិចំនួន ១២ ប្រទេសកាលពីលើកមុន ដែលបានចូលជាធរមាននៅដើមខែមិថុនានេះ។ គួរឲ្យបញ្ជាក់ដែរថា ការហាមឃាត់ចូលទឺកដីអាម៉េរិកលើកមុនមានសញ្ជាតិមកពី ១២ ប្រទេសដូចជា៖ អាហ្វហ្គានីស្ថាន, មីយ៉ាន់ម៉ា, ឆាដ, កុងហ្គោ, អេក្វាទ័រហ្គីណេ, អេរីទ្រា, ហៃទី, អ៊ីរ៉ង់, លីប៊ី, សូម៉ាលី, ស៊ូដង់, និងយេម៉ែន៕
Account
Security
Favourite Content